LUKA 9 - IBIBILIA INDAKATIFU MU LUTIRICHI LWITAKHO NENDE LWISUKHA

Yesu Yaruma Varumwa Likhomi na Vavili

¹ Yesu yalaanga halala veechi likhomi na vavili navaha tsingulu nende vunyali vu khukhunga matimoni koosi nu khuhonyinya vulwale.

² Yesu yavaruma khutsia khwilwatsa makhuva khulondokhana khu Vwami vwa Nyasaye khandi khuhonyinya vandu vali nivalwala.

³ Yavavoolela, “Muvuli khuchingakhu shindu shiosi khu luchendo, inoho indovoshi yu khuchendela, inoho musiko ku khusumilamu, inoho mukati inoho tsisenti. Muvuli khuchingakhu inguvu yindi ya khavili.

⁴ Havundu hosi ha muliitsa khwinjilitswa mumenye munzu mwenomo, khutukha lwa muliitsa khurula mu litaala lienelo.

⁵ Niiva vandu valiitsa khwambakhana khumwinjilitsa, lwa muliitsa khuva numurulanga mu litaala liavo, mwenyekhanga musukuyi lukuushi luli mu vilenje vienyu khuvamanyinya ndi mulechi.”

⁶ Veechi varula nivatsia khukhalakanyila shia havundu hosi mu michitsi, nivilwatsanga Ivanjeli khandi nivahonyinya vandu vali nivalwala shia havundu hosi.

Herode Yaheenda Mwoyo

⁷ Lwa Herode, wali nali mwamihi wu lusomo lwa Galilaya yahulila shia shindu shiosi shiali nishikholekhanga, yali niliheenda mwoyo, shichila likhuva liahulilikhana nilivoolwangwa ndi Yohana Mubatisi umali khwisimukha khurula mu likhutsa.

⁸ Vandi vavoolanga ndi Eliya umali khulolekha; ma vandi nivavoola ndi mulala khu vaprofeti vakhale umali khwisimukha khurula mu likhutsa.

⁹ Herode yavoola, “Ninzi wakutuula murwi kwa Yohana; navutswa nu mundu shina uyu wambulilanga vindu yivi khulondokhana khuye?” Yakhava khuli anyala khulola Yesu

Yesu Yaliishitsa Vasatsa Tsihelefu Tsiranu

¹⁰ Lwa Varumwa vakalukha, vavoolela Yesu ka vali nivakholi. Yesu yavavukula natsia navo mu litaala lia Betsesaida.

¹¹ Lwa vituma via vandu vahulila ndio, vamulonda. Yesu yavinjilitsa, nalomoloma khuvo makhuva khulondokhana khu Vwami vwa Nyasaye, khandi nahonyinya yavo venyanga khuhonyinywa.

¹² Lwa liuva liali niliraanganga khuyela, veechi likhomi na vavili vatsia khu Yesu nivavoola, “Seevula vandu, khu vatsi mu michitsi nende mu milimi chili himbi hanu vanyole shiukhulia shia valia khandi ha vakona; shichila havundu hanu ni havwivisi.”

¹³ Navutswa Yesu yavavoolela, “Munyi vene muvahe shiukhulia shia vanyala khulia.” Vavoola, “Khuli ni mikati chiranu nende tsisutsi tsivili tsionyene -- haundi nukhukhatsili khuvakuulila shiukhulia shitukha vandu yava voosi.”

¹⁴ Khwaliho na vasatsa vatukha himbi tsiheelefu tsiranu. Navutswa Yesu yavoolela veechi veve, “Vavooleli vikhale mu vituma, shia shilala himbi vandu makhomi karanu.”

¹⁵ Veechi veve vakhola ndio; nivavikhalitsa vandu voosi hasi.

¹⁶ Yesu yavukula mikati chiranu nende tsisutsi tsivili naheenza mwikulu, nasanditsa Nyasaye shichila vio. Yatong'olanyinya khandi naha veechi veve vakavulili vandu.

¹⁷ Vandu voosi valia nivikura. Khulwa yako, veechi vavunjelitsa mihinda likhomi na chivili chi shiukhulia chiali nichirikale.

Petro Yavoola Havulavu Yesu ni Masiha

¹⁸ Litukhu lindi, lwa Yesu yali nasaalanga ye wonyene, veechi veve vatsia khuye. Yavareeva, “Vituma via vandu vavoolanga ninzi viina?”

¹⁹ Vamuchipa, “Valala vavoolanga uli Yohana Mubatisi; vandi vavoolanga uli Eliya; navutswa valala vavoolanga uli mulala khu vaprofeti vali vakhale wisimukha khurula mu likhutsa.”

²⁰ Yesu yavareeva, “Navutswa munyi muvoolanga ninzi viina?” Petro yachipa, “Uli Masiha wa Nyasaye.”

Yesu Yalomoloma khu Linyakhana Lielie nende Likhutsa

²¹ Navutswa Yesu yavakaya vavuli khuvoolelakhu mundu makhuva kenako.

²² Yesu yavoola khandi, “Khutukha Mwana wu Mundu aliitsa khunyakhana khuvirila mu vindu vinyishi, ma vasakhulu, vasalisi vakali, nende veechitsi va Malako vamwambakhane. Aliitsa khwiirwa, navutswa matukhu kavaka nikakhavira aliitsa khwisimushitswa khurula mu likhutsa.”

²³ Yesu yavavoolela voosi, “Niiva mundu yenyanga khunonda, khutukha yileshitsi liiva lielie, nu khuchinga musalaba kwekwe shia khase khosi, manonde.

²⁴ Mundu wenyanga khuhonyinya vulamu vwevwe aliitsa khuvukoritsa; navutswa mundu wenyanga khukoritsa vulamu vwevwe shichila lira lianje aliitsa khuvuhonyinya.

²⁵ Nu vukhala shina vwa mundu anyala khunyola niiva anyala khunyola shia shindu shiosi mu shivala, navutswa akoritsi vulamu vwevwe inoho khukuurwa?

²⁶ Niiva mundu alandolela inzi nende mechitso kaanje tsisoni, Mwana wu Mundu aliitsa khumulolela tsisoni, lwa aliitsa khukalukha mu vukhumi vwevwe khandi mu vukhumi vwa Tata wewe, halala ni tsinjelosi tsindakatifu.

²⁷ Musuuvilitsanga ndi khuli na vandu valala hanu valiitsa khuvula khukhutsa nivashili khulola Vwami vwa Nyasaye.”

Likoondo lia Yesu Liakalukhana

²⁸ Matukhu nikakhavira himbi munane, lwa Yesu yali namali khuvoola vindu vienevo, yavukula Petro, Yohana, nende Yakobo nasimukha navo khutsia khusaala khu shikulu.

²⁹ Lwa Yesu yali nasaalanga, likoondo lielie liakalukhana, ma tsinguvu tsietsie nitsiang'ang'a vulavu muno.

³⁰ Nonoho vandu vavili, nivali Musa nende Eliya valomoloma na Yesu;

³¹ valolekha mu vukhumi vu mwikulu nivalomoloma na Yesu khulondokhana khuli arweshitsa lienya lia Nyasaye vwangu yuvu, lwa aliitsa khukhutsila mu Yerusalemi.

³² Petro nende veshie vali nivakonanga tsindolo, navutswa lwa vavukha mu tsindolo, valola vukhumi vwa Yesu nende vandu vavili nivasinjile naye.

³³ Lwa vandu venavo vali nivalekhanga Yesu, Petro yavoolela Yesu, “Muruchi, nu vulahi khuli hanu! Khumbashe matiili kavaka, lilala liolio, lindi lia Musa, na lindi lia Eliya” (shikali yali umanyi makhuva kavoolanga tawe.)

³⁴ Lwa yali nashivoolanga ndio, malesi kalolekha nikavakhunikha; ma veechi nivaria lwa malesi kali ikulu wavo.

³⁵ Mwoyo kwarula mu malesi, nu kuvoola, “Uyu neye Mwana wanje, wa narovola; mumuhulishitsi!”

³⁶ Lwa mwoyo kwenoko kwali nu kumali khuvoola ndio, vanyola Yesu nali wonyene vutswa. Veechi vahonjela shichila kenako koosi, nivavula khuvoolelakhu mundu ka vali nivaloli mumatukhu kenako.

Likoondo Lia Yesu Liakalukhana

³⁷ Khulitukhu lialondakhu, Yesu nende veechi veve vavaka vakholomokha hasi nivarula khu shikulu, ma shituma shikali shia vandu nivakanila Yesu.

³⁸ Mundu mulala khurula mu shituma shia vandu yalaanjilila navoola, “Mwechitsi, nuyaanza lolakhu mwana wanje mutelwa uyu.

³⁹ Litimoni limwinjililanga maraanga khwayula nu khulaanjilila. Limusiuvanga hasi ashinda, ma lihulu liraanga khurula mu munwa kwekwe. Litsilililanga khumusalilitsa vuchila khumulekhakhu.

⁴⁰ Mbolele veechi vovo nivayaanza valikhunji, navutswa vakhayilwi khulikhunga.”

⁴¹ Yesu yachipa, “Munyi vandu vamwambakhana khusuuvila khandi vatamanu! Mwenyanga mbe na munyi khutukha luhono shina? Mwenyanga nzililile khwikhutsila khutukha lina?” Yavoolela mundu mwenoyo, “Nderela mwana wowo hanu.”

⁴² Lwa mwana yali nalerwangwa, litimoni liasiuva mwana mwenoyo hasi naraanga khushinda. Navutswa Yesu yakondeshela litimoni, nahonyinya mwana mwenoyo, naha tata wewe.

⁴³ Vandu voosi vali nilichenya shichila vunyali vwi tsingulu tsia Nyasaye. Lwa vandu vali nivashikanakananga khulondokhana khu vindu via Yesu yali nakholanga, Yesu yavoolela veechi veve,

Yesu Yalomoloma Khandi khu Likhutsa Lielie

⁴⁴ “Muvuli khwivililakhu makhuva kaanje ndi Mwana wu Mundu atsitsanga khutsamwa khu vandu.”

⁴⁵ Navutswa veechi veve vakorwa ka yali navoolanga. Vali vaviswa limanya, khu vavuli khumanya; khandi varia khumureeva shia makhuva kenako kavoolanga.

Ni Viina Mukali Muno

⁴⁶ Veechi va Yesu vareevana vene khuvene ni viina muvo wali mukali muno.

⁴⁷ Navutswa lwa Yesu yali namanyi ka vakanakananga, yavukula mwana namusinjilitsa himbi khuye,

⁴⁸ navavoolela, “Mundu winjilitsanga mwana uyu khuvirila mu lira lianje, anzinjilitsanga; khandi mundu unzinjilitsanga, shikali anzinjilitsanga wonyene tawe, navutswa yinjilitsanga khandi woyo wanduma; shichila mundu uli mutititi mu munyi voosi, neye uli mukali muno.”

Woyo Ukhahingananga na Munyi nu Wenyu

⁴⁹ Yohana yalomoloma navoola, “Muruchi, khuloli mundu nakhunganga matimoni khuvirila mu lira liolio, makhulamukaya aleshe, shichila shiali mulala khu shituma shieru tawe.”

⁵⁰ Navutswa Yesu yamuvoolela, “Muvuli khumukaya, shichila woyo ukhahinganyinyanga munyi nu wenyu.”

Muchitsi mu Samaria Kwambakhana Khwinjilitsa Yesu

⁵¹ Lwa matukhu kali nikali himbi khutukha ka Yesu ahilwa mwikulu, yakanakana natsia Yerusalemi.

⁵² Yaruma varumwa imbeli wewe, nivatsia mu muchitsi kuli Samaria khumurecheshela havundu.

⁵³ Navutswa vandu viweneyo vambakhana khumwinjilitsa; shichila yali natsitsanga Yerusalemi.

⁵⁴ Lwa veechi veve, nivali Yakobo nende Yohana valola ndio, vareeva, “Mwami, wenyanga khusaale mulilu kuruli mwikulu khwitsa khuvamulula?”

⁵⁵ Yesu yishevukha navakondeshela.

⁵⁶ Khulwa yako, Yesu nende veechi veve vasimukha nivatsia mu muchitsi kundi.

Yavo Venyanga Khulonda Yesu

⁵⁷ Lwa vali nivali khu luchendo lwavo, mundu wundi yavoolela Yesu, “Niitsa khukhulonda shia havundu hosi ha wenyanga khutsia.”

⁵⁸ Yesu yamuvoolela, “Vivwe vimenyanga mu vwina, na manyonyi kamenyanga muvitsu; navutswa Mwana wu Mundu avulakhu havundu hanyala khukona nahulukha.”

⁵⁹ Yesu yavoolela mundu wundi, “Nonda.” Navutswa mundu mwenoyo yavoola, “Mwami, lekha nzi mbilio khuyeveela mmbili kwa tata wanje mu shilindwa.”

⁶⁰ Navutswa Yesu yamuvoolela, “Lekha vandu vakhutsa vayeveele mu shilindwa mmbili chia vandu vakhutsa vavo vene; navutswa simukha utsi khwilwatsa makhuva khulondokhana khu Vwami vwa Nyasaye.”

⁶¹ Mundu wundi yavoola, “Mwami, niitsa khukhulonda; navutswa lekha nzi khuhaana kwaheli khu vandu vi inzu yanje.”

⁶² Yesu yamuvoolela, “Mundu uvukulanga lichembe liu khulimila nu khwishevukha inyuma avula vukhonyi mu Vwami vwa Nyasaye.”