MALAKI 4 - IBIBILIA INDAKATIFU MU LUTIRICHI LWITAKHO NENDE LWISUKHA

Litukhu liu Khukhalachilwa

¹ Mwami Nyasaye wi Mikaanda Chiliihe avoolanga, “Loli! Litukhu lili himbi khutukha, nalio liakhanga khuli mulilu mululu kwi lijiko. Vandu voosi vilola nende vatamanu valiitsa khuya khuli indakala. Khulitukhu lienelo, shia shindu shiosi shilitsa khulaalitswa nu mulilu vuchila khulekhakhu shindu shiosi munyuma.

² Navutswa munyi vamulondanga malako kaanje, tsingulu tsiu vuhonyinyi vwanje tsiliitsa khwikha khu munyi khuli liuva. Tsiliitsa khumulerela vuhonyinyi khuli vulavu vwi liuva vwakhanga. Muliitsa khuvohololwa khuli vimoli vitsalaanga ni viakhikura nivirulanga mu shitioli.

³ Khulitukhu lia niitsa khukhola shindu, muliitsa khutuuvachila hasi vandu vatamanu. Valiitsa khukwa khuli likooshe hasi hi vilenje vienyu. Inzi Mwami Nyasaye wi Mikaanda Chiliihe mali khuvoola.

⁴ “Mwitsushitse mechitso ku murumishi wanje Musa, mivaalo nende malako ka nali ninamuha ha Shikulu shia Horebu shichila Vaisraeli voosi.

⁵ “Loli, litukhu lianje likali khandi liu khurishitsa nilishili khutukha, niitsa khumurumila Muprofeti Eliya.

⁶ Muprofeti Eliya aliitsa khuhambanyinya vivuli nende vaana vavo, khali vaana nende vivuli vavo. Nikavuli khwikholekha kario, niitsa khwitsa nu khutivitsa shivala shienyu.”