MATAYO 22 - IBIBILIA INDAKATIFU MU LUTIRICHI LWITAKHO NENDE LWISUKHA

Lukanu khu Mulukha kwi Shiselelo

¹ Yesu yalomoloma khuvo khuvirila mu tsinganu navoola,

² “Vwami vu mwikulu vuli khuli ndi. Litukhu lindi, khwaliho nu mwami walombela mwana wewe shiselelo shiu khuhilana.

³ Yaruma varumishi veve khutsia khuvoolela vacheni valaangwa mushiselelo shiu khuhilana, navutswa vambakhana khwitsa.

⁴ Yaruma khandi varumishi vandi vatsi khuvoola, ‘Vooleli vacheni valaangwa, nzirecheshitsi mulukha kwanje khwililia; khandi sinzi tsichilishi tsianje nende vimoli vianje viakhomeela, khandi vindu viosi virecheshe; hambi mushiselelo shiu khuhilana.’

⁵ navutswa vacheni valaangwa vachaya, nivatsia khu vwavo vene: mulala yatsia mu mulimi kwekwe, wundi natsia muliduka lielie;

⁶ yavo vali nivarikale vakumila varumishi veve, nivavashuta, manivaviira;

⁷ mwami yali nu vurima; khandi naruma vasikali veve, niviira viiri venavo khandi nivasamba litaala liavo likali.

⁸ Khulwa yako, yavoolela varumishi veve, ‘Mulukha kwanje kwi lilia li shiselelo shiu khuhilana kwirecheshe, navutswa vandu va nalaanga shivatushili tawe.

⁹ Simushi mutsi wa tsinjila tsiavukhanilanga khandi mulaanje vandu vanyishi vamunyola vitsi mushiselelo shianje shiu khuhilana.’

¹⁰ Varumishi venavo vasimukha nivatsia mu tsinjila, khandi nivavunjelitsa vandu voosi va vanyola, valahi nende vatamanu; inzu yu mulukha kwi lilia li shiselelo shiu khuhilana yitsula vandu vanyishi.

¹¹ “Navutswa lwa mwami yinjilamu khuheenza vacheni, yalolamu mundu wali navula tsinguvu tsi shiselelo shiu khuhilana;

¹² namureeva, ‘Mulina, unyolekhane ndina munu vuchila tsinguvu?’ Yavula shindu shiosi shianyala khuvoola;

¹³ mwami yavoolela varumishi, ‘Muvohi makhono nende vilenje, ma mumusiuvi ilwanyi mu shisuundi; havundu halilila nu khwikhula.’ ”

¹⁴ Yesu yamalila navoola, “Vandu vanyishi valaangwa, navutswa ni vatititi navo varovolwa.”

Lireevo khu Lirunga Vushuru

¹⁵ Vafarisayo vasimukha nivarulaho manivaloshitsa khuli vanyala khureeka Yesu na mareevo.

¹⁶ Varuma khu Yesu valala khu veechi vavo, halala na vandu vu mukaanda kwa Herode. Vavoola, “Mwechitsi, Khwamanya ndi ulomolomanga kilikali. Wechitsanga katoto khu mundu khulondokhana khu lienya lia Nyasaye, vuchila khuheenda mwoyo khu ka vandu vakanakananga, shichila shikakhuheenditsanga niiva mundu ali nu vukhonyi inoho avula tawe.

¹⁷ Khuvoolele, khuli lwa ukanakananga? Malako keru kahuchililanga khurunga vushuru khu Mwami wa Roma inoho khuleshe khurunga?”

¹⁸ Navutswa Yesu, shichila yali umanyi khuli vakanakananga vutamanu, yareeva, “Munyi vamwikholakholanga khuva valunji! Munjelitsanga shichila shina?

¹⁹ Manyinyikhu isenti yu khurunga vushuru.” Vamulerela isenti yeneyo.

²⁰ Nalwo lwa Yesu yavareeva, “Likoondo nende lira lili khu isenti yili ni lia viina?”

²¹ Vamuchipa, “Ni liu Mwami wa Roma.” Yesu yavavoolela, “Nu vulahi, runji khu Mwami wa Roma viu Mwami wa Roma, ma murunji khu Nyasaye via Nyasaye.”

²² Lwa vahulila ndio, vachenya; vamulekha nivarulaho.

Lireevo khu Lisimushitsa Khurula mu Likhutsa

²³ Khulitukhu lienelo, Vasadukayo valala vatsia khu Yesu, nivavoola ndi vandu valiitsa khuvula khwisimukha khurula mu likhutsa.

²⁴ Vavoola, “Mwechitsi, Musa yavoola ndi niiva mundu aliitsa khukhutsa vuchila khwivulakhu mwana wosi, amwavo wewe alakalushitsa mukhutsakhali mwenoyo, nu khwivula khuye vaana, vamwavo wewe wakhutsa yali wivula.

²⁵ Khwaliho na vamwavo saba vamenyanga hanu; mukhulundu mwene yahila, nakhutsa vuchila khwivulakhu mwana wosi. Khulwa yako, yaleshela amwavo wewe mukhutsakhali mwenoyo.

²⁶ Malala mele kikholekha khu wa khavili, wa khavaka, khandi khu varikale voosi.

²⁷ Lukhumalilikha lwene, mukhutsakhali mwenoyo yakhutsa.

²⁸ Khulwa yako, khulitukhu liu khwisimukha khurula mu likhutsa, mukhutsakhali mwenoyo aliitsa khuva mukhali wa viina? Vamwavo saba voosi vali vamuhila khuli mukhali wavo.”

²⁹ Navutswa Yesu yavachipa, “Mukorelwi, shichila mushili khumanyakhu ka Mahandiko Matakatifu kavoolanga inoho tsingulu tsia Nyasaye.

³⁰ Lwa vandu vakhutsa valiitsa khwisimukha khurula mu likhutsa, valiitsa khuva khuli tsinjelosi tsiu mwikulu khandi shivaliitsa khuhilana tawe.

³¹ Makhuva khulondokhana khu vandu vakhutsa khwisimukha khurula mu likhutsa, mushili khusomakhu ka Nyasaye yamuvoolela munyi? Yavoola,

³² ‘Ninzi Nyasaye wa Aburahamu, Nyasaye wa Isaka, khandi Nyasaye wa Yakobo’? Shiali Nyasaye wa vandu vakhutsa tawe, navutswa ni Nyasaye wa vandu vashili mwoyo.”

³³ Lwa shituma shia vandu vahulila ndio, vachenyinywa na mechitso keke.

Lilako Likali Liene

³⁴ Navutswa lwa Vafarisayo vahulila ndi Yesu uchipi Vasadukayo vulahi muno, vivunjelitsila halala.

³⁵ Mulala khuvo, wali nali mwechitsi wa Malako yamureeva lireevo yili khumuchelitsa:

³⁶ “Mwechitsi, lilako shina lili likali liene mu Malako koosi?”

³⁷ Yesu yachipa, “‘Uyaanze Mwami Nyasaye, uli Nyasaye wowo nu mwoyo kwokwo kwosi, ni tsingulu tsiotsio tsiosi khandi ni tsinganakani tsiotsio tsiosi.’

³⁸ Yili nalio liu khuraanga khandi likali liene mu Malako koosi.

³⁹ Lia khavili lili khuli lio: ‘Uyaanze mureende wowo khuli mwene wiyaanza.’

⁴⁰ Malako ka Musa koosi nende mechitso ka vaprofeti kali mu malako kavili yaka.”

Lireevo khu Masiha

⁴¹ Lwa Vafarisayo vali nivivunjelitsi halala, Yesu yavareeva,

⁴² “Ni shina shia mukanakananga khulondokhana khu Masiha? Nu mwitsukhulu wa viina?” Vamuchipa, “Nu mwitsukhulu wa Daudi.”

⁴³ Yesu yavavoolela, “Khu, shichila shina Roho yimilila Daudi namulaanga ‘Mwami’? Daudi yavoola,

⁴⁴ ‘Mwami Nyasaye yavoolela Mwami wanje, yikhala hanu khuluveka lu mukhono kwanje musatsa, khutukha lwa khukuurila vatsiku vovo.’

⁴⁵ Daudi yamulaanga ‘Mwami’; khu, Masiha anyala khuva ndina mwitsukhulu wa Daudi?”

⁴⁶ Mundu avulakhuho wachipakhu Yesu; khandi khurula khulitukhu lienelo, mundu avulakhuho wachelitsa khumureevakhu lireevo liosi.