MARIKO 9 - IBIBILIA INDAKATIFU MU LUTIRICHI LWITAKHO NENDE LWISUKHA

¹ Yesu yavavoolela khandi, “Muvoolelanga kilikali ndi vandu valala vasinjile hanu valiitsa khuvula khukhutsa, nivashili khulola vwami vwa Nyasaye nu vwitsanga ni tsingulu.”

Likoondo lia Yesu Liakalukhana

² Matukhu sita nikakhavira, Yesu yavukula Petro, Yakobo nende Yohana, navimilila khutsia khu shikulu shiraambi, wa vali vonyene. Lwa vali nivashiheenzanga, likoondo lia Yesu liakalukhana,

³ tsinguvu tsietsie nitsiang'ang'a muno -- vulavu vu mundu wosi mu shivala shiyakhanyali khufuya ndio tawe.

⁴ Veechi vavaka venavo valola Eliya nende Musa nivalomolomanga na Yesu.

⁵ Petro yavoolela Yesu, “Mwechitsi, nu vulahi khuli hanu! Khumbashe matiili kavaka, lilala liolio, lindi lia Musa, na lindi lia Eliya.”

⁶ Petro nende veshie vali nilichenya, khali nivakorwa shia vanyala khuvoola.

⁷ Khulwa yako, malesi kalolekha nikavakhunikha, ma mwoyo nu kurula mu malesi nu kuvoola, “Uyu neye Mwana wanje wa nayaanza, mumuhulishitsi!”

⁸ Lwa vaheenza shivalolakhu mundu wundi wosi tawe; navutswa Yesu wonyene.

⁹ Lwa vali nivakholomokhanga hasi khurula khu shikulu, Yesu yavaha lilako, “Muvuli khuvoolelakhu mundu wosi kamuloli, Mwana wu Mundu nashili khwisimukha khurula mu likhutsa.”

¹⁰ Valonda lilako lielie, navutswa varaanga khwireevana vene khuvene, “Khwisimukha khurula mu likhutsa nu khuvoola shina?”

¹¹ Vareeva Yesu, “Shichila shina veechitsi va Malako vavoolanga ndi Eliya aliitsa khuraanga khwitsa mbilio?”

¹² Yesu yavachipa, “Ni kilikali, Eliya aliitsa khuraanga khwitsa khurecheshitsa vindu viosi khuli viavetsanga. Navutswa shichila shina Mahandiko Matakatifu kavoolanga Mwana wu Mundu aliitsa khunyakhana muno nu khwambakhanwa?

¹³ Navutswa muvoolelanga ndi Eliya wamali khwitsa khale, khandi vamukhola koosi ka venyanga, khuli Mahandiko Matakatifu kavoolanga khulondokhana khuye.”

Yesu Yahonyinya Mwana vi Shiyayi wa Litimoni Liali Muye

¹⁴ Lwa Yesu nende veechi va yali navo vatukha ha veechi vandi vali nivali, valola shituma shikali shia vandu ni va vavotokhane, khandi veechitsi va Malako ni vahangalitsananga navo mulilomoloma.

¹⁵ Lwa vandu valola Yesu, vali nilichenya muno, nivilukhaka khutsia khumwakanila nu khumuha milembe.

¹⁶ Yesu yareeva veechi veve, “Ni shina shia muhangalitsana navo mulilomoloma?”

¹⁷ Mundu mulala mu shituma shia vandu yavoola, “Mwechitsi, khulerele mwana wanje wi shiyayi, shichila litimoni lili muye, khandi shianyala khulomoloma tawe.

¹⁸ Shia khase khosi lwa litimoni lienelo limwinjililanga, limusiuvanga hasi, maraanga khuvimba lihuulu mu munwa, amenena miino keke, khandi yuuma vutswa. Mbolele veechi vovo vakhunji litimoni lienelo, navutswa shivanyali khulikhunga tawe.”

¹⁹ Yesu yavavoolela, “Munyi vandu vamukhali vasuuvilwa! Mwenyanga mbe na munyi khutukha luhono shina? Mwenyanga nzikhutsili khutukha lina? Ndereli mwana mwenoyo!”

²⁰ Khulwa yako, vamulera khu Yesu. Lwa litimoni lialola vwangu Yesu, liasiuva mwana mwenoyo hasi, nashinda, nakalakala khandi lihuulu niliraanga khuvimba mu munwa.

²¹ Yesu yareeva tata wu mwana wi shiyayi mwenoyo, “Nuluhono shina khurula nava ndio?” Yamuchipa, “Khurula niyivulwa.

²² Shia khase khosi litimoni liachelitsanga khumwiira nu khumusiuva mu mulilu nende mu matsi. Khulolele tsimbavasi khandi ukhukhonye, niiva unyala!”

²³ Yesu yavoola, “Niiva unyala! Shia shindu shiosi ni shitoro khu mundu uli ni lisuuvila.”

²⁴ Khulwa yako, tata wu mwana wi shiyayi mwenoyo yalaanjilila vwangu navoola, “Ndi ni lisuuvila, navutswa ni litititi; khonya mbe nalio linyishi!”

²⁵ Lwa Yesu yalola shituma shia vandu nivisuundanga himbi khuvo, yakondeshela litimoni lienelo. Yavoola, “Yivi litimoni liu vusilu nende vuvekhu, khukondeshelanga uruli mu mwana uyu khandi uvuli khukalukha muye!”

²⁶ Litimoni liayula ikulu, nililomba mwana mwenoyo nashinda, nilirula muye. Mwana vi shiyayi mwenoyo yasasa khuli umali khukhutsa; ma mundu wosi navoola, “Umali khukhutsa!”

²⁷ Navutswa Yesu yakumila mukhono ku mwana wi shiyayi mwenoyo, namukhonya khusinjila, nasinjila.

²⁸ Lwa Yesu yali niyakhinjila munzu, veechi veve vamureeva muvwivisi, “Shichila shina nu khuvula khukhunga litimoni?”

²⁹ Yesu yavachipa, “Litimoni lukanu lwenolo shilinyala khukhungwa vuchila lisaala tawe.”

Yesu Yalomoloma khandi khu Likhutsa Lielie

³⁰ Yesu nende veechi veve varula havundu henaho nivatsia khukhalakanyila mu lusomo lwa Galilaya. Yesu shiyenya mundu wosi amanye wa yali nali tawe,

³¹ shichila yali niyechitsanga veechi veve. Yavavoolela, “Mwana wu Mundu aliitsa khuhaanwa khu vandu valiitsa khumwiira, navutswa matukhu kavaka nikakhavira, aliitsa khwisimukha khurula mu likhutsa.”

³² Navutswa vakorwa khumanya ka mechitso kenako kavoolanga; nivaria khumureeva.

Ni Viina Uli Mukali Muno mu Vwami vwa Nyasaye

³³ Vatukha mu litaala lia Kaperenamu. Lwa Yesu yali nali munzu, yareeva veechi veve, “Ni shina shia mushelenyinyi numuli khu muhaanda?”

³⁴ Navutswa vahonjela vutswa, shichila nivali khu muhaanda vali nivashelenyinyi vene khuvene ndi ni viina uli mukali muno muvo.

³⁵ Yesu yikhala hasi, nalaanga veechi veve likhomi na vavili, navavoolela, “Mundu wenyanga khuva wu khuraanga, aliitsa khuva wu khumalilikha khu voosi; khandi aliitsa khuva murumishi wa vandu voosi.”

³⁶ Khulwa yako, Yesu yavukula mwana mutititi, namusinjilitsa imbeli wavo. Yamukhumbelela navavoolela,

³⁷ “Mundu winjilitsanga mulala khu vaana khuli yava khuvirila mu lira lianje, anzinjilitsanga; khandi mundu unzinjilitsanga, shikali anzinjilitsanga wonyene tawe, navutswa khali woyo wanduma.”

Woyo Ukhahingananga na Khutsi nu Weru

³⁸ Yohana yavoolela Yesu, “Mwechitsi, khuloli mundu nakhunganga matimoni khuvirila mu lira liolio, nu khumuvoolela aleshe, shichila shiali mulala khu shituma shieru tawe.”

³⁹ Yesu yavavoolela, “Mukhachelitsi khumukaya tawe, shichila mundu avulakhuho unyala khukhola shiloleshitsu khuvirila mu lira lianje, khandi alomolome vindu vitamanu khulondokhana khwinzi.

⁴⁰ Mundu ukhahingananga na khutsi nu weru.

⁴¹ Musuuvilitsanga ndi mundu uliitsa khumuha matsi ku khung'wa, shichila muli veechi vaanje, ni kilikali aliitsa khunyola murungu kwekwe.

Machelitso Kachilanga Nukhukhola Vwoni

⁴² “Niiva mundu alachila mulala khu vatititi yava akhole vwoni khandi yambakhane khusuuvila mwinzi, vwakhavele vulahi mundu mwenoyo nasunjilwi ni lichina likali mwing'ori mwemwe, nu khusiuvwa mu inyanza.

⁴³ Khulwa yako, niiva mukhono kwokwo kulachila ukhole vwoni, kutuula! Nu vulahi khwinjila mu vulamu vuchila mukhono, khuvira khuva ni mikhono chiosi chivili nu khusiuvwa mu shihatisi, wa mulilu kukhatsimanga tawe. [

⁴⁴ ‘Havundu ha tsinyende tsivaliitsanga tsikhakhutsanga, khandi mulilu kuvasambanga kukhatsimanga tawe.’]

⁴⁵ Niiva shilenje shioshio shilachila ukhole vwoni, shikhalache! Nu vulahi khwinjila mu vulamu vuchila shilenje shilala, khuvira khuva ni vilenje vivili viosi nu khusiuvwa mu shihatisi. [

⁴⁶ Havundu ha ‘tsinyende tsivaliitsanga tsikhakhutsanga, khandi mulilu kuvasambanga kukhatsimanga tawe.’]

⁴⁷ Niiva imoni yoyo ilachila ukhole vwoni, chisomole! Nu vulahi khwinjila mu Vwami vwa Nyasaye nuli nimoni indala, khuvira khuva ni tsimoni tsivili tsiosi nu khusiuvwa mu shihatisi.

⁴⁸ Havundu ha ‘tsinyende tsivaliitsanga tsikhakhutsanga, khandi mulilu kuvasambanga kukhatsimanga tawe.’

⁴⁹ “Shia mundu wosi aliitsa khukholwa khuva munihu khuvirila mu mulilu khuli musango kulungwangwa nu munyu.

⁵⁰ “Munyu nu mulahi; navutswa niiva kulakoritsa shinochi shiakwo, wakhakulomba munjila shina kuve munyu khandi? “Muve khuli munyu khandi muyaanzane vene khuvene, mamumenye mu milembe shia mulala nu weshie.”