MATAYO 2 - IBIBILIA INDAKATIFU MU LUTIRICHI LWITAKHO NENDE LWISUKHA

Vacheni Khurula Ivukwi

¹ Yesu yivulwa mu litaala lia Betselehemu mu lusomo lwa Yudeya, mumatukha ku Mwami Herode yamihanga. Mumatukhu kenako, vandu vu vusitsa vatukha mu Yerusalemi nivarula ivukwi, nivareeva,

² “Ali hena mwana wivulwi uliitsa khuva Mwami wa Vayahudi? Shichila khuloli inyining'ini yeye ivukwi, khandi khwitsi khusaala khuye.”

³ Lwa Mwami Herode yahulila ndio, yanyakhana vululu muno, halala na vandu voosi mu Yerusalemi.

⁴ Herode yalaanga halala vasalisi vakali nende veechitsi va Malako, navareeva, “Ni hena ha Masiha aliitsa khwivulwa?”

⁵ Vachipa, “Aliitsa khwivulwa mu litaala lia Betselehemu, mu lusomo lwa Yudeya; shichila nako ku muprofeti yahandika:

⁶ ‘Yivi litaala lia Betselehemu, mu lusomo lwa Yuda, shiuli litaala litititi khu mataala makali mu lusomo lwa Yuda tawe; shichila mwimilili aliitsa khunyolekha mu yivi uliitsa khwimilila vandu vaanje, Israeli.’ ”

⁷ Nalwo lwa Herode yalaanga halala muvwivisi vandu vu vusitsa vali nivaruli ivukwi, khandi narunishitsa khuvo tsisaa tsia inyining'ini yali niloleshe.

⁸ Yavaruma mu litaala lia Betselehemu navoola, “Simushi mutsi khurunishitsa vulahi vwene makhuva khulondokhana khu mwana mwenoyo. Numumali khumunyola, munderele likhuva nikanyalikha khali inzi nziyo khusaala khuye.”

⁹ Lwa vahulila makhuva ku Mwami Herode yali navavoolele, vasimukha nivatsia; khandi inyining'ini ya vali nivaloli ivukwi yavimilila nitsia nisinjila havundu ha mwana yali nali.

¹⁰ Lwa valola inyining'ini yeneyo, vali nu vuyaanzi vunyishi muno.

¹¹ Vinjila munzu, khandi lwa valola mwana na mama wewe Mariya, vinama hasi nivasaala khuye. Valera vihanwa viavo vi itsahabu, vubani, nende manemane, nivaha Yesu.

¹² Khulwa yako, vakalukha mu shivala shiavo khuvirila khu muhaanda kundi; shichila Nyasaye yavachelihitsa khuvirila mu malooro vavuli khukalukha khu Herode.

Khwilushila mu Shivala shia Misri

¹³ Lwa vali nivakharulaho, injelosi yu Mwami Nyasaye yalolekha khu Yosefu khuvirila mu malooro, nivoola, “Vukha uvukule mwana nende mama wewe mwilushi mutsi Misri, khandi mwikhaleyo khutukha lwa niitsa khumuvoolela muruliyo, shichila Herode akhavanga khwiira mwana.”

¹⁴ Yosefu yavukha mu vutukhu, navukula mwana halala na mama wewe, nivatsia Misri,

¹⁵ vamenyayo khutukha lwa Herode yakhutsa. Yaka kikholekha khurweshitsa makhuva ku Mwami Nyasaye yali niyavoola khuvirila mu muprofeti, “Ninzi walaanga Mwana wanje khurula Misri.”

Vaana Viirwa

¹⁶ Lwa Herode yamanya ndi vandu vu vusitsa vali nivaruli ivukwi vamukaati, yali nu vurima. Yahaana lilako liu khwiira ndi vaana voosi vi shiyayi mu litaala lia Betselehemu, nende mu lusomo lwenelo lwosi, vi mihika chivili khukalukha hasi hi mihika chivili. Yaka kikholekha khulondokhana khu ka yali niyechi khurula khu vandu vu vusitsa, tsisaa tsia inyining'ini yali niloleshe.

¹⁷ Makhuva ku Muprofeti Yeremia yali niyavoola karweshitswa munjila yiyi:

¹⁸ “Mwoyo kwahulilikhana Raama, khulila nu khwikhula vululu, Raheli alilanga vaana veve: Wambakhane khuleminywa mwoyo shichila vaana veve vakhutsa.”

Khukalukha Khurula Misri

¹⁹ Navutswa lwa Herode yali niyakhutsa, injelosi yu Mwami Nyasaye yalolekha khu Yosefu mu malooro nali Misri

²⁰ nivoola, “Vukha, vukula mwana nende mama wewe mukalushi mu shivala shia Israeli, shichila vandu venyanga khwiira mwana vamala khukhutsa khale.”

²¹ Khulwa yako, Yosefu yavukha navukula Mariya nende mwana wewe, nivakalukha mu shivala shia Israeli.

²² Navutswa lwa Yosefu yahulila likhuva ndi Akileosi wamihitswi khuva mwami wu lusomo lwa Yudeya, havukono ha Herode tata wewe, yaria khukalukhayo. Lwa yali namali khuchelihitswa khuvirila mu malooro, yilushila mu lusomo lwa Galilaya.

²³ Yasimukha natsia khumenya mu litaala lialaangwangwa Nazareti; khu ka vaprofeti vali nivavoola karweshitswi: “Aliitsa khulaangwa Munazare.”