MATAYO 28 - IBIBILIA INDAKATIFU MU LUTIRICHI LWITAKHO NENDE LWISUKHA

Yesu Yisimukha Khurula mu Likhutsa

¹ Lwa Litukhu li Lisabato liali nilivwele, khulitukhu lia Jumapili nu kushili mu mavwevwe, Mariya Magadalena nende mukhali wundi walaangwangwa Mariya vasimukha nivatsia khulola shilindwa.

² Nonoho lwa shivala shiatechela; ma injelosi yu Mwami Nyasaye niyikha khurula mwikulu, nikolongominya lichina lienelo, khandi niyikhala khulio.

³ Likoondo liayo liali khuli luheni, na tsinguvu tsiayo nitsiva tsindavu khuli imparafu.

⁴ Valindi valindanga ha shilindwa varia nivatechela khandi nivakwa khuli vandu vakhutsa.

⁵ Navutswa injelosi yavoolela vakhali venavo, “Muvuli khuria; shichila manyi ndi mukhavanga Yesu wavambwa.

⁶ Shiali hanu tawe; wisimushi khurula mu likhutsa, khuli yavoola. Hambi, mulole havundu ha vali nivamura.

⁷ Khulwa yako, simushi mutsi vwangu, muvoolele veechi veve, ‘Umali khwisimukha khurula mu likhutsa; khandi aranganga nunundi khutsia mu lusomo lwa Galilaya imbeli wenyu; wa muliitsa khumulolelayo.’ Mwitsushitse makhuva kamuvoolele.”

⁸ Vasimukha nivarula ha shilindwa nu vuri, nivali nu vuyaanzi vunyishi, nivatsia vwangu khuvoolela veechi veve.

⁹ Nonoho lwa Yesu yakana navo navoola, “Nyoli Milembe!” Vatsia khuye nivakumila khu vilenje vievie, khandi nivasaala khuye.

¹⁰ Yesu yavavoolela, “Muvuli khuria; simushi mutsi muvoolele vasuuvili vashianje, vatsi mu lusomo lwa Galilaya, wa valolela inzi.”

Valindi Vali ha Shilindwa Vavoola Kali Nikakholeshe

¹¹ Lwa vakhali venavo vali nivakharulaho, valindi valala khu yavo valindanga ha shilindwa vasimukha nivatsia mu litaala likali, nivavoolela vasalisi vakali makhuva koosi kali nikakholeshe.

¹² Khulwa yako, vasalisi vakali vakana na vasakhulu, nivaloshitsa makhuva kavo. Vaha vasikali tsisenti tsinyishi

¹³ nivavoola, “Khutukha muvoole, ‘Veechi veve valolekha mu vutukhu nivahuuva mmbili kwekwe, nu khushikonanga tsindolo.’

¹⁴ Niiva gavana aliitsa khuhulila ndio, khuliitsa khumuha vulunji vwa makhuva kenako, khandi khumurulitsi mu vutiinyu.”

¹⁵ Khulwa yako, valindi venavo vavukula tsisenti, nivakhola khuli vavoolelwa vakhole; makhuva kenako kalanditswa shia havundu hosi mu Vayahudi, khali kavoolwangwa mumatukhu kanu.

Yesu Yalolekha khu Veechi Veve Likhomi na Mulala

¹⁶ Nalwo lwa veechi likhomi na mulala vasimukha nivatsia khu shikulu shili mu lusomo lwa Galilaya, wa Yesu yali navavoolele vatsi.

¹⁷ Lwa vamulola vasaala khuye; navutswa valala khuvo vahayahaya mu mioyo chiavo.

¹⁸ Yesu yisuunda himbi khuvo navavoolela, “Mali khuheelwa vunyali vu khusinjilila vindu viosi vili mwikulu nende khulilova.

¹⁹ Simushi mutsi khu vandu vi tsimbia tsiosi shia havundu hosi mu shivala, muvakhole khuva veechi vaanje. Vabatisi khuvirila mu lira lia Tata, liu Mwana nende lia Roho Mutakatifu,

²⁰ khandi muveechitsi khulonda shia shindu shiosi shiamali khumuvoolela. Ni kilikali, niitsa khuva na munyi khumatukhu koosi, khutukha khulitukhu li shiheeli.”