LUKA 8 - IBIBILIA INDAKATIFU MU LUTIRICHI LWITAKHO NENDE LWISUKHA

Vakhali Valondanga Yesu

¹ Matukhu mati nikamali khuvira, Yesu yachenda nakhalakanyila mu mataala nende mu michitsi, niyilwatsa Ivanjeli khulondokhana khu Vwami vwa Nyasaye. Veechi likhomi na vavili vasimukha nivatsia naye.

² Khali vandu vakhali vandi vali nivahonyinywa khurula mu miroho mitamanu nende vulwale vasimukha nivatsia naye; navo ni Mariya, walaangwangwa lindi Magadalena, wa matimoni saba kali nikarulamu;

³ nende Yoani, nali mukhali wa Kutsa mulala khu varumishi vasinjililanga inzu yu vwami ya Herode; Susana, nende vakhali vandi vanyishi varumishila miandu chiavo khukhonya Yesu nende veechi veve.

Lukanu khu Mumitsi

⁴ Lwa shituma shikali shia vandu vakanila halala khandi vandu nivarula mu mataala lukanu, Yesu yavavoolela lukanu yulu,

⁵ “Litukhu lindi, mundu yasimukha natsia khumitsa vukuutsa vwevwe. Lwa yali namitsanga vukuutsa mu mulimi, vulala khuvwo vwakwa khunjila, ma vandu nivavuseena ni vilenje, khandi manyonyi kitsa nikavuvootsa.

⁶ Vukuutsa vundi vwakwa khu lwanda; lwa vwama, vwaniala shichila lilova liali na matsi mati.

⁷ Vukuutsa vundi vwakwa mu mavwa; nuvwama khandi mavwa nikavutsoma.

⁸ Vukuutsa vundi vwakwa mulilova linuulu, manuvumeela; manuvwama viamu imia indala.” Lwa Yesu yavoola ndio, yamalila, “Numuli na maroyi ku khuhulila, muhulishitsi.”

Shivune shiu Khurumishila Tsinganu

⁹ Khulwa yako, veechi vareeva Yesu avavoolele shia lukanu lwenolo luvoolanga;

¹⁰ ma Yesu navavoolela, “Munyi mwaheelwa vucheli khulondokhana khu makhuva kaviswa ku Vwami vwa Nyasaye; navutswa vandi voosi valiitsa khukanyola khuvirila mu tsinganu, khu khali vaheenze shivaliitsa khulola, khandi nivahulishitsa shivaliitsa khumanya tawe.

Yesu Yivaala Lukanu lu Mumitsi

¹¹ “Yaka nako ka lukanu khu mumitsi luvoolanga: lukuutsa ni likhuva lia Nyasaye.

¹² Vukuutsa vwakwa khunjila, navo vandu vahulilanga likhuva; navutswa Ibilisi yitsanga khandi avanuula likhuva khurula mu mioyo chiavo, khuvikalila vavuli khusuuvila nu khuhonyinywa.

¹³ Vukuutsa vwakwa mutsimbuyi, navo vandu vahulilanga likhuva; valinjilitsa nilisangala; navutswa shilinjilanga muvo mukari tawe; vasuuvilanga khumatukhu mati, navutswa lwa matukhu ka machelitso kitsanga valekhanga lisuuvila.

¹⁴ Vukuutsa vwakwa mu mavwa, navo vandu vahulilanga likhuva; navutswa khuheenda mwoyo nende miandu, ni likomba liu mu limenya liu mu shivala shinu litsulanga mu mioyo chiavo, ma lisuuvila liavo lionekha, khandi shivanyala khuhindila tawe.

¹⁵ Vukuutsa vwakwa mulilova lilahi, navo vandu vahulilanga likhuva, vahaanda khulio nu mwoyo mulahi khandi kwi lisuuvila, mavikhutsila khutukha lwa vama matunda.

Itaaha ni Yukhukholitsa Vulavu

¹⁶ “Mundu avulakhuho uhaambitsanga itaaha machikhunishila mu muhinda, inoho achivikha mulwalo mwi shitali; navutswa achirenjekhanga khu shikuru shi itaaha, khu vandu vinjilamu valole vulavu.

¹⁷ “Shindu shiosi shiaviswa shilitsa khuvikhwa havulavu; khandi shindu shiosi shia khunikhwa shilitsa khukhunulwa.

¹⁸ “Muve vacheli khukamuhulila. Mundu uli ni shindu shiosi aliitsa khumeetwa vindu mu vunyishi, navutswa mundu uvula shindu shiosi, khali shitititi shiali nashio aliitsa khunuulwa.”

Mama wa Yesu nende Vamwavo va Yesu

¹⁹ Litukhu lindi, mama wa Yesu nende vamwavo va Yesu vitsa khuye, navutswa shivatukha khuye tawe, shichila shituma shia vandu.

²⁰ Mundu wundi yavoolela Yesu, “Mama wowo nende vamwavo vovo vasinjile ilwanyi, khandi venyanga khulomoloma nivi.”

²¹ Navutswa Yesu yavachipa, “Mama wanje nende vamwavo vaanje ni yavo vahulilanga likhuva lia Nyasaye mavakhola ki likhuva lienelo lienyanga.”

Yesu yasinjilitsa Imbuutsa

²² Litukhu lindi, Yesu yanina mu liaro na veechi veve, navavoolela, “Chendi khwambushi khutsi khuluveka lundi lwi inyanza yolo.” Vasimukha nivatsia;

²³ lwa vali nivambukhanga inyanza, Yesu yakona tsindolo. Nonoho lwa imbuutsa inditoho yahuutsa khu inyanza, ma matsi nikaraanga khwitsula mu liaro, khali nivava mu maraava.

²⁴ Veechi vatsia khu Yesu manivamuvushitsa; vavoola, “Mwechitsi, Mwechitsi! Khuli himbi khukhutsa! Nalwo lwa Yesu yavukha, manakondeshela imbuutsa nende maruundu; viasinjila ma matsi nikasinjila.”

²⁵ Yesu yavareeva, “Lisuuvila lienyu lili hena?” Veechi varia, nivachenya nivavoolelana vene khuvene, “Nu mundu shina uyu? Ahaananga malako khu tsimbuutsa nende maruundu, khali vimuhulila!”

Yesu Yahonyinya Mundu wa Matimoni Kali Muye

²⁶ Yesu nende veechi veve vambukha ni liaro nivatukha lusomo lwa Gerasini, khuluveka luli ivukwi wi Inyanza ya Galilaya.

²⁷ Lwa Yesu yali niyakharula mu liaro, yakana nu mundu wa matimoni kali muye. Mundu mwenoyo yachendanga shekenye khumatukhu manyishi; vuchila khumenya hango; navutswa yamenyanga mu vilindwa via vayeveelamu vandu vakhutsa.

²⁸ Lwa mundu mwenoyo yalola Yesu, yalila manasikama imbeli wewe, khandi nalaanjilila nu mwoyo mukali, “Yesu, Mwana wa Nyasaye Uli Ikulu khu Viosi! Wenyanga khukhola shina khwinzi? Khusayanga nuyaanza, uvuli khusalilitsa!”

²⁹ Mundu mwenoyo yavoola ndio, shichila Yesu yali nakondeshele litimoni liruli mu mundu mwenoyo. Litimoni liamukumilanga hali khanyishi; khali niiva yali muvohe, yali wavohwa ni minyololo chi vivia khu vilenje vievie nende makhono keke; navutswa yakutuulanyinyanga minyololo, ma litimoni limuhila mu shiangalangwi.

³⁰ Yesu yamureeva, “Lira liolio ni viina?” Mundu mwenoyo yachipa, “Legioni,” shichila matimoni manyishi kali kayinjila muye.

³¹ Matimoni kenako kasaya Yesu nayaanza avuli khukakhunga khutsia mu shihatisi.

³² Shituma shikali shi shiayo shi tsingulume shialiho nitsiliitsanga shiukhulia khundulu khwi shikulu. Matimoni kasaya Yesu nayaanza akaleshe katsi mu tsingulume. Yesu yakaseevula nikatsia.

³³ Matimoni karula mu mundu mwenoyo nikinjila mu tsingulume, ma shiayo shiosi shi tsingulume nishikholomokha khurula khu shikulu nitsitsia mu inyanza khandi nitsikhamilamu.

³⁴ Lwa vandu valindanga tsingulume valola kali nikakholeshe, vilukhaka nivavoolela vandu vi litaala likali khandi shia havundu hosi.

³⁵ Vandu vasimukha nivatsia khulola kali nikakholeshe; khandi lwa vatukha khu Yesu, vanyola mundu wa litimoni liali muye nilirulimu, niyikhale himbi khu Yesu, niyifwali tsinguvu khandi nali mulamu; manivaria.

³⁶ Vandu vali nivaloli vavoolela vandi khuli mundu wa litimoni liali muye yali nahoni.

³⁷ Nalwo lwa vandu voosi mu lusomo lwa Gerasini vavoolela Yesu aruli mu lusomo lwavo, shichila vali ni vatechelanga. Yesu yinjila mu liaro narulaho.

³⁸ Mundu wa Yesu yali niyarulitsamu matimoni yasaya Yesu nayaanza vatsi naye; navutswa Yesu yamukhunga, navoola,

³⁹ “Kalukha ingo wowo, uvoolele vandu koosi ka Nyasaye akhukholele.” Khulwa yako, yasimukha natsia nakhalakanyila mu litaala likali, navoola makhuva khulondokhana khu vindu via Yesu yali namukholele.

Mwana wi Shikhana wa Yairo nende Mukhali Watiila khu Inguvu ya Yesu

⁴⁰ Lwa Yesu yakalukha khuluveka lundi lwi inyanza, shituma shia vandu vamwinjilitsa, shichila voosi vamulindililanga.

⁴¹ Mundu walaangwangwa Yairo, mwimilili wi lisinagogi yatukhaho. Yasikama ha vilenje ha Yesu, namureeva nayaanza yinjilikhu munzu mwemwe,

⁴² shichila mwana wewe wi shikhana mulala wonyene, wali nali ni mihika likhomi na chivili, yali nakhutsanga. Lwa Yesu yali natsitsanga, vituma via vandu vali himbi khumuseena.

⁴³ Mukhali wali niyanyakhana khumihika likhomi na chivili shichila khuraatsa masahi yali muvo. Mundu avulakhuho yali wanyala khumuhonyinya;

⁴⁴ yarulila inyuma wa Yesu, natiila khu lupindo lwi inguvu ya Yesu, khuraatsa khwekhwe khwa masahi nukhusinjila vwangu.

⁴⁵ Yesu yareeva, “Ni viina undilikhu?” Lwa vandu voosi vambakhana, Petro yavoola, “Mwechitsi, vandu ni vanyishi khandi vakhuminanga!”

⁴⁶ Navutswa Yesu yavoola, “Mundu undilikhu; shichila mbulili tsingulu nitsirulanga mwinzi.”

⁴⁷ Lwa mukhali mwenoyo yalola ndi anyala khuvula khwivisa; yitsa natechelanga, nasikama ha vilenje ha Yesu namuvoolela havulavu imbeli wa vandu voosi shivune shichili namutiilakhu, khandi khuli yahonyinywa vwangu.

⁴⁸ Yesu yamuvoolela, “Mwana wi shikhana wanje, lisuuvila liolio limali khukhuhonyinya; simukha utsi mu milembe.”

⁴⁹ Lwa Yesu yali nashilomolomanga, mundu wundi yarumwa khurula mu inzu ya Yairo, khwitsa khuvoola, “Mwana wi shikhana wowo umali khukhutsa; lekha khunyashitsa mwechitsi.”

⁵⁰ Navutswa lwa Yesu yahulila ndio, yavoolela Yairo, “Lekha khuria; suuvila vutswa, naye alahona.”

⁵¹ Lwa Yesu yatukha ha inzu ya Yairo, shiyahuchililakhu mundu wundi wosi khwinjilamu, nikakhali Petro, Yohana, Yakobo halala na tata nende mama wu mwana tawe.

⁵² Vandu voosi valiho valilanga nivamwikhula. Navutswa Yesu yavavoolela, “Leshi khulila. Mwana shiakhutsi tawe; navutswa akonanga tsindolo.”

⁵³ Vandu voosi vamusekha, shichila vali vamanyi mwana umali khukhutsa.

⁵⁴ Lwa Yesu yakumila mukhono ku mwana mwenoyo, yalaanga, “Mwana wanje, vukha!”

⁵⁵ Mwana mwenoyo yaraanga khweselana, nasinjila vwangu; ma Yesu navoola, “Muhi shiukhulia shialia.”

⁵⁶ Vivuli vu mwana mwenoyo vali nilichenya, navutswa Yesu yavakaya vavuli khuvoolelakhu mundu kali nikakholeshe.