MALAKI 3 - IBIBILIA INDAKATIFU MU LUTIRICHI LWITAKHO NENDE LWISUKHA

Murumwa Wenyekhanga Khwitsa

¹ Mwami Nyasaye wi Mikaanda Chiliihe avoolanga, “Loli! Ndumanga murumwa wanje imbeli wanje khunombela injila. Mwami Nyasaye wa mukhavanga, nonoho aliitsa khwitsa mu Litempeli lielie. Ni kilikali, murumwa wamulindililanga khulola, aliitsa khwitsa khwilwatsa lilakano lianje.”

² Navutswa ni viina uliitsa khwikhutsila khulitukhu lia aliitsa khwitsa? Ni viina uliitsa khusinjila ni tsingulu lwa aliitsa khulolekha? Shichila aliitsa khuva khuli mulilu kurumikhanga khusamba vivia khandi khuli isabuni yu khufuyila.

³ Aliitsa khwitsa khuli mukhalachi usambanga ifetsa nu khuchinihitsa. Aliitsa khunihitsa vaana va Levi, nivali vasalisi khuva khuli mundu usambanga itsahabu nende ifetsa khuchinihitsa, khu valihaana khu Mwami Nyasaye vihanwa vi likhola liu vulunji vitukhane.

⁴ Nalwo lwa vihanwa via vandu va Yuda nende Yerusalemi valeranga khu Mwami Nyasaye viliitsa khumuyaanzitsa, khuli mumatukhu kakhale khandi khuli kakholekhanga khumihika chiavira.

⁵ Mwami Nyasaye wi Mikaanda Chiliihe avoolanga, “Nalwo lwa niitsa khwitsa himbi khu munyi, khumukhalachila. Niitsa khuva mwangu khuhaana vushiahidi vwanje khulondokhana khu valoochi, khu vaheeyi, khu vandu visuuhanga mu vuvehi, khu vandu vambakhananga khurunga vahinzili mirungu chiavo chiatoto, khu vandu vatambitsanga vakhutsakhali nende vavisandu, khandi khu vandu vambakhananga khurweshitsila vandu vi tsimbia tsindi katoto, khali vambakhana khumba luyali.

Khuli Khukaatanga Mwami Nyasaye

⁶ “Ninzi Mwami Nyasaye, mbulakhu khuli nyala khukalukhana. Navutswa munyi vitsukhulu va Yakobo, mushili khutivitswa.

⁷ Khuraanjila mumatukhu ka vakuuka venyu, mwachaya mechitso kaanje, khali mwayambakhana khukalonda. Numuyaanza mukalushi khwinzi Mwami Nyasaye wi Mikaanda Chiliihe, ninzi nakalukha khu munyi. Navutswa munyi mureevanga, ‘Khunyala khukalukha ndina?’

⁸ Ni kilikali, mundu anyala khukaata Nyasaye? Khali ndio, munyi mungatanga! Navutswa muvoolanga, ‘Khumukaatanga munjila shina?’ Mungatanga shichila itsaka yenyu nende vihanwa vienyu.

⁹ Mwalaamwa shichila mungatanga; munyi vandu vuluhia lwosi munyala khuva mwalaamwa.

¹⁰ Leri itsaka yenyu yosi mu Litempeli lianje, khu khuvemu ni shiukhulia shinyishi. Njelitsikhu munjila yeneyo, mulole niiva nzitsanga khuvula khwikula matirisha ku mwikulu khandi mukasitsi ni vindu vilahi mu vunyishi muno.

¹¹ Niitsa khwikalila tsisichi khwononyinya viraakwa vienyu mu milimi. Misabibu chienyu mu milimi chiliitsa khwama matunda manyishi. Inzi Mwami Nyasaye wi Mikaanda Chiliihe mali khuvoola.

¹² Nalwo lwa vandu vi tsimbia tsiosi valiitsa khumulola mwakasitswa, shichila shivala shienyu shiliitsa khuva shivala shiu khuyaanzitsa. Inzi Mwami Nyasaye wi Mikaanda Chiliihe mali khuvoola.”

Lilaaka lia Nyasaye li Tsimbavasi

¹³ Mwami Nyasaye avoolanga, “Lilomoloma lienyu lia mulomolomanga ni lilitoho khwinzi. Khali ndio, munyi muvoolanga, ‘Ni shina shia khwavoola khulondokhana khu yivi?’ ”

¹⁴ Munyi muvoolanga, “Ni shikhaya khurumishila Nyasaye. Nu vukhala shina vwa khunyala khunyola, niiva khulalonda malako keke inoho khwitsa khuye nu khuvelele, khuli vandu vikhulanga nivakhutsilwi?

¹⁵ Navutswa vandu vali nu vwiloli, navo vakhuvukulanga khuva nu vuyaanzi. Shikali vandu vatamanu vanyolanga vuhinda vwonyene vutswa tawe, navutswa lwa vachelitsanga Nyasaye mu vikholwa viavo, nalwo lwa vihonolokhanga.”

¹⁶ Nalwo lwa vandu vaheetsanga Mwami Nyasaye luyali valomoloma vene na vene. Mwami Nyasaye yahulishitsa ka valomolomanga. Imbeli wu Mwami Nyasaye khwaliho ni shitabu shiahandikamu mira ka yavo vaheetsanga Mwami Nyasaye luyali, khandi vamwitsominyanga.

¹⁷ Yaka nako makhuva kahandikwamu: Mwami Nyasaye wi Mikaanda Chiliihe avoolanga, “Vandu venavo navo valiitsa khuva vaanje. Khulitukhu lia ni lienya khukhola shindu shia nganakananga, valiitsa khuva vaanje mwene. Niitsa khuvavela tsimbavasi khuli mundu avelanga vaana veve vamurumishilanga.

¹⁸ Nalwo khandi lwa vandu valiitsa khumanya vwavukhani vuliho hakari wu mundu wi likhola liu vulunji nende mutamanu, hakari ha mundu wurumishilanga Nyasaye, khandi mundu wambakhananga khumurumishila.”