MATAYO 1 - IBIBILIA INDAKATIFU MU LUTIRICHI LWITAKHO NENDE LWISUKHA

Lwivulu lwa Yesu Kristo

¹ Yishi ni shitabu shiu lwivulu lwa Yesu Kristo, mwitsukhulu wa Daudi, nali mwitsukhulu wa Aburahamu.

² Aburahamu yivula Isaka, Isaka niyivula Yakobo; Yakobo niyivula Yuda na vamwavo veve.

³ Yuda yivula khu Tamara, vaana Perezi nende Zera. Perezi yivula Hezironi, Hezironi niyivula Raama.

⁴ Raama yivula Aminadabu, Aminadabu niyivula Nahashoni; Nahashoni niyivula Salumoni.

⁵ Salumoni yivula Boazi khu Rahabu, ma Boazi niyivula khu Rutsi Obedi. Obedi yivula Yese,

⁶ Yese niyivula Mwami Daudi, wivula Solomoni khu mukhali wali wa Uria.

⁷ Solomoni yivula Rehobohamu; Rehobohamu niyivula Abiya. Abiya yivula Asa,

⁸ Asa niyivula Yehoshafati. Yehoshafati yivula Yoramu; Yoramu niyivula Uzia.

⁹ Uzia yivula Yotsamu; Yotsamu niyivula Ahazi. Ahazi yivula Hezekia,

¹⁰ Hezekia niyivula Manaase. Manaase yivula Amoni; Amoni niyivula Yosia.

¹¹ Yosia yivula Yehoyakini na vamwavo veve, mumatukhu ka Vaisraeli vahilwa mu vuhaambe Babilonia.

¹² Lwa vali nivakharula mu vuhaambe Babilonia: Yehoyakini yivula Shalitieli, Shalitieli niyivula Zerubabeli.

¹³ Zerubabeli yivula Abihudi, Abihudi niyivula Eliakimu. Eliakimu yivula Azori,

¹⁴ Azori niyivula Zadoko. Zadoko yivula Achimu, ma Achimu niyivula Eliudi.

¹⁵ Eliudi yivula Eliazari, ma Eliazari niyivula Matsani. Matsani yivula Yakobo;

¹⁶ Yakobo niyivula Yosefu, wali musatsa wa Mariya, wivula Yesu, ulaangwangwa Masiha.

¹⁷ Makhula koosi khurula khu Aburahamu khutukha khu Daudi kali likhomi na kane. Khurula khu Daudi khutukha khulihilwa mu vuhaambe Babilonia khwali na makhula likhomi na kane; khandi khurula khulihilwa mu vuhaambe Babilonia khutukha khulivulwa lia Masiha khwali na makhula likhomi na kane.

Livulwa lia Yesu Kristo

¹⁸ Nindi livulwa lia Yesu Kristo liali. Mama wewe walaangwangwa Mariya yali waselelwa na Yosefu, navutswa nivashili khuhilana, yanyolekha ndi wavelekha mwana khuvirila mu tsingulu tsia Roho Mutakatifu.

¹⁹ Yosefu yali mundu wi likhola liu vulunji khandi yambakhana khuha Mariya tsisoni havulavu. Yakanakana khuli anyala khumulekha muvwivisi.

²⁰ Lwa yali nashikanakananga ndio, injelosi yu Mwami Nyasaye yalolekha khuye khuvirila mu malooro nivoola, “Yosefu, mwitsukhulu wa Daudi, lekha khuhila Mariya khuva mukhali wowo; shichila wavelekha mwana khuvirila mu tsingulu tsia Roho Mutakatifu.

²¹ Mariya aliitsa khwivula mwana wi shiyayi, nivi uliitsa khumukulikha lira Yesu, shichila aliitsa khuhonyinya vandu veve khurula mu vwoni vwavo.”

²² Yaka koosi kikholekha khurweshitsa ku Mwami Nyasaye yali niyavoola khuvirila khu muprofeti:

²³ “Loli! Mwana wi shikhana muchima aliitsa khuvelekha nu khwivula mwana wi shiyayi. Aliitsa khukulikhwa lira Imanuweli” (kavoolanga, “Nyasaye ali na khutsi.”)

²⁴ Lwa Yosefu yavukha mu tsindolo, yahila Mariya nava mukhali wewe, khuli injelosi yu Mwami Nyasaye yali nimuvoolele akhole.

²⁵ Navutswa Yosefu yambakhana khukona naye nashili khwivula mwana wewe. Yosefu yamukulikha lira Yesu.