MATAYO 18 - IBIBILIA INDAKATIFU MU LUTIRICHI LWITAKHO NENDE LWISUKHA

Ni viina Uli Mukali Muno mu Vwami vu Mwikulu?

¹ Mumatukhu kenako, veechi vatsia khu Yesu, nivareeva, “Ni viina uli mukali muno mu Vwami vu mwikulu?”

² Yesu yalaanga mwana mutititi, namuvoolela asinjile muvo;

³ navoola, “Muvoolelanga katoto ndi numukhakalukhana mwava khuli vaana vatititi, shiumuliitsa khwinjila mu Vwami vu Mwikulu tawe.

⁴ Mundu wichehitsanga khuli mwana mutititi uyu, neye uli mukali muno mu Vwami vu mwikulu.

⁵ Mundu uhuchililanga mwana mutititi khuli uyu khuvirila mu lira lianje, ahuchililanga khandi inzi.

Machelitso Kachilanga Nukhukhola Vwoni

⁶ “Niiva mundu alachila mulala khu vatititi vasuuvilanga mwinzi yava khukhola vwoni, vwakhavele vulahi mundu mwenoyo khusungwa lichina lukali liu khusielakhu mwing'ori mwemwe, nu khusiuvwa mu inyanza.

⁷ Vandu vu mu shivala shinu vali khu vutiinyu muno shichila khuliho ni vindu vichilanga vandu nivakhola vwoni! Vindu khuli vienevo khutukha vikholeshe, navutswa mundu wa machelitso kanyolekhelakhu ali khu vutiinyu muno!

⁸ Niiva mukhono kwokwo inoho shilenje shioshio shilachila ukhole vwoni, kutuula usiuvi ihale wene. Nu vulahi khwinjila mu vulamu nu wafwokoya inoho nu walema khuvira khuva ni mikhono chivili nende vilenje vivili, musiuvwi mu mulilu kwi mihika ni mihika.

⁹ Niiva imoni yoyo ilachila ukhole vwoni, chisomole uchisiuvi ihale wene. Nu vulahi khwinjila mu vulamu ni imoni indala, khuvira khuva ni tsimoni tsivili musiuvwi mu shihatisi shiu mulilu.

Lukanu khu Likondi Liakora

¹⁰ “Muchelitsi mulole muvuli khulechelitsa khali mulala khu vatititi yava; muvoolelanga ndi tsinjelosi tsiavo mwikulu tsili shia khase khosi imbeli wa Tata wanje uli mwikulu. [

¹¹ Mwana wu Mundu yitsa khuhonyinya vandu vakora.]

¹² “Ni shina shia mukanakananga? Niiva mundu ali na makondi imia indala, ma lilala khuko likore, shianyala khulekha makondi makhomi tisa na tisa mu vikulu, khutsia khukhava likondi likoria lienelo.

¹³ Niiva alalinyola, muvoolelanga katoto ndi aliitsa khuva nu vuyaanzi vunyishi muno shichila likondi linyoleshe lienelo khuvira yako makhomi tisa na tisa kakhakora tawe.

¹⁴ Khali ndio, Tata wenyu uli mwikulu shiyenyikhu khali mulala khu vatititi yava akore tawe.

Khuli Ukhola Musuuvili woshio Ukhukholele Vwoni

¹⁵ “Niiva musuuvili woshio aliitsa khukhukholela vwoni, simukha utsi khuye ma umuvoolele vutamanu vwevwe, yivi nende ye vonyene. Niiva alakhuhulila, uliitsa khuva numurulitsi mu vwoni.

¹⁶ Navutswa niiva aliitsa khwambakhana khukhuhulishitsa, vukula mundu mulala inoho vandu vandi vavili nivi, khuli Mahandiko Matakatifu kavoolanga, ‘Vandu vavili inoho vavaka valiitsa khuva vashiahidi vovo khu shia likhuva liosi livoolwa.’

¹⁷ Niiva aliitsa khwambakhana khuvahulishitsa, ulahila makhuva kenako mu likanisa. Niiva aliitsa khwambakhana khuhulila khandi khali likanisa, leshi ave vutswa khuli mundu urulanga mu vandu vi tsimbia tsindi tsiosi inoho musololi wu vushuru.

Khwambakhana nende Khuhuchilila

¹⁸ “Muvoolelanga katoto ndi shindu shiosi shia mwavoha mu shivala, shilitsa khuvohwa mwikulu, khandi shindu shiosi shia mwatehitsa mu shivala, shilitsa khutehitswa mwikulu.

¹⁹ “Muvoolelanga khandi ndi niiva vavili khu munyi valahuchilitsana khulilova khunu khulondokhana khu shia shindu shiosi shia vareeva mu lisaala, Tata wanje uli mwikulu aliitsa khuvakholela khuli venyanga.

²⁰ Havundu ha vavili inoho vavaka vakanili halala khuvirila mu lira lianje, naho handi navo.”

Lukanu khu Murumishi Wambakhana Khusemeha Wundi

²¹ Nalwo lwa Petro yatsia khu Yesu, namureeva, “Mwami, ni hali khanga khasemeha musuuvili washianje ukholele vwoni? Khanyala khuva hali saba?”

²² Yesu yamuchipa, “Khuvoolelanga, shikali hali saba tawe, navutswa makhomi saba hali saba.

²³ “Khulwa yako, Vwami vu mwikulu vunyala khusasanyinywa khu mwami wali niyikombi khurunishitsa livishilu lielie na varumishi veve.

²⁴ Lwa yaraanga khurunishitsa livishilu lielie, mundu mulala yalerwa khuye wali ni likoovi lielie li tsitalenta tsiheelefu likhomi.

²⁵ Navutswa shichila yakhaywa khurunga, mwami wewe yahaana lilako liukhukuulitswa khuli murukwa, halala nu mukhali wewe nende vaana khandi shia shindu shiosi shia yali nali nashio; ma murungu kurunjwi.

²⁶ Murumishi mwenoyo yasikama imbeli wewe namusaya nayaanza, ‘Mwami, yikhutsile, nakhurunga likoovi liolio liosi.’

²⁷ Muruchi wewe yamuvela, namuleshela likoovi lienelo khandi namulakhula.

²⁸ “Khulwa yako, murumishi mwenoyo yasimukha natsia khandi niyakana nu mulala khu varumishi va vahinzilanga naye wali ni likoovi lielie tsidinari imia indala. Yamukwakhu naraanga khumumika mwing'ori navoola ni tsingulu, ‘Ndunga likoovi lianje.’

²⁹ Murumishi wa vahinzilanga naye mwenoyo yakwa hasi, namusaya nayaanza, ‘Yikhutsile, nakhurunga likoovi liolio!’

³⁰ Navutswa yambakhana; natsia khumuvoha mucheela khutukha lwa arunga likoovi lielie lienelo.

³¹ Lwa varumishi vandi va vahinzilanga naye valola kali nikakholeshe, valeka muno, nivatsia khuvoolelakhu muruchi wavo koosi kali nikakholeshe.

³² Nalwo lwa muruchi wewe yamulaanga namuvoolela, ‘Yivi murumishi mutamanu! Nakhuleshela likoovi lianje liosi, shichila wambolela khole ndio;

³³ shichila shina nukhavela tsimbavasi murumishi woshio, khuli inzi nakhuvela tsimbavasi?’

³⁴ Muruchi wewe yali nu vurima, nahila murumishi wambakhana khuvelakhu wundi tsimbavasi mwenoyo mucheela khusalilitswa khutukha lwa arunga likoovi liosi.”

³⁵ Yesu yamalila navoola, “Nindio khandi Tata wanje uli mwikulu aliitsa khukhola shia mulala khu munyi navuli khusemeha musuuvili weshie nu mwoyo kwosi.”