MATAYO 24 - IBIBILIA INDAKATIFU MU LUTIRICHI LWITAKHO NENDE LWISUKHA

Yesu Yalomoloma khu Lipomolwa li Litempeli

¹ Lwa Yesu yali narulanga mu Litempeli, veechi veve vamumanyinya miumbakho chi Litempeli.

² Navutswa yavavoolela, “Mulolanga vindu yivi viosi? Muvoolelanga kilikali ndi khali lichina livulakhuho lilala khu machina yaka liliitsa khurikala nilicheleshe khu lindi. Kosi kaliitsa khusiuvwa hasi.”

Vutiinyu nende Litambitswa

³ Lwa Yesu yali niyikhale khu Shikulu shia Misayituni, veechi veve vatsia khuye muvwivisi; nivareeva, “Khuvoolele, inyinga ya vindu yivi viliitsa khwikholekha. Ni shina shiliitsa khuva shimanyilu shiu khwitsa khwokhwo nende matukhu ki shiheeli?”

⁴ Yesu yavachipa, “Muve vacheli; muvuli khukaatwa nu mundu.

⁵ Vandu vanyishi valiitsa khwitsa khuvirila mu lira lianje, nivavoola, ‘Ninzi Masiha,’ khandi valiitsa khukoritsa vanyishi.

⁶ Muliitsa khuhulila maahe khandi makhuva khulondokhana khu liihe ihale wene; navutswa muvuli khunyakhana mu mwoyo. Vindu khuli vienevo khutukha viliitsa khuraanga khwikholekha; navutswa shikamanyinyanga shiheeli shiliitsa khuva nishili himbi khutukha tawe.

⁷ Luhia luliitsa khukwana luhia lundi; khandi vwami vuliitsa khwinjilila vwami vundi. Khuliitsa khuva ni inzala nende khutechela khwi shivala shia havundu hosi.

⁸ Vindu yivi viosi viliitsa khuva khuli isalila yu mukhali wenyanga khwivula mwana wu khuraanga ahulilanga.

⁹ “Valiitsa khumukumila, mamuhaanwi khu vandu valiitsa khumusalilitsa nu khumwiira. Vandu voosi mu shivala valiitsa khumuhima, shichila lira lianje.

¹⁰ Vandu vanyishi valiitsa khulekha khulonda lisuuvila liavo mumatukhu kenako. Valiitsa khutsamana nu khuhimana vene khuvene.

¹¹ Vaprofeti vanyishi vu vuvehi valiitsa khulolekha khandi valiitsa khukoyanyinya vanyishi.

¹² Vandu vanyishi valiitsa khutsililila khukhola vindu vinyishi vitamanu shia havundu hosi; khandi vanyishi valiitsa khuvula khuyaanza veshie khuli kenyekhanga.

¹³ Navutswa mundu uliitsa khwitsumishitsa khutukha khulitukhu liukhumalilikha, neye uliitsa khuhonyinywa.

¹⁴ Ivanjeli khulondokhana khu Vwami iliitsa khuva ya yilwatswa shia havundu hosi, khuva khuli vushiahidi khu vandu voosi mu shivala; ma matukhu ki shiheeli kalitukha.

Shindu Shitamanu Muno shiu Khutechelitsa

¹⁵ “Muliitsa khulola ‘Shindu Shitamanu Muno shiu khutechelitsa’ shiu Muprofeti Danieli yavoola, nishisinjile Havundu Hatakatifu.” (Usoma amanye shia kavoolanga)

¹⁶ “Yavo vali mu lusomo lwa Yudeya valiitsa khwilukha khutsia mu vikulu.

¹⁷ Mundu uli khu shisechese shi inzu yeye, akhikha khutsia khuvukula vindu vili munzu mwemwe tawe;

¹⁸ mundu uli mu mulimi akhakalukha khuvukula inguvu yeye tawe.

¹⁹ Vuliitsa khuva vutiinyu muno mumatukhu kenako khu vakhali vaheelitsa nende vanunyinyanga vaana vatoro!

²⁰ Musaale khu Nyasaye muvuli khwilukha mumatukhu ku vushindu, inoho khulitukhu li Lisabato.

²¹ Mumatukhu kenako, khuliitsa khuva nu vutiinyu vunyishi muno khuvira vutamanu vwosi vwalikhuho, khurula shivala nishiloongwa khutukha nunundi. Inoho shiukhuliitsa khuvakhuho nu vutiinyu khuli vwo khandi tawe.

²² Navutswa Nyasaye wamala khuchehitsa matukhu kenako; niiva yakhavuli khukachehitsa, mundu avulakhuho wakhahonyinywi. Navutswa shichila vandu veve va yarovola, matukhu kenako kaliitsa khuchehitswa.

²³ “Niiva mundu aliitsa khumuvoolela, ‘Lola, Masiha ali hanu!’ Inoho ‘Ali yeyo!’ Muvuli khumusuuvila.

²⁴ Masiha vu vuvehi nende vaprofeti vu vuvehi valiitsa khulolekha; khandi valiitsa khukhola viloleshitsu nende vindu viu khuchenyinya khu vakoritsi vandu va Nyasaye yarovola, niiva kalanyalikhana.

²⁵ Loli! Mali khumuvoolela makhuva kenako matukhu kenako nikashili khutukha.

²⁶ “Khulwa yako, niiva vandu valiitsa khumuvoolela, ‘Loli, ali mu shiangalangwi!’—muvuli khutsiayo; inoho nivavoola, ‘Loli, wivisi isiisi munzu!’—muvuli khuvasuuvila.

²⁷ Mwana wu Mundu aliitsa khwitsa khuli luheni luhemukhanga mu malesi khurula ivukwi khutukha imbo.

²⁸ Wa mmbili kwi shindu shiakhutsa shili, naho wi vilitsa viakanilanga halala.

Khwitsa khu Mwana wu Mundu

²⁹ “Nukhumali vwangu vutiinyu vwa matukhu kenako, liuva liliitsa khumwama, khandi mweli kuliitsa khutsima khwakha; tsinyining'ini tsiliitsa khwakukha khurula mu malesi khandi tsingulu tsiu mwikulu tsiliitsa khunuyanyinywa mu makono katsio.

³⁰ Mumatukhu kenako, shimanyilu shiu Mwana wa Mundu shilitsa khulolekha mu malesi; khandi vandu vi tsimbia tsiosi khulilova valiitsa khulila, lwa valiitsa khulola Mwana wu Mundu niyitsanga mu malesi ku mwikulu ni tsingulu nende vukhumi vu khuchenyinya.

³¹ Aliitsa khuruma tsingelosi tsietsie nu mulaango kwi shisiliva; natsio tsiliitsa khuvunjelitsa halala vandu veve va yarovola khurula mu tsimbeka tsiosi tsine tsiu khulilova.

Liechitso khu Musala ku Mukhuyu

³² “Yechi nunundi liechitso yili khu musala ku mukhuyu. Lwa tsisia tsiakwo tsivetsanga nitsili tsimbisi khandi tsinyelele, musala kwenoko kuraanganga khwamulukha masambu khandi mumanya shimiyu shili himbi khutukha.

³³ Munjila indala yeneyo, lwa muliitsa khulola vindu yivi viosi nivikholekhanga, nalwo lwa muliitsa khumanya ndi inyinga yakhava himbi khutukha.

³⁴ Muvoolelanga kilikali ndi vindu yivi viosi viliitsa khwikholekha likhula yili liosi lia vandu vali mwoyo nunundi nilishili khurulaho.

³⁵ Likulu nende lilova viliitsa khurulaho, navutswa makhuva kaanje kaliitsa khuvula khurulaho.

Mundu Avulakhuho Wamanya Litukhu Inoho Isaa

³⁶ “Mundu avulakhuho wamanya litukhu, inoho isaa, khali tsinjelosi tsiu mwikulu, inoho Mwana; navutswa Tata wonyene neye wamanya.

³⁷ Khuli kikholekha mumatukhu ka Nuhu, nindio khandi Mwana wu Mundu aliitsa khwitsa.

³⁸ Mumatukhu ka imbula yi michelelo chia matsi yali nishili khukhuva, vandu valia nivang'wa. Vandu vasatsa nende vakhali vahilana, khutukha khulitukhu lia Nuhu yinjila mu liaro;

³⁹ khandi vali vakorwa katsitsanga khwikholekha michelelo chia matsi nichishili khwitsa khuvahilana. Nindio khandi kaliitsa khwikholekha lwa Mwana wu Mundu aliitsa khwitsa.

⁴⁰ Vandu vavili valiitsa khuva nivahinzilanga mu mulimi; mulala aliitsa khuvukulwa na wundi khulekhwa inyuma.

⁴¹ Vakhali vavili valiitsa khuva nivasietsanga vusi khu lichina liu khusielelakhu; mulala aliitsa khuvukulwa na wundi khulekhwa inyuma.

⁴² “Khulwa yako, muheenzeshitsi, shichila mwakorwa litukhu liu Mwami wenyu aliitsa khwitsa.

⁴³ Navutswa khutukha mumanye ndi niiva mwene inzu yakhamanyi isaa shina ya shihuuvi shitsanga, yakhaheenzeshitsi vuchila khulekha inzu yeye khupomolwa.

⁴⁴ Khulwa yako, mwirecheshe, shichila Mwana wu Mundu aliitsa khwitsa isaa yamwakorwa.

Murumishi Musuuvilwa Inoho Wambakhana khuva Musuuvilwa

⁴⁵ “Ni viina murumishi uli musuuvilwa khandi uli nu vusitsa? Nu murumishi wu muruchi wewe yaha vunyali vu khusinjilila vandu vi inzu yeye, khuvaha shia valia mumatukhu kenyekhanga.

⁴⁶ Niiva muruchi aliitsa khukalukha khandi anyole murumishi nakholanga ndio, murumishi mwenoyo alanyola murungu.

⁴⁷ Muvoolelanga kilikali ndi muruchi woyo aliitsa khumuha vunyali vu khusinjilila miandu chiechie chiosi.

⁴⁸ Navutswa niiva murumishi mwenoyo nu mutamanu, khandi akanakane navoola, ‘Muruchi wanje ucheleve khukalukha,’

⁴⁹ maraanje khushuta varumishi veshie, khandi khulia nu khung'wa halala na vatandi;

⁵⁰ muruchi wu murumishi mwenoyo aliitsa khukalukha khulitukhu liu murumishi mwenoyo yakorwa khandi isaa ya yakorwa.

⁵¹ Muruchi mwenoyo aliitsa khumusalilitsa, khandi amure havundu halala na vandu vikhola kholanga khuva valunji. Vandu valiitsa khulililayo nu khwikhula.