MALAKI 2 - IBIBILIA INDAKATIFU MU LUTIRICHI LWITAKHO NENDE LWISUKHA

Vasalisi Vatoto nende vu Vuvehi

¹ Mwami Nyasaye wi Mikaanda Chiliihe avoolelanga vasalisi, “Munyi vasalisi, lilako yili nalio lienyu liu khulonda.

² Niiva mulambakhana khuhulishitsa, inoho muvuli khulonda makhuva kaanje khuhaana vukhumi khu lira lianje, niitsa khumulaama munyi. Niitsa khulaama khandi vindu vimukhonyanga mu limenya lienyu. Ni kilikali, mali khuvilaama khale, shichila mwa yambakhana khulonda mivaalo kaanje.

³ Loli, niitsa khusalilitsa vaana venyu, khandi muveshe masiingo mu tsimoni tsienyu, masiingo ki miruku chienyu chia mukholelanga misango. Niitsa khumukhunganyinya muve ihale wene khurula khwinzi.

⁴ Nalwo lwa muliitsa khumanya ndi ninzi wamuha lilako yili, khandi ndi lilakano lianje lia nakhola na vasalisi, nivali vitsukhulu va Levi liliitsa khutsililila khuvaho.

⁵ “Lilakano lia inzi Mwami Nyasaye wi Mikaanda Chiliihe nakhola naye liali lilakano liu khulera vulamu nende milembe. Lilakano lienelo liakholekha nikanyalikha vandu vambe luyali. Yamba luyali khandi nasaala khwinzi.

⁶ Vechitsa mivaalo katoto; navutswa shiveechitswa vuvehi tawe. Inzi nende vo khwamenyanga mu milembe. Shikali vakhola vutswa ku vulunji tawe; navutswa veechitsa vandi khulekhana ni vindu vitamanu.

⁷ Musalisi ali nu muhinzilu ku khwechitsa vandu vucheli vwatoto khulondokhana khu Nyasaye. Vandu venyekhanga vatsi khuye khwechitswa lienya lianje, shichila musalisi neye murumwa wu Mwami Nyasaye wi Mikaanda Chiliihe.

⁸ “Navutswa nunundi munyi vasalisi mwakoyana. Mechitso kenyu kayisikaritsa vandu vanyishi; mwakoyanyinya lilakano lia nakhola na munyi, numuli vitsukhulu va Levi.

⁹ Niitsa khukhola vandu voosi vamuchaye, shichila mwa yambakhana khulonda mwiima kwanje, khandi mwihonelanga vandu valala.”

Vandu Vambakhana khuva Vasuuvilwa khu Nyasaye

¹⁰ Kanyala khuva khutsi voosi khuvula tata mulala? Kanyala khuva Nyasaye mulala neye wavula khukhuloonga voosi? Shichila shina khuvulanga khusuuvilana vene na vene, lwa khwononyinyanga lilakano liu Mwami Nyasaye yakhola na vakuuka veru?

¹¹ Vandu va Yuda vayambakhana khuva vasuuvilwa, khandi shifwavi shikholekhanga mu shivala shia Israeli khandi mu Yerusalemi. Vandu va Yuda vakholela shifwavi mu Litempeli liu Mwami Nyasaye yayaanza, nu khuhila vakhali vasaalanga khu musambwa kwa vandu vi tsimbia tsindi.

¹² Mwami Nyasaye ativitsi shia mundu wosi wakholanga shikholwa khuli shienesho mu vandu vi inzu ya Yakobo. Mundu wakhola ndio, utushili khuvula khuhaanakhu vushiahidi inoho khulera shihanwa shiosi khu Mwami Nyasaye wi Mikaanda Chiliihe.

¹³ Yaka nako makhuva kandi ka mukholanga. Mwitsulitsanga miliika chienyu chia mulilanga khu vwaali vu Mwami Nyasaye, lwa mulilanga nu mwikhula shichila wayambakhana khuhuchililakhu vihanwa via muleranga khuye.

¹⁴ Munyi mureevanga, “Shichila shina yambakhananga khuhuchilila vihanwa vieru?” Mwami Nyasaye yambakhananga khuvihuchilila, shichila wamanya ndi munyi mwameneka lilaaka lia mwalaaka nu mukhali wa mwahila numushili muvuvukha. Mwambakhana khuva vasuuvilwa khuye, khali niiva yali mulina wenyu, khandi mukhali wenyu khuvirila mu lilakano.

¹⁵ Toto, Nyasaye anyala khuva neye walekha khumulomba voosi vavili mukhali nu musatsa khukwa mmbili mulala khandi khuva nu mwoyo mulala? Shichila shina yavalomba khuva mmbili mulala? Shichila yenyanga mwivule vaana vamenyanga khulondokhana khu lienya lielie. Khulwa yako, muve vacheli khandi mulole ndi mundu avulakhuho khu munyi wambakhananga khuva musuuvilwa khu mukhali wewe, wa yahila nashili muvukha.

¹⁶ Mwami Nyasaye wi Mikaanda Chiliihe, uli Nyasaye wa Israeli avoolanga, “Mbulakhu vuyaanzi lwa musatsa alekhananga nu mukhali wewe wayahila. Mbulakhu vuyaanzi, lwa mulala khu munyi akholelanga mukhali wewe shindu shitamanu khuli shienesho. Muve vacheli vene na vene, khandi musuuvilane.”

Litukhu liu Khukhalachilwa lili Himbi Khutukha

¹⁷ Mumali khumala tsingulu tsiu Mwami Nyasaye ni lilomoloma lienyu lia mulomolomanga. Khali ndio, munyi mureevanga, “Khwamumala tsingulu munjila shina?” Mumumali tsingulu lwa muvoolanga, “Shia mundu wosi wi likhola litamanu imbeli wewe nu mulahi; khandi Mwami Nyasaye ayaanzitswangwa naye.” Inoho lwa mureevanga, “Ni hena ha Nyasaye urweshitsanga likhola liu vulunji ali?”