MATAYO 20 - IBIBILIA INDAKATIFU MU LUTIRICHI LWITAKHO NENDE LWISUKHA

Vahinzili mu Mulimi kwi Misabibu

¹ “Vwami vu mwikulu vunyala khusasanyinywa khu mundu mwene mulimi kwi misabibu, warula nu kushili mu mavwevwe khutsia khusamulitsa vandu vu khukhola muhinzilu mu mulimi kwekwe kwi misabibu.

² Lwa yahuchilitsana navo khuvarunga idinari khulitukhu, yavaruma khukhola mihinzilu mu mulimi kwekwe kwi misabibu.

³ Yasimukha himbi tsisaa tsivaka natsia musokoni wa yalola vandu valala nivasinjiliyo vuchila shindu shia vakholanga;

⁴ navavoolela, ‘Munyi simushi mutsi khandi khukhola muhinzilu mu mulimi kwi misabibu. Niitsa khumurunga murungu mulahi.’

⁵ Khulwa yako, vasimukha nivatsia. Yasimukha natsia khandi himbi tsisaa sita nende tsisaa tisa, nakhola malala mele.

⁶ Himbi tsisaa likhomi nindala yasimukha natsia khandi nalola vandu vandi nivasinjile; navareeva, ‘Shichila shina musinjile hanu khulitukhu liosi vuchila shia mukholanga?’

⁷ Vamuchipa, ‘Mundu avulakhuho wakhusamulitsa khukhola muhinzilu?’ Yavavoolela, ‘Munyi simushi mutsi khandi khukhola muhinzilu mu mulimi kwanje kwi misabibu.’

⁸ “Lwa khulukolovo khwatukha, mwene mulimi kwi misabibu yavoolela mwimilili wasinjililanga varumishi veve, ‘Laanga vahinzili khuvarunga mirungu chiavo, khuraanjila khu yavo vasamulitswa vukhumalilikha khutukha khu vu khuraanga.’

⁹ Vahinzili vali nivraanji khukhola mihinzilu tsisaa likhomi nindala varungwa shia mulala idinari indala.

¹⁰ Vahinzili vali vu khuraanga khusamulitswa vitsa, nivasuuvilanga valiitsa khunyola murungu munyishi khuvira vandi; navutswa vanyola shia mulala idinari indala khuli vandi vali nivanyoli.

¹¹ Lwa vachinyola varaanga khwililila khu mwene mulimi,

¹² nivavoola, ‘Vahinzili vukhumalilikha yava vahinzili isaa indala yonyene; navutswa yivi uvalekhanyinyi khu khutsi vakhuhinzili nu khuchemulila khulitukhu liosi khandi mbasu nu kukhusamba.’

¹³ “Navutswa yachipa mulala khuvo, ‘Mulina, mbulakhu shindu shitamanu shia khukholele; shiukhwahuchilitsana vavili khurungwa idinari indala?

¹⁴ Vukula murungu kwokwo, usimushi utsi. Ndovole khuha mundu wu khumalilikha uyu murungu mulala mwele khuli khuheele.

¹⁵ Mukanakananga mbula vunyali vu khukhola ka nyenyanga ni tsisenti tsianje? Inoho undolele imbotokha shichila ndi mundu mulahi?’

¹⁶ Vandu vukhumalilikha valiitsa khuva vu khuraanga, khandi vu khuraanga valiitsa khuva vukhumalilikha.”

Yesu Yalomoloma lwa Khavaka khu Likhutsa Lielie nende Lisimushitswa

¹⁷ Lwa Yesu yali natsitsanga Yerusalemi, yasuunda haluveka veechi veve likhomi na vavili nalomoloma navo muvwivisi. Lwa vali nivali khunjila,

¹⁸ yavavoolela, “Hulishitsi, khutsitsanga Yerusalemi, wa Mwana wu Mundu atsitsanga khuhaanwa khu vasalisi vakali nende veechitsi va Malako. Navo vatsitsanga khumukhalachila likhutsa

¹⁹ nu khuhaanwa khu vandu vi tsimbia tsindi khukholelwa shihenye henye, khushutwa nu khumuvamba; navutswa matukhu kavaka nikakhavira, aliitsa khwisimushitswa khurula mu likhutsa.”

Lienya lia Mama wa Yakobo nende Yohana

²⁰ Nalwo lwa mukhali wa Zebedayo yasimukha natsia khu Yesu, halala na vaana veve vi shiyayi vavili, nasikama imbeli wewe, namureeva amukholele ka yenyanga.

²¹ Yesu yamureeva, “Ni shina shia wenyanga khukholele?” Yamuchipa, “Suuvilitsa ndi vaana vaanje vavili yava valiitsa khwikhala mulala khuluveka lu mukhono kwokwo musatsa khandi khuluveka lu mukhono kwokwo mukhali lwa uliitsa khuva mu vwami vwovwo.”

²² Yesu yavachipa, “Mukorelwi shiamureevanga. Munyala khung'wa mu shikombe shi linyakhana shiandi himbi khung'wamu?” Vamuchipa, “Khunyala.”

²³ Yesu yavavoolela, “Ni kilikali, muliitsa khung'wa mu shikombe shianje shi linyakhana, navutswa mbula vunyali vu khurovola woyo uliitsa khwikhala khuluveka lu mukhono musatsa kwanje khandi khuluveka lu mukhono mukhali kwanje. Nyasaye neye uliitsa khuhaana vwiyangu vwenovo khu vandu vayarovola.”

²⁴ Lwa veechi vandi likhomi vahulila ndio, valolela vurima Yakobo nende Yohana.

²⁵ Khulwa yako, Yesu yavalaanga halala voosi navavoolela, “Mwamanya ndi vandu vatushili khuva vamihi va vandu vi tsimbia tsindi vali nu vunyali khuvo; khandi vimilili vavo vali nu vunyali khuvo.

²⁶ Yaka kavuli khwikholekha kario mu munyi. Niiva mulala khu munyi yenyanga khuva mukali, khutukha ave murumishi wa vandi voosi;

²⁷ khandi niiva mulala khu munyi yenyanga khuva wu khuraanga, khutukha ave murukwa wenyu voosi.

²⁸ Khali Mwana wu Mundu, shikali yitsa khurumishilwa tawe, navutswa khurumikha, khandi khukhutsa khu vandu vanyishi valivohololwa khurula mu vwoni vwavo.”

Yesu Yahonyinya Vandu Vavekhu Vavili

²⁹ Lwa Yesu nende veechi veve vali nivarulanga mu litaala lia Yeriko, shituma shikali shia vandu vamulonda.

³⁰ Vandu vavekhu vavili vali nivikhale khundulu khu muhaanda, vahulila Yesu aviranga himbi khuvo, nivaraanga khulaanjilila nivavoola, “Mwami, Mwitsukhulu wa Daudi, khuvele tsimbavasi!”

³¹ Shituma shia vandu vavakondeshela, khandi nivavoolela vahonjele; navutswa vavekhu venavo valaanjilila ikulu muno, “Mwami, Mwitsukhulu wa Daudi, khuvele tsimbavasi!”

³² Yesu yasinjila navalaanga; navareeva, “Ni shina shia mwenyanga mukholele?”

³³ Vamuchipa, “Mwami, khwenyanga tsimoni tsieru tsilole.”

³⁴ Yesu yavalolela tsimbavasi, natiila khu tsimoni tsiavo. Valola ni tsimoni tsiavo vwangu, nivamulonda.