MATAYO 23 - IBIBILIA INDAKATIFU MU LUTIRICHI LWITAKHO NENDE LWISUKHA

Lichelihitswa khu Vechitsi va Malako nende Vafarisayo

¹ Yesu yalomoloma khu vituma via vandu nende veechi veve navoola,

² “Vechitsi va Malako nende Vafarisayo navo vali nu vunyali vukhwivaala vulahi vwene Malako ka Musa.

³ Khutukha mukhole khandi mulonde shia shindu shiosi shia vamuvoolela mukhole. Navutswa muvuli khukhola ka vo vene vakholanga; shichila vayambakhana khulonda milwatso kavo.

⁴ Vatiukhanga vandu khu mikongo chiavo misiko militoho, chia vakhanyala khuchinga; navutswa khali vo vene shivanyala khuvakhonya khuchinga tawe.

⁵ Vakholanga vikholwa viavo viosi khu vandu va valole. Vivohanga tsikhanda tsia vahandikakhu Mahandiko Matakatifu, kandi khu vweni khandi khu makhono kavo. Vanavila mikoye miraambi chia mayeveyeve khu tsinguvu tsiavo;

⁶ vayaanza khwikhala havundu hali nu luyali mu milukha chi lilia khandi mu visoko vilahi viene mu masinagogi.

⁷ Vayaanza khuheelwa milembe na vandu mu tsisokoni, khandi khulaangwa ‘Mwechitsi’ na vandu.

⁸ Navutswa muvuli khulaangwakhu nu mundu wosi ‘Mwechitsi’, shichila muli nu mwechitsi mulala wonyene, khandi munyi voosi muli vasuuvili.

⁹ Muvuli khulaangakhu mundu mu shivala shinu ‘Tata’, shichila muli na Tata wenyu mulala wonyene uli mwikulu.

¹⁰ Inoho muvuli khulaangwakhu nu mundu ‘Mwimilili’, shichila muli nu mwimilili wenyu mulala wonyene, naye ni Masiha.

¹¹ Mundu ulolekhanga khuva mukali muno mu munyi khutukha ave murumishi wenyu.

¹² Mundu wikalihitsanga mwene aliitsa khuchehitswa; khandi woyo wichehitsanga mwene aliitsa khukalihitswa.

Yesu Yavakaya Valeshe Khwikhola kholitsa

¹³ “Munyi veechitsi va Malako nende Vafarisayo muli khu vutiinyu muno! Munyi vamwikhola kholanga khuva valunji! Mwikalilanga vandu khwinjila mu Vwami vu mwikulu, navutswa khali munyi vene mwakhaywa khwinjilamu, inoho khali shiumuheetsanga vandu vachelitsanga khwinjila vwiyangu vukhwinjilamu tawe. [

¹⁴ Munyi veechitsi va Malako nende Vafarisayo, muli khu vutiinyu muno! Munyi vamwikhola kholanga khuva valunji! Mwihonelanga tsingo tsia vakhutsakhali, numwikhola musaalanga lisaala liraambi. Khulwa yako, muliitsa khusalilitswa vutamanu muno shichila kenako,]

¹⁵ “Munyi veechitsi va Malako nende Vafarisayo, muli khu vutiinyu muno, shichila mwikhola kholanga khuva valunji! Lwa mwambukhanga tsinyanza khandi numuchenda khu mihaanda khuchelitsa khukhava mundu mulala unyala khulonda idini yenyu. Lwa mumunyolanga, mumulombanga ava hali khavili mwana utushili khwinjila mu shihatisi khuli munyi vene muli.

¹⁶ “Munyi vimilili va vandu vavekhu, muli khu vutiinyu muno! Mwechitsanga, numuvoola, ‘Niiva mundu aliitsa khwisuuha khuvirila khu Litempeli, khwisuuha khwenokho shishili shindu tawe; navutswa niiva mundu aliitsa khwisuuha khuvirila khu itsahabu yi Litempeli, khwisuuha khwekhwe khumuvohi.’

¹⁷ Munyi vandu vavekhu vasilo! Shindu shiavira shindi ni shina, itsahabu inoho Litempeli lilombanga itsahabu khuva indakatifu?

¹⁸ Muvoolelanga khandi, ‘Niiva mundu aliitsa khwisuuha khu vwaali, khwisuuha khwenokho shishili shindu tawe; navutswa niiva aliitsa khwisuuha khu shihanwa shili khu vwaali, khwisuuha khwekhwe khumuvohi.’

¹⁹ Munyi vandu vavekhu! Shindu shiavira shindi ni shina, shihanwa inoho vwaali vulombanga shihanwa khuva shitakatifu?

²⁰ Khulwa yako, mundu wisuuhanga khu vwaali, yisuuhanga khu vwaali khandi khu vindu viosi vili khuvwo.

²¹ Mundu wisuuhanga khu Litempeli, yisuuhanga khulio khandi khu Nyasaye, uli mwoyo mulio;

²² khandi mundu wisuuhanga khu likulu, yisuuhanga khu shisoko shiu Vwami vwa Nyasaye, khandi khu woyo wikhalanga khu shisoko shienesho.

²³ “Munyi veechitsi va Malako nende Vafarisayo, muli khu vutiinyu muno! Munyi vamwikhola kholanga khuva valunji! Muhaananga khu Nyasaye shitonye shienyu shi likhomi shi itsaka yu vulimi vuhuunyanga mwayu mulahi, vimuli, ni vinzali nende kumini, khandi mwachaya khulonda tsimbavasi khandi khuva ni lisuuvila; kenyekhanga muve numukholanga yaka vuchila khwambakhana khulonda kandi.

²⁴ Munyi vimilili va vandu vavekhu! Mukhunganga inji mu shia mung'wetsanga, navutswa mumiilanga ingamia!

²⁵ “Munyi veechitsi va Malako nende Vafarisayo, muli khu vutiinyu muno, shichila mwikhola kholanga khuva valunji. Mwochitsanga ilwanyi wi shikombe nende isahani, navutswa mukari mwene mwayitsula vindu via mwanuula vandu numuviira khandi via mwiyenyela vene.

²⁶ Yivi Mufarisayo muvekhu! Raanga khwochitsa mukari mwi shikombe nende isahani, khu khali ilwanyi vive vinihu.

²⁷ “Munyi veechitsi va Malako nende Vafarisayo, muli khu vutiinyu muno! Mwikhola kholanga khuva valunji! Muli khuli vilindwa viavekhwa ilaanji indavu, vilolekhanga khuva vinihu ilwanyi, navutswa mukari mwene, mwayitsula vikuumba via vandu vakhutsa khandi vindu viosi vitamanu.

²⁸ Munjila indala yeneyo, mulolekhanga khu vandu khuva valahi, navutswa mu mioyo chienyu mwayitsula vwikhola kholitsi vu khuva valunji nende vwoni.

Yesu Yavoola Kushili Khuli Valisalilitswa

²⁹ “Munyi veechitsi va Malako nende Vafarisayo, muli khu vutiinyu muno! Munyi vamwikhola kholanga khuva valunji! Mumbashilanga vaprofeti vilindwa vilahi khandi musiaya vilindwa via vandu vamenyanga limenya liu vulunji,

³⁰ numuvoola, ‘Niiva khwakhamenyi mumatukhu ka vakuuka veru, shiukhwali khwakhola khuli vo vakhola lwa viira vaprofeti tawe.’

³¹ Khulwa yako, munyi vene muhuchililanga ndi muli vitsukhulu va vandu viira vaprofeti!

³² Mutsililile khurweshitsa muhinzilu kwa vakuuka venyu varaanjitsa.

³³ Munyi vamuli khuli tsinzukha khandi khuli vaana vi tsinzukha! Musuuvilanga munyala khwihonolokha khuvula khukhalachilwa khutsia mu shihatisi?

³⁴ Khulwa yako, muvoolelanga ndi niitsa khumurumila vaprofeti, vandu vu vusitsa nende veechitsi. Muliitsa khwiira valala khuvo, khuvamba vandi, khushuta vandi mu masinagogi kenyu nu khuvakhunga khurula mu mataala koosi.

³⁵ Shisahi shia vandu vi likhola liu vulunji shia mwasuundula mu shivala shinu shive khu munyi, khuraanjila khu Abili yiirwa wali navula vutamanu vwosi vwa yali niyakhola khutukha khu Zakaria mwana wa Barakia, wa mwiriila mu Litempeli hakari wu vwaali nende Havundu Hatakatifu.

³⁶ Muvoolelanga kilikali ndi vandu vi likhula linu valiitsa khusalilitswa, shichila vindu viakholekha vienevo.

Yesu Yayaanza Yerusalemi

³⁷ “Yivi litaala likali lia Yerusalemi! Litaala likali lia Yerusalemi! Wiiranga vaprofeti nu khulesa na machina vandu va Nyasaye akhurumilanga! Hali khanga ninjelitsanga khuvunjelitsa halala vandu vovo voosi, khuli ingokho ivunjelitsanga viminyoli viayo mu tsimbaha tsiayo; navutswa yivi wambakhananga!

³⁸ Khali lolakhu khuli Litempeli liolio lialekhwa shikhaya khandi liarikala lielie.

³⁹ Khuvoolelanga ndi khuraanjila nunundi, utsitsanga khuvula khundolakhu inzi nushili khuvoola, ‘Nyasaye akasitse woyo witsanga khuvirila mu lira liu Mwami.’ ”