MATAYO 27 - IBIBILIA INDAKATIFU MU LUTIRICHI LWITAKHO NENDE LWISUKHA

Yesu Yahilwa khu Pilato

¹ Nukushili mu mavwevwe, vasalisi vakali voosi nende vasakhulu vakanila halala nivaloshitsa khuli vanyala khwiira Yesu.

² Vavoha Yesu khu masili, nivamurulitsaho khandi nivamuhila khu Pilato, wali nali gavana wu lusomo lwa Varoma.

Yuda Yisunga Mwene

³ Lwa Yuda, wali natsami Yesu, yahulila ndi Yesu umali khukhalachilwa likhutsa, yikanila, nakalushitsa tsisenti tsialombwa khu ifetsa vitonye makhomi kavaka khu vasalisi vakali nende vasakhulu.

⁴ Yavoola, “Kholi vwoni khutsama mundu uvula vutamanu vwosi.” Vareeva, “Kenako kali nu vukhonyi shina khu khutsi? Ni koko mwene.”

⁵ Yuda yasiuva tsisenti tsialombwa khu ifetsa tsienetso hasi mu Litempeli, narulaho; yasimukha natsia khwisunga.

⁶ Vasalisi vakali vatola tsisenti tsialombwa khu ifetsa tsienetso, nivavoola, “Yitsi ni tsisenti tsi shisahi; khandi nu vutamanu khulondokhana khu Malako keru khutsivikha mu livishilu li Litempeli.”

⁷ Lwa vali nivamali khulomolomakhu shindu khulondokhana khu tsisenti tsienetso, vakuula Mulimi ku Muloonji wi Tsinyungu, khuva havundu ha vanyala khuyeveelanga mivili chia vandu vacheni nivamali khukhutsa.

⁸ Nako kachilanga mulimi kwenoko nu kulaangwa “Mulimi kwi Shisahi” khali nunundi.

⁹ Khulwa yako, makhuva ka Muprofeti Yeremia yali niyavoola karweshitswa, “Vavukula tsisenti vitonye, makhomi kavaka tsialombwa khu ifetsa, tsia Vaisraeli vali nivahulishitsane khumurunga,

¹⁰ nivakuula mulimi ku muloonji, khuli Mwami Nyasaye yali niyambolela.”

Pilato Yareeva Yesu Mareevo

¹¹ Yesu yasinjila imbeli wa gavana, namureeva, “Nivi Mwami wa Vayahudi?” Yesu yachipa, “Toto, uvooli.”

¹² Navutswa lwa yayaalwa na vasalisi vakali nende vasakhulu, shindu shivulakhuho shia yachipakhu.

¹³ Nalwo lwa Pilato yamureeva, “Ushili khuhulilakhu vindu yivi viosi via vakhuyaalilakhu?”

¹⁴ Navutswa shindu shivulakhuho shia Yesu yachipakhu; nikachenyinya muno gavana.

Yesu Yakhalachilwa Likhutsa

¹⁵ Shia litukhu liu Mulukha kwa Pasaka, gavana yali nu mwiima kukhuvoholola muvohe mulala wa vandu venyanga.

¹⁶ Mumatukhu kenako, khwaliho nu muvohe wali niyamanyikhana walaangwangwa Baraba.

¹⁷ Khulwa yako, lwa shituma shia vandu vali nivakanile halala, Pilato yavareeva, “Mwenyanga muvohololele viina, Baraba inoho Yesu ulaangwangwa Masiha?”

¹⁸ Pilato yali umanyi vulahi ndi valolele Yesu imbotokha lwa vamulera khuye.

¹⁹ Lwa Pilato yali niyikhale mu inzu ya vakhalachilamu vandu, mukhali wewe yarumana likhuva navoola, “Uvuli khukholakhu shindu shiosi khu mundu wi likhola liu vulunji woyo, shichila vutukhu vunu, nyakhane vutamanu muno mu malooro shichila ye.”

²⁰ Khulwa yako, vasalisi vakali nende vasakhulu vakaatilitsa vandu vareeve Pilato avoholole Baraba, na Yesu yiirwi.

²¹ Navutswa Pilato yareeva shituma shia vandu, “Ni viina khu vavili yava wa mwenyanga muvohololele?” Vamuchipa, “Baraba.”

²² Pilato yavareeva, “Ni shina shia mwenyanga khole Yesu uli ni lira Masiha?” Voosi vamuchipa, “Khutukha avambwi.”

²³ Pilato yareeva khandi, “Ni shindu shina shitamanu shia ye akholi?” Navutswa voosi valaanjilila ikulu muno, nivavoola, “Khutukha avambwi.”

²⁴ Lwa Pilato yalola vandu vamukutilili, khali shileeche nishili himbi khuraanga, yavukula matsi, nasava makhono keke imbeli wi shituma shia vandu. Yavoola, “Mbula vutamanu vwosi khulondokhana khu likhutsa liu mundu uyu! Kali khu munyi vene.”

²⁵ Shituma shia vandu voosi vachipa, “Shisahi shieshie shive khu khutsi halala na vaana veru!”

²⁶ Nalwo lwa Pilato yavoholola Baraba; khandi namali khuhaana lilako Yesu ashiutwi, yamuhaana avambwi.

Vasikali Vakholela Yesu Shihenye henye

²⁷ Nalwo lwa vasikali va Pilato vahila Yesu Mupritoriomu, ma mukaanda kwa vasikali voosi nivalaangwa halala.

²⁸ Vamufwalula tsinguvu tsietsie nivamufwala inguvu ya sambarau.

²⁹ Valukha ingara ya mavwa nivamufwala khu murwi kwekwe. Vavukula lusala nivara mu mukhono musatsa kwa Yesu; vasikama imbeli wewe, nivamukholela shihenye henye. Vavoola, “Mwami wa Vayahudi, uhindile muno!”

³⁰ Vasutsila Yesu maree, nivamurumula nu lusala khu murwi.

³¹ Lwa vali nivamali khumukholela shihenye henye, vamufwalula ikaanzu ya sambarau, nivamufwala tsinguvu tsietsie; vamurulitsa ilwanyi, nivatsia khumuvamba.

Yesu Yavambwa khu Musalaba.

³² Lwa vali nivarulaho, vakana nu mundu, walaangwangwa Simoni wi litaala lia Kurene; khandi nivamunika ni tsingulu khuchinga musalaba kwa Yesu.

³³ Lwa vatukha havundu halaangwangwa Golokotsa (Kavoolanga, “Havundu hi Shihanga”),

³⁴ vamuha idivai yatsukanyinywa shindu shilulu; navutswa lwa yatsanzamakhu, yambakhana khuching'wa.

³⁵ Lwa vali nivamali khuvamba Yesu khu musalaba, vakhuva ikura khukavulana tsinguvu tsietsie vene khuvene;

³⁶ nivikhalaho hasi khumulinda.

³⁷ Khumusalaba kwa Yesu hikulu hene vali vahandikakhu shivune shiachila nakhalachilwa likhutsa, shivoolanga, “Uyu neye Yesu, Mwami wa Vayahudi.”

³⁸ Vavamba vandu vanuuli vavili halala na Yesu, mulala khuluveka lu mukhono kwekwe musatsa na wundi khuluveka lu mukhono kwekwe mukhali.

³⁹ Vandu vali nivaviraho vasung'usa mirwi chiavo, nivasiuvila Yesu manyeko,

⁴⁰ nivavoola, “Yivi wakhapomole Litempeli khandi uliumbashe mumatukhu kavaka, yihonyinyi mwene! Niiva uli Mwana wa Nyasaye, yikha hasi khurula khu musalaba.”

⁴¹ Khali ndio, vasalisi vakali, veechitsi va Malako nende vasakhulu, vakholela khandi Yesu shihenye henye.

⁴² Vavoola, “Yahonyinyanga vandi; navutswa shianyala khwihonyinya mwene tawe. Neye Mwami wa Israeli. Leshi yishi hasi khurula khu musalaba nunundi; khandi khusuuvile muye!

⁴³ Yasuuvilanga mu Nyasaye nu khwilaanga neye Mwana wa Nyasaye; nu vulahi, leshi khulole niiva Nyasaye alamuhonyinya nunundi.”

⁴⁴ Khali vanuuli vavambwa neye vamunyeka.

Likhutsa lia Yesu

⁴⁵ Lwa tsisaa sita tsiu mbasu tsiatukha, shivala shiosi shiamwama nishikwa shisuundi khutukha tsisaa tisa.

⁴⁶ Himbi tsisaa tisa, Yesu yalila nu mwoyo mukali, navoola, “Eloi, Eloi lama Sabaktani,” nakhwo khuvoola, “Nyasaye wanje, Nyasaye wanje, shichila shina unzivale?”

⁴⁷ Lwa vandu vali nivasinjileho vahulila ndio vavoola, “Alanganga Eliya!”

⁴⁸ Mulala khu vandu venavo yilukhaka vwangu navukula shitasi, niyinikha mu idivai indulu. Yavoha khu shisala naha Yesu ang'wi.

⁴⁹ Navutswa vandi vavoola, “Lindilili, khulole niiva Eliya aliitsa khumuhonyinya!”

⁵⁰ Yesu yalila nu mwoyo mukali, nakhutsa.

⁵¹ Luvaala lwali nulwashinga mu Litempeli lwarandukhamu hali khavili khurula ikulu khutukha hasi. Shivala shiatechela, khandi tsinyanda ni tsiatikhanamu,

⁵² vilindwa vialama nivikukha, ma vandu va Nyasaye vanyishi vali nivakhutsa ni visimushitswa khurula mu likhutsa.

⁵³ Varula mu vilindwa; khandi lwa Yesu yali namali khwisimukha khurula mu likhutsa, yasimukha natsia mu Litaala likali Litakatifu, wa vandu vanyishi va valola.

⁵⁴ Lwa mwimilili wa vasikali imia nende yavo va yali navo vali nivalindanga Yesu vahulila shivala nishitechelanga, khandi vindu vindi viali nivikholekhanga, vatechela nivavoola, “Ni kilikali, mundu uyu yali Mwana wa Nyasaye!”

⁵⁵ Khwaliho na vakhali vanyishi, vaheenzelelanga ihale wene, vali nivalondi Yesu khurula mu lusomo lwa Galilaya, khwitsa khumurumishila.

⁵⁶ Valala khu vakhali venavo valimu Mariya Magadalena, Mariya mama wa Yakobo nende Yosefu, khandi mukhali wa Zebedayo.

Khuyeveelwa khwa Yesu mu Shilindwa

⁵⁷ Lwa khulukolovo khwatukha, mundu muhinda wi litaala lia Arimatseya walaangwangwa Yosefu yatukhaho; khandi yali mwechi wa Yesu.

⁵⁸ Yosefu yasimukha natsia khu Pilato, nareeva amuhe mmbili kwa Yesu. Pilato yahaana lilako vamuhe mmbili kwenoko.

⁵⁹ Khulwa yako, Yosefu yavukula mmbili kwenoko, nakulinjila mu luvaala lwa naavwa khu machoro malahi ku khunavakhu;

⁶⁰ Yosefu yakura mu shilindwa shieshie shia yali niyayeeva mwene mu lwanda. Yakolongominya lichina likali mu vwinjililu vu mu shilindwa, narulaho.

⁶¹ Mariya Magadalena nende Mariya wundi vali nivikhaleho, nivaheenzi shilindwa.

Valindi Valindanga ha Shilindwa

⁶² Litukhu lialondakhu, nilili litukhu li Lisabato, vasalisi vakali nende Vafarisayo vakana na Pilato,

⁶³ nivavoola, “Mwami, khwitsushitsanga makhuva ku mundu muvehi woyo yavoola, lwa yali nashili mwoyo, ‘Matukhu kavaka nikakhavira, niitsa khwisimushitswa khurula mu likhutsa.’

⁶⁴ Haana malako shilindwa shieshie khulindwa vulahi muno khutukha khulitukhu lia khavaka, khu veechi veve vavuli khutsia khuhuuva mmbili; khandi vavoolele vandu ndi umali khwisimushitswa khurula mu likhutsa. Vuvehi vukhumalilikha yuvu vulava vutamanu muno khuvira vuvehi vu khuraanga.”

⁶⁵ Pilato yavavoolela, “Vukuli mulindi unyala khulinda; simushi mutsi, muchelitsi khulinda shilindwa vulahi khuli munyala.”

⁶⁶ Khulwa yako, vatsia nivalomba vulahi muno shilindwa, lwa vavikhakhu muhuuli khu lichina, khandi nivalekhaho musikali unyala khushilinda.