MATAYO 10 - IBIBILIA INDAKATIFU MU LUTIRICHI LWITAKHO NENDE LWISUKHA

Varumwa Likhomi na Vavili va Yesu

¹ Yesu yalaanga halala veechi veve likhomi na vavili; navaha vunyali vu khukhunga matimoni, nu khuhonyinya vulwale vwosi vunyishi lukanu.

² Mira ka varumwa likhomi na vavili nako yaka: wu khuraanga yali Simoni (walaangwangwa Petro) na amwavo wewe Andereya; Yakobo nende amwavo wewe Yohana, nivali vaana va Zebedayo;

³ Filipu nende Batsolomeyo; Tomasi nende Matayo, wasololanga vushuru; Yakobo mwana wa Alufayo, nende Tadayo;

⁴ Simoni wakwanilanga shivala shieshie, nende Yuda Isikarioti, wamanya natsama Yesu.

Muhinzilu kwa Varumwa Likhomi na Vavili

⁵ Yesu yaruma varumwa veve likhomi na vavili na mivaalo yaka: “Muvuli khutsiakhu mu lusomo lwa vandu vi tsimbia tsindi, inoho khwinjila mu litaala liosi mu mataala ka Vasamaria.

⁶ Navutswa khutukha mutsi khu Vaisraeli, vali khuli makondi kakora.

⁷ Simushi mutsi mwilwatse numuvoola, ‘Vwami vu mwikulu vuli himbi khutukha!’

⁸ Muhonyinyi vandu valwala, mwisimushitsi vandu vakhutsa khurula mu likhutsa, muhonyinyi vandu valwala vuchele, numukhunga matimoni. Munyoli vuchila khurunga, muhaane vuchila khurungwa.

⁹ Muvuli khuchinga mu visikolo vienyu itsahabu, ifetsa, inoho tsisenti;

¹⁰ muvuli khuchinga musiko ku khusumilamu khu luchendo inoho inguvu yindi inoho vilaaro hali khavili inoho indovoshi yu khuchendela. Muhinzili khutukha aheelwi shiukhulia shialia.

¹¹ “Lwa muliitsa khwinjila mu litaala inoho mu muchitsi, khavimu mundu wenyanga khumwinjilitsa, mumenye naye khutukha lwa muliitsa khurulamu.

¹² Lwa muliitsa khwinjila munzu khutukha muhaane milembe khu vandu vu munzu mwenomo.

¹³ Niiva vandu vu munzu mwenomo valiitsa khumwinjilitsa, leshi milembe chienyu chive navo; navutswa niiva valiitsa khwambakhana khumwinjilitsa, vavuli khunyola milembe chienyu.

¹⁴ Niiva mundu aliitsa khwambakhana khumwinjilitsa inoho khumuhulishitsa, mulasukuya lukuushi luli mu vilenje vienyu, lwa muliitsa khurula munzu mwenomo inoho mu litaala lienelo.

¹⁵ Muvoolelanga kilikali ndi Khulitukhu liu Khukhalachilwa Nyasaye aliitsa khulolela tsimbavasi vandu vamenyanga mu mataala ka Sodomu nende Gomora tsinyishi khuvira vandu vi litaala lienelo!

Yesu Yavoolela Varumwa Veve Khuli Valiitsa Khutambitswa

¹⁶ “Muhulishitsi! Murumanga khutsia ilwanyi khuli makondi hakari hi visutsi. Muve vacheli khuli tsinzukha khandi vahoma khuli vituti.

¹⁷ Muheenze vulahi, shichila vandu valiitsa khumukumila nu khumuhila mushiina; khandi valiitsa khumushutila vivoko mu masinagogi.

¹⁸ Muliitsa khuhilwa mushiina imbeli wa vamihi nende vami, shichila lira lianje, khwilwatsa Ivanjeli khulondokhana khwinzi khandi khu vandu vi tsimbia tsindi.

¹⁹ Lwa valiitsa khumukumila, muvuli khuheendakhu mwoyo khulondokhana khuli mutsitsanga khulomoloma inoho khuli muliitsa khuvoola; shichila lwa isaa iliitsa khuva niyakhatukha, muliitsa khuheelwa kamuvoola.

²⁰ Makhuva ka muliitsa khulomoloma shikaliitsa khuva kenyu tawe; navutswa kaliitsa khurula khu Roho wa Tata wenyu ulomolomelanga mu munyi.

²¹ “Vandu valiitsa khutsama vamwavo vavo khutukha lwa valiitsa khwiirwa; khandi vatata valiitsa khukholela vaana vavo malala mele; vaana valiitsa khuhinjitsa vivuli vavo nu khuchila viirwi.

²² Vandu voosi valiitsa khumuhima shichila inzi; navutswa mundu uliitsa khuva mwitsumishitsi khutukha lukhumalilikha aliitsa khuhonyinywa.

²³ Lwa valiitsa khumutambitsila mu litaala lilala, mwilushile mu litaala lindi. Muvoolelanga kilikali ndi Mwana wu Mundu aliitsa khwitsa numushili khukhalakanyila mu mataala koosi ka Israeli.

²⁴ “Musomi avulakhuho unyala khuva mukali khuvira mwechitsi wewe inoho murukwa khuva mukali khuvira muruchi wewe.

²⁵ Khulwa yako, musomi anyala khuva khuli mwechitsi wewe, khandi murukwa ave khuli muruchi wewe. Niiva mwimilili wa vandu vi inzu alalaangwa Belezebuli, vandu vi inzu yeye yeneyo valiitsa khulaangwa mira matamanu kene?

Utushili Khuheelwa Luyali

²⁶ “Khulwa yako, muvuli khuria vandu venavo. Shindu shiosi shia khunikhwa shilitsa khukhunulwa; khandi shiosi shiaviswa shiliitsa khumanyikhana havulavu.

²⁷ Ka muvoolelanga mu shisuundi, muliitsa khukavoola havulavu; khandi ka muliitsa khuhulila nikamoonywangwa, muliitsa khukalanditsila mu visechese vi tsinzu.

²⁸ Muvuli khuria vandu viiranga mmbili, navutswa vavula vunyala vu khwiira mwoyo; nikhali muve vamuria Nyasaye, uli nu vunyali vu khutivitsila mwoyo nende mmbili mu shihatisi.

²⁹ Manyonyi ki viyundi kavili shikanyala khukuulitswa isenti indala? Khali lilala khuko livulakhuho linyala khukwakhu hasi nilikhali lienya lia Tata wenyu.

³⁰ Navutswa khali liswi liosi lili khu mirwi chienyu liavalitswa.

³¹ Khulwa yako, muvuli khuria. Muli nu vukuuli vukali muno khuvira viyundi vinyishi.

Khwiyama nende Khwambakhana Kristo

³² “Mundu uliitsa khunziyama imbeli wa vandu, khali inzi niitsa khumwiyama imbeli wa Tata wanje uli mwikulu;

³³ navutswa mundu uliitsa khunzambakhana imbeli wa vandu, niitsa khumwambakhana imbeli wa Tata wanje uli mwikulu.

Milembe Tawe, Navutswa Liihe

³⁴ “Muvuli khukanakanakhu namala khwitsa khulera milembe khu vandu khulilova; shikali niitsa khulera milembe tawe; navutswa shivavi.

³⁵ Namala khwitsa khulera vuhimwa hakari ha vaana nende vatata vavo, khandi vakhana nende vamama vavo; vakukhu vakhana nende va nakukhulu;

³⁶ khandi vatsiku vu mundu valiitsa khuva vandu varulanga mu inzu yeye mwene.

³⁷ “Mundu uyaanzanga tata wewe inoho mama wewe khumbira shiatushili khuva mwechi wanje tawe. Mundu uyaanzanga mwana wewe wi shiyayi inoho wi shikhana khumbira shiatushili khuva mwechi wanje tawe.

³⁸ Mundu wambakhananga khuchinga musalaba kwekwe, anonde shiatushili khuva mwechi wanje tawe.

³⁹ Mundu wenyanga khuhonyinya vulamu vwevwe, aliitsa khuvukoritsa; navutswa mundu ukoritsanga vulamu vwevwe shichila inzi, aliitsa khuvunyola.

Mirungu Shichila Khwinjilitsa Varumishi va Yesu

⁴⁰ “Mundu winjilitsanga munyi, anzinjilitsanga; khandi woyo unzinjilitsanga, yinjilitsanga woyo wanduma.

⁴¹ Mundu winjilitsanga muprofeti, shichila nu muprofeti aliitsa khunyola murungu ku muprofeti yenyekhanga anyole; khandi mundu winjilitsanga mundu wi likhola liu vulunji, shichila nu mundu wi likhola liu vulunji aliitsa khunyola murungu ku mundu wi likhola liu vulunji yenyekhanga anyole.

⁴² Mundu uliitsa khuhaakhu mulala khu vatititi yava shikombe shia matsi kashindi shichila nu mwechi wanje, muvoolelanga kilikali ndi aliitsa khunyola murungu kwekwe.”