MALAKI 1 - IBIBILIA INDAKATIFU MU LUTIRICHI LWITAKHO NENDE LWISUKHA

¹ Yili nalio likhuva liu Mwami Nyasaye yavoolela Malaki avoolele Vaisraeli.

Mwami Nyasaye Wayaanza Israeli

² Mwami Nyasaye avoolanga, “Shia khase khosi namuyaanza.” Navutswa munyi Vaisraeli mundevanga, “Unyala khuva wakhuyaanza munjila shina?” Esau anyala khuva shiali amwavo Yakobo tawe? Khali ndio, Yakobo neye wa nayaanza,

³ navutswa nali nayambakhana Esau. Namala khutivitsa shivala shieshie shi vikulu, shia mwene amenyamu. Shiarikala shiangalangwi, khali vivwe vimenyamu.

⁴ Nikava Vaedomu, nivali vitsukhulu va Esau valavoola, “Mataala keru kativitswa, navutswa khuliitsa khukalushila khulomba machiinga kako.” Mwami Nyasaye wi Mikaanda Chiliihe alachipa, “Vanyala khumbakha, navutswa niitsa khusambula mataala kenako, khutukha lwa valiitsa khulaangwa ‘Shivala shiu Vutamanu’, vandu vu Mwami Nyasaye yavukulila vurima mihika ni mihika.”

⁵ Munyi vene muliitsa khulola nikakholekhanga; muliitsa khuvoola, “Tsingulu tsiu Mwami Nyasaye ni tsinyishi, khali khuvira mipaka chia Israeli!”

Mwami Nyasaye Yakondeshela Vasalisi

⁶ Mwami Nyasaye wi Mikaanda Chiliihe avoolelanga vasalisi, “Munyi vasalisi va mulechelitsanga lira lielie, ‘Mwana aheetsanga tata wewe luyali, na murumishi aheetsanga muruchi wewe luyali. Nikava ninzi tata, shichila shina mwambakhananga khumba luyali lwa ndukhane khunyola? Nikava ninzi muruchi, shichila shina mwambakhananga khumba luyali lwa ndukhane khunyola?’ ” Navutswa munyi muvoolanga, “Khulechelitsanga ndina lira liolio?”

⁷ Mulechelitsanga lira lianje lwa muhaananga shiukhulia shikhatukhane khu vwaali vwanje; khandi muvoola, “Khwononyinya shiukhulia ndina?” Lwa mukanakananga ndi vwaali vwanje inzi Mwami Nyasaye vunyala khuchaywa.

⁸ Lwa muleranga miruku chiavekhula khukholela musango, mulolanga nu vulahi? Lwa mukholelanga musango miruku chialema inoho chialwala, mulolanga nu vulahi? Chelitsikhu khuha gavana wenyu vindu vienevo. Toto, anyala khuyaanzitswa na munyi inoho khumukholela malahi? Inzi Mwami Nyasaye wi Mikaanda Chiliihe mali khuvoola.

⁹ Khulwa yako, munyi vasalisi, numuyaanza musaale khu Nyasaye, nikanyalikha akhuvele tsimbavasi. Toto, numuli ni vihanwa khuli via muli navio yevo, mukanakananga anyala khumukholela malahi? Inzi Mwami Nyasaye wi Mikaanda Chiliihe mali khuvoola.

¹⁰ Mwami Nyasaye wi Mikaanda Chiliihe avoolanga, “Nzikombanga, nikanyalikha mulala khu munyi yikale miliango chi litempeli, khu muvuli khuhaambitsakhu mulilu kwi shikhaya khu vwaali vwanje! Mbulakhu shia nyanzililanga mu munyi. Shinyala khuhuchililakhu shihanwa shiosi shia muleranga khwinzi tawe.

¹¹ Vandu vi tsimbia tsiosi mu shivala khuraanjila ivukwi khutukha imbo vanzitsominyanga. Vasambilanga vubani shia havundu hosi, nivakholela misango minihu; shichila lira lianje liaheelwa luyali mu vandu vi tsimbia tsiosi.

¹² Navutswa munyi mwononyinyanga lira lianje, lwa muvoolanga ndi vwaali vwanje inzi Mwami Nyasaye vwa yononyinywa; khandi shiukhulia shilerwakhu shinyala khulechelitswa.

¹³ Munyi muvoolanga, ‘Makhuva yaka kakhuchokitsanga,’ nu mukhomolela. Munderelanga vindu via mwanuula vandu vandi, inoho vialema inoho vialwala khuli ni vihanwa vienyu viamuleranga khwinzi! Mukanakananga nyala khuhuchilila vindu viamuleranga khwinzi vienevo? Inzi Mwami Nyasaye wi Mikaanda Chiliihe ndevanga.

¹⁴ Shilaamo shikwili shia mundu wosi ungatanga, mundu ulaakanga alamba shihanwa shisatsa khurula mu miruku chiechie, navutswa akholelanga inzi Mwami Nyasaye wi Mikaanda Chiliihe musango ku muruku kwi imbala. Muve numumanyi ndi ninzi Mwami wi tsingulu tsinyishi, khandi vandu vi tsimbia tsindi tsiosi vambetsanga luyali.”