MATAYO 3 - IBIBILIA INDAKATIFU MU LUTIRICHI LWITAKHO NENDE LWISUKHA

Lilwatsa lia Yohana Mubatisi

¹ Mumatukhu kenako, Yohana Mubatisi yalolekha mu Shiangalangwi shia Yudeya, naraanga khwilwatsa.

² Yohana yavoolela vandu, “Mwikanile khurula mu vwoni vwenyu, shichila Vwami vu mwikulu vuli himbi khwitsa.”

³ Muprofeti Isaya yali walomolomakhu makhuva khulondokhana khu Yohana; lwa yavoola, “Mundu alaanjililanga mu shiangalangwi, navoola, ‘Lombi injila yu Mwami alondelakhu, Lunjishitsi injila yeye.’ ”

⁴ Yohana yali wayifwala tsinguvu tsia naavwa khu vwoya vwi ingamia, niyivoha lukhanda lwi shiseelo mu shisiindi mwemwe; shiukhulia shieshie shiali tsisichi nende vushi vumbulimu.

⁵ Vandu varula Yerusalemi, shia havundu hosi mu lusomo lwa Yudeya khandi khurula mu tsisomo tsiosi tsili himbi khu Muchela kwa Yorodani, nivatsia khu Yohana.

⁶ Viyema vwoni vwavo, Yohana navabatisa mu Muchela kwa Yorodani.

⁷ Lwa Yohana yalola Vafarisayo vanyishi nende Vasadukayo nivitsanga khuye khubatiswa, yavavoolela “Munyi vandu vamuli khuli tsinzukha! Ni viina wamuvoolela munyala khwihonolokha khurula mulisalila lia Nyasaye ali himbi khulera?

⁸ Mukhole vindu vinyala khumanyinya ndi mwayikanila khurula mu vwoni vwenyu.

⁹ Muvuli khukanakanakhu munyala khwihonolokha khusalilitswa, lwa muvoolanga Aburahamu ni kuuka wenyu. Muvoolelanga ndi Nyasaye anyala khukalukhanyinya machina yaka kave vitsukhulu va Aburahamu.

¹⁰ Khali nunundi ihaywa yirecheshitswi khureema misala khuraanjila khu miili; shia musala kwosi kuvula khwama matunda malahi, kuliitsa khureemwa nu khusiuvwa mu mulilu.

¹¹ Mubatisanga na matsi khumanyinya ndi mwikanili khurula mu vwoni vwenyu. Navutswa woyo witsanga inyuma wanje ali ni tsingulu tsinyishi khumbira khandi mbulakhu vunyali vu khuchinga vilaaro vievie. Aliitsa khumubatisa na Roho Mutakatifu nende mulilu.

¹² Ali nulutelu lu khwilula imu yosi. Aliitsa khuvunjelitsa inganu yeye mu shiachi shieshie, navutswa aliitsa khusambila ikhulio mu mulilu kukhatsimanga tawe.”

Khubatiswa khwa Yesu

¹³ Mumatukhu kenako, Yesu yarula mu lusomo lwa Galilaya, natukha ha Muchela kwa Yorodani khu Yohana amubatisi.

¹⁴ Navutswa Yohana yachelitsa khumukaya navoola, “Nivi utushili khumbatisa; nikhali witsi khwinzi khubatisi?”

¹⁵ Navutswa Yesu yamuchipa, “Lekha kikholeshe ndio nunundi; nu vulahi nukhukholi ndio khu khurweshitsi koosi ka Nyasaye yenyanga.” Nalwo lwa Yohana yahuchilila.

¹⁶ Lwa Yesu yali namali khubatiswa, yarula vwangu mu matsi; isaa yeneyo likulu likukha, nalola Roho wa Nyasaye nayeelanga khuye khuli shituti, khandi nishiyeela khuye.

¹⁷ Mwoyo kwarula mwikulu nu kuvoola, “Uyu neye Mwana wanje wa nayaanza; nyanzitswangwa naye.”