MATAYO 13 - IBIBILIA INDAKATIFU MU LUTIRICHI LWITAKHO NENDE LWISUKHA

Lukanu lu Mumitsi

¹ Khulitukhu lienelo, Yesu yarula munzu, natsia niyikhala khuluchinga lwa matsi.

² Vituma via vandu vikali vikhala himbi khuye. Yinjila mu liaro niyikhalamu, shituma shia vandu voosi nivasinjile khuluchinga lwi inyanza.

³ Yesu yavavoolela vindu vinyishi khuvirila mu tsinganu, navoola: “Litukhu lindi, mumitsi yasimukha natsia khumitsa vukuutsa mu mulimi kwekwe.

⁴ Lwa yali namitsanga, vukuutsa vulala vwakwa khunjila; manyonyi kitsa nikavuvootsa.

⁵ Vukuutsa vundi vwakwa khu lwanda, ha lilova liali litititi; khandi vwameela vwangu shichila lilova shiliali linyishi tawe.

⁶ Lwa mbasu kwakha kwasamba viraakwa vienevo, maniviniala shichila miili shichiali chiatsia hasi tawe.

⁷ Vukuutsa vundi vwakwa mu mavwa, ma mavwa kameela nikavutsoma.

⁸ Vukuutsa vundi vwakwa mulilova linuulu nuvwama tsi imu, vulala imia indala, vundi makhomi sita, khandi vundi nuvwama makhomi kavaka.

⁹ Numuli na maroyi ku khuhulila, muhulishitsi.”

Shivune shiu Khurumishila Tsinganu

¹⁰ Khulwa yako, veechi vatsia khu Yesu, nivamureeva, “Shichila shina ulomolomanga khu vandu khuvirila mu tsinganu?”

¹¹ Yesu yavachipa, “Munyi mwaheelwa vucheli vu khumanya makhuva khulondokhana khu vindu viaviswa mu Vwami vu mwikulu, navutswa vo shivaheelwa vucheli vwenovo tawe.

¹² Mundu uli ni shindu aliitsa khumeetwa, ave navio mu vunyishi; navutswa mundu uvula shindu shiosi, khali shiakanakananga ali nashio aliitsa khunuulwa.

¹³ Nashio shivune shichilanga ninomoloma khuvo khuvirila mu tsinganu, shichila khali niiva valiitsa khuheenza valiitsa khuvula khulola; khandi niiva valiitsa khuhulishitsa, valiitsa khuvula khuhulila inoho khumanya.

¹⁴ Khulwa yako, vuprofeti vwarula khu Muprofeti Isaya vwavoola makhuva khulondokhana khuvo: Nyasaye avoolanga, ‘Ni kilikali, valiitsa khuhulishitsa, navutswa valiitsa khukhaywa khumanya; valiitsa khuheenza navutswa valiitsa khuvula khulola;

¹⁵ shichila vwoongo vwavo vwalindala, khandi maroyi kavo kayikala, khandi vavekhula tsimoni tsiavo, nikakhavele kario, tsimoni tsiavo tsiakhaloli, maroyi kavo kakhahulili, vwoongo vwavo vwakhamanyi, vakhakalushi khwinzi, khu vahonyinyi.’

¹⁶ “Navutswa munyi, muli ni ikhaavi shichila mulolanga ni tsimoni tsienyu khandi muhulilanga na maroyi kenyu.

¹⁷ Muvoolelanga kilikali ndi vaprofeti vanyishi nende vandu vi likhola liu vulunji vanyishi vikombanga muno khulola kamulolanga yaka, navutswa vakhaywa khukalola; khandi khuhulila kamuhulilanga yaka, navutswa shivakahulilakhu tawe.

Yesu Yivala Lukanu lu Mumitsi

¹⁸ “Hulishitsi, khandi mweche shia lukanu lu mumitsi luvoolanga.

¹⁹ Lwa mundu ahulilanga likhuva khulondokhana khu Vwami, khandi akorwa khumanya, Mutamanu Woyo yitsanga amunuula shiali ni shiaraakwa mu mwoyo kwekwe. Yuvu navwo vukuutsa vwamitswa khunjila.

²⁰ Vuukutsa vwakwa khu lwanda, navo vandu vahulilanga likhuva nivasangala vwangu.

²¹ Navutswa likhaywangwa khwinjila mukari mu mioyo chiavo; khandi shivanyala khuhindila tawe. Lwa vanyolanga vutiinyu inoho vatambitswa shichila likhuva, vakhutsanga mwoyo vwangu.

²² Vukuutsa vwakwa mu mavwa, navo vandu vahulilanga likhuva; navutswa khuheenda mwoyo shichila vulamu yuvu nende lienya liu khuva vahinda liononyinyanga likhuva; khandi shivanyala khwama matunda tawe.

²³ Vukuutsa vwamitswa mulilova lilahi, navo vandu vahulilanga likhuva khandi valimanya; vamanga matunda, valala mu vunyishi mumia, vandi makhomi sita, na vandi makhomi kavaka.”

Lukanu khu Mavanze

²⁴ Yesu yavavoolela lukanu lundi: “Vwami vu mwikulu vunyala khusasanyinywa khu mundu wamitsa vukuutsa vulahi mu mulimi kwekwe;

²⁵ navutswa lwa vandu voosi vali nivakonanga, mutsiku yitsa namitsa mavaanze mu inganu, niyilukha;

²⁶ khu, lwa viraakwa viameela niviama vukuutsa, khali mavaanze kalolekhamu khandi.

²⁷ Varumishi vu mwene mulimi vitsa nivamuvoolela, ‘Mwami, shiuwamitsa vukuutsa vulahi mu mulimi kwokwo? Shichila shina mavaanze kalimu?’

²⁸ Yachipa, ‘Mutsiku neye wakhola kenako.’ Varumishi vamuvoolela, ‘Khu, wenyanga khutsi khurinyuli mavaanze?’

²⁹ Navutswa yavachipa, ‘Shikali kario tawe; shichila numurinyuula mavaanze mulihilamu inganu.

³⁰ Leshi viosi inganu nende mavaanze vimeelele khulala khutukha mulichesa. Mumatukhu kukhuchesa niitsa khuvoolela vachesi: ranji muchese mavaanze mamukavohe halala mu vituma kasambwi; khandi muvunjelitsi inganu muchilere mu shiachi shianje.’ ”

Lukanu khu Lukutsa Luti Muno

³¹ Yesu yavavoolela lukanu lundi: “Vwami vu mwikulu vuli khuli lukuutsa lutititi muno, lwa mundu yavukula namitsa mu mulimi kwekwe;

³² nalwo nu lutititi muno khuvira vukuutsa vundi vwosi, navutswa nu lwakhameela nu lukali muno khuvira viraakwa vindi viosi. Lukwitsa musala, ma manyonyi kitsa, kumbakha vitsu viako mu tsisia tsiakwo.”

Lukanu khu Mamela

³³ Yesu yavavoolela khandi lukanu lundi: “Vwami vu mwikulu vuli khuli mamela ka mukhali yavukula natsukanyinya mutsilita makhomi kane tsiu vusi khutukha lwa shinokho shiosi shiavimba.”

Shivune Shiachila Yesu Nalomolomela Mutsinganu

³⁴ Yesu yavoolela vituma via vandu makhuva yaka koosi khuvirila mu tsinganu. Avulakhu shindu shiosi shia yalomoloma khuvo vuchila khurumishila tsinganu.

³⁵ Yesu yakhola kenako koosi khurweshitsa ku muprofeti yali niyavoola, “Niitsa khulomoloma khu munyi khuvirila mu tsinganu; niitsa khuvavoolela shindu shiaviswa khurula shivala nishiloongwa.”

Mivaalo khu Lukanu lwa Mavaanze

³⁶ Yesu yalekha shituma shia vandu, niyinjila munzu; ma veechi veve nivatsia khuye nivavoola, “Khuvoolele ka lukanu khulondokhana khu mavaanze mu mulimi luvoolanga.”

³⁷ Yesu yavachipa, “Mundu wamitsa vukuutsa vulahi neye Mwana wu Mundu;

³⁸ mulimi navo vandu vu mu shivala; vukuutsa vulahi navo vandu vu mu Vwami; mavaanze navo vandu vu Mutamanu Woyo;

³⁹ khandi mutsiku wamitsa mavaanze neye Ibilisi; lichesa nalio shiheeli shi lilova; khandi vachesi navo tsinjelosi.

⁴⁰ Khuli mavaanze kavunjelitswangwa makasambwa mu mulilu, nindio khandi kaliitsa khukholekha mumatukhu ki shiheeli.

⁴¹ Mwana wu Mundu aliitsa khuruma tsinjelosi tsietsie; na tsiliitsa khuvunjelitsa khurula mu Vwami vwevwe shia mundu wosi uchilanga vandi nivakhola vwoni; khandi yavo voosi vakholanga vindu vitamanu,

⁴² mavasiuvwi mu mulilu mululu kwi lijiko; mwa vandu valiitsa khulila nu khwikhula.

⁴³ Vandu vi likhola liu vulunji valiitsa khwakha khuli liuva mu Vwami vwa Tata wavo. Numuli na maroyi ku khuhulila, muhulishitsi.

Lukanu khu Livishilu Liaviswa

⁴⁴ “Vwami vu mwikulu vuli khuli livishilu liaviswa mu mulimi, lia mundu yanyola manavisa; khandi shichila vuyaanzi vwali navwo atsitsanga akuulitsa vindu viosi viali navio makuula mulimi kwenoko.

Lukanu khu Lichina Lilahi liu Vukuuli Vululu

⁴⁵ “Vwami vu mwikulu vuli khandi khuli mundu wu kholanga vukhala akhavanga machina malahi ku vukuuli vululu,

⁴⁶ khandi niyakhakanyola atsitsanga akuulitsa vindu viosi viali navio, makuula machina malahi ku vukuuli vululu kenako.

Lukanu khu Ineti

⁴⁷ “Vwami vu mwikulu vuli khandi khuli ineti ya valuvi vasiuva mu inyanza khukumila tsisutsi lukanu na lukanu.

⁴⁸ Lwa ineti yeneyo yitsula tsisutsi, valuvi venavo vachisiuva khuluchinga, nivikhala hasi; khandi nivaraanga khutolamu tsisutsi tsindahi nivara mu misiko; navutswa nivasiuva tsindamanu.

⁴⁹ Khulwa yako, nindio khandi kaliitsa khwikholekha mumatukhu ki shiheeli. Tsinjelosi tsiliitsa khwitsa khura haluveka vandu vooni khurula mu valunji,

⁵⁰ nu khuvasiuva mu mulilu mululu kwi lijiko; mwa vandu valiitsa khulilila nu khwikhula.”

Mechitso Mayia nende Mechitso Makhulu

⁵¹ Yesu yavareeva, “Munyala khuva muhulile tsinganu yitsi tsiosi?” Vamuchipa, “Khumali khutsihulila.”

⁵² Yavavoolela, “Shia mwechitsi wosi wa Malako wechitswa makhuva khulondokhana khu Vwami vu mwikulu anyala khusasanyinywa khu mwene inzu urulitsanga mu livishilu lielie vindu viyia nende vikhulu.”

Yesu Yambakhanwa Nazareti (Mk 6:1-6; Luka 4:16-30)

⁵³ Lwa Yesu yali namali khuvoola tsinganu tsienetso, yarula havundu henaho

⁵⁴ natsia mu litaala lili ingo wavo; yaveechitsa mu lisinagogi liavo; wa vandu vamuhulila nivali nilichenya, nivareeva, “Ni hena wa mundu uyu yanyola vusitsa nende tsingulu tsiu khukhola viloleshitsu yivi?

⁵⁵ Uyu shiali neye mwana wu mufundi? Mama wewe shiali Mariya? Vamwavo veve shivali navo Yakobo, Yosefu, Simoni nende Yuda?

⁵⁶ Vambotso veve shivali hanu na khutsi? Ni hena wa mundu uyu yanyola vindu yivi viosi?”

⁵⁷ Khulwa yako, vambakhana Yesu. Yesu yavavoolela, “Muprofeti aheelwa luyali shia havundu hosi, navutswa shianyala khuheelwa luyali mu litaala liarulamu khandi mu vandu vi inzu yeye tawe.”

⁵⁸ Yalekha khukhola viloleshitsu vinyishi iweneyo, shichila vandu venavo vambakhana khusuuvila.