MATAYO 16 - IBIBILIA INDAKATIFU MU LUTIRICHI LWITAKHO NENDE LWISUKHA

Vafarisayo Vareeva Shiloleshitsu

¹ Vandu valala khu Vafarisayo nende Vasadukayo vatsia khu Yesu nivenyanga khumureeka. Vamureeva avakholele shiloleshitsu khurula mwikulu.

² Navutswa Yesu yachipa, “Lwa liuva liyeelanga, muvoolanga, ‘Khuliitsa khuva nu muheso mulahi, shichila malesi ni mamuuchi.’ [

³ Nukushili mu mavwevwe, muvoolanga, ‘Imbula ilakhuva litukhu linu, shichila malesi ni mamuuchi khandi ni mamwamu.’ Mwamanya vulahi khwivaala likalukhana lia malesi, navutswa shiumunyala khwivaala vimanyilu via matukhu kanu tawe.]

⁴ Vandu vi likhula lia matukhu kanu ni vooni, khandi vambakhananga khusuuvila Nyasaye! Mundevanga mwenyanga shiloleshitsu? Shikali kario tawe! Nikhali, shiloleshitsu shia muliitsa khuheelwa vutswa ni shiloleshitsu shia Yona.” Yesu yavalekha, narulaho.

Lichelihitswa khu Mechitso ka Vafarisayo nende Vasadukayo

⁵ Lwa veechi va Yesu vambukha, nivatukha khuluveka lundi lwi inyanza, vivilila khuchinga mukati.

⁶ Yesu yavavoolela, “Muheenze vulahi; khandi muve vacheli khu mamela ka Vafarisayo nende Vasadukayo.”

⁷ Veechi varaanga khureevana vene nivavoola, “Avoolanga ndio, shichila khwivilili khulerakhu mukati kwosi.”

⁸ Yesu yamanya ka vali nivavoolanga, navareeva, “Munyi vandu vi lisuuvila litititi! Shichila shina mwireevananga vene muvula mukati?

⁹ Khali mushili khumanyakhu shindu shiosi? Mushili khwitsushitsakhu lwa natong'olanyinya mikati chiranu khu vandu vasatsa tsiheelefu tsiranu, mwavunjelitsa mihinda chianga nichitsuli shiukhulia shiarikala?

¹⁰ Inoho mikati saba khu vandu tsiheelefu tsine, khandi mwavunjelitsa mihinda chianga nichitsuli shiukhulia shiarikala?

¹¹ Shichila shina numuvula khumanya ndi shimbele ninomolomanga khu munyi khulondokhana khu mukati tawe? Muve vacheli khu mamela ka Vafarisayo nende ka Vasadukayo.”

¹² Khulwa yako, veechi veve vamanya ndi Yesu shiyavavoolela vave vacheli khurula khu mamela kalombanga mukati tawe; navutswa khurula khu mechitso ka Vafarisayo nende Vasadukayo.

Petro Yavoola Havulavu Yesu Neye Masiha

¹³ Lwa Yesu yatukha mu lusomo luli himbi mu litaala lia Kaisaria Filipi, yareeva veechi veve, “Vandu vavoolanga Mwana wu Mundu ni viina?”

¹⁴ Veechi veve vamuvoolela, “Valala vavoolanga ni Yohana Mubatisi; vandi vavoolanga ni Eliya; na vandi vavoolanga ni Yeremia, inoho mulala khu vaprofeti.”

¹⁵ Yesu yavareeva, “Na munyi muvoolanga ninzi viina?”

¹⁶ Simoni Petro yachipa, “Uli Masiha, Mwana wa Nyasaye uli mwoyo.”

¹⁷ Yesu yamuvoolela, “Simoni mwana wa Yona! Uli ni ikhaavi, shichila katoto yaka shiukanyoli khurula khu vandu tawe; navutswa Tata wanje uli mwikulu neye ukhuvoolele vulunji.

¹⁸ Petro, khuvoolelanga ndi uli khuli lwanda; khandi khu lwanda lu musinji yulu numbakhakhu likanisa lianje; khali likhutsa linyala khuvula khulikuura.

¹⁹ Niitsa khukhuha tsifungu tsiu Vwami vu mwikulu; khandi shindu shiosi shia uliitsa khuvoha khulilova shilitsa khuvohwa mwikulu; khandi shindu shiosi shiuliitsa khutehitsa khulilova shilitsa khutehitswa mwikulu.”

²⁰ Khulwa yako, Yesu yakaya veechi veve vavuli khuvoolelakhu mundu wosi ndi ye ni Masiha.

Yesu Yalomoloma khu Linyakhana Lielie nende Likhutsa

²¹ Khuraanjila mumatukhu kenako, Yesu yaraanga khuvoolela havulavu veechi veve, “Khutukha nzi Yerusalemi, wa vasakhulu, vasalisi vakali nende veechitsi va Malako vanyashitsa muno. Niitsa khwiirilwayo, navutswa matukhu kavaka nikakhavira niitsa khwisimushitswa khurula mu likhutsa.”

²² Petro yamuhila haluveka naraanga khumukondeshela, navoola, “Mwami, Nyasaye akhulinde! Yaka shikatsitsanga khwikholekha khu yivi tawe.”

²³ Navutswa Yesu yishevukha navoolela Petro, “Shetani, rula khwinzi! Uli shisikaritsu khwinzi; shichila vindu viukanakananga shivirulanga khu Nyasaye tawe; navutswa virulanga khu vandu!”

²⁴ Nalwo lwa Yesu yavoolela veechi veve, “Niiva mundu yenyanga khunonda, khutukha yileshitsi liiva lielie, achinji musalaba kwekwe, manonde.

²⁵ Mundu wenyanga khuhonyinya vulamu vwevwe aliitsa khuvukoritsa; navutswa woyo wenyanga khukoritsa vulamu vwevwe shichila inzi, aliitsa khuvuhonyinya.

²⁶ Nu vukhala shina vu mundu anyala khunyola, niiva alakuura shivala shiosi, navutswa akoritsi vulamu vwevwe? Inoho ni shina shiu mundu anyala khuhaana, anyole khandi vulamu vwevwe?

²⁷ Mwana wu Mundu aliitsa khwitsa halala ni tsinjelosi tsietsie mu vukhumi vwa Tata wewe; khandi aliitsa khurunga shia mulala shihanwa khulondokhana khu vikholwa vievie.

²⁸ Musuuvilitsanga ndi khuli na vandu valala hanu valiitsa khuvula khukhutsa nivashili khulola Mwana wu Mundu niyitsanga mu vwami vwevwe.”