LUKA 21 - IBIBILIA INDAKATIFU MU LUTIRICHI LWITAKHO NENDE LWISUKHA

Shihanwa shiu Mukhutsakhali Yahaana

¹ Yesu yaheenza iyi neyo, nalola vandu vahinda nivalakhulanga vihanwa viavo mu livishilu li litempeli;

² khandi nalola mukhali mulala mukhutsakhali mumanani nalakhulamu tsisenti tsivili.

³ Yesu yavoola, “Muvoolelanga katoto ndi mukhutsakhali mumanani uyu ulakhulimu mu vunyishi khuvira vandu vandi voosi.

⁴ Vandu vandi vahaani vihanwa viavo khurula mu vunyishi vwi miandu chia vali nachio; navutswa mukhali uyu, mu vumanani vwevwe, uhaani shiosi shiavele nashio shivele shimukhonye mu limenya lielie.”

Yesu Yalomoloma khuli Litempeli Lipomolwa

⁵ Valala khu veechi va Yesu vali nivalomolomanga makhuva khulondokhana khu Litempeli; khuli liumbakhwa liakasa muno na machina malahi khandi vihanwa via vahaananga khu Nyasaye. Yesu yavoola,

⁶ “Vindu viosi viamulolanga yivi, matukhu kaliitsa khutukha lwa lichina khali lilala shililiitsa khurikalakhu mu makono kalio tawe; koosi kaliitsa khusiuvwa hasi.”

Vutiinyu nende Litambitswa

⁷ Vamureeva khandi, “Mwechitsi, yaka kaliitsa khwikholekha inyinga shina; khandi ni shina shiliitsa khuva shimanyilu kali himbi khwikholekha?”

⁸ Yesu yavachipa, “Muve vacheli; muvuli khukaatwa nu mundu wosi. Vandu vanyishi valiitsa khwitsa khuvirila mu lira lianje, nivavoola, ‘Ninzi ye!’ khandi, ‘Matukhu kamali khutukha!’ Mukhavalondi tawe.

⁹ Lwa muhulila maahe khandi makhuva nikamonywa khulondokhana khu liihe, muvuli khuria. Vindu khuli vienevo vilaranga khwikholekha; navutswa shishili shimanylu shimanyinyanga matukhu kukhumalilikha kali himbi khutukha tawe.”

¹⁰ Yesu yatsililila khuvavoolela, “Vivala viliitsa khukwana vivala vindi; khandi vwami vuliitsa khwinjilila vwami vundi;

¹¹ shivala shiliitsa khutechela vutamanu muno, inzala iliitsa khuva shia havundu hosi nende vulwale; khuliitsa khuva ni vindu vicheni khandi viu khutechelitsa nivitsanga khurula mwikulu.

¹² Navutswa vindu vienevo viosi nivishili khwikholekha, muliitsa khukumilwa nu khutambitswa; muliitsa khuhaanwa khuyaalilwa mu masinagogi mamuvohwi mucheela; muliitsa khuhilwa imbeli wa vami nende vamihi shichila lira lianje.

¹³ Yuvu navwo vuliitsa khuva vwiyangu vwenyu vu khwilwatsa Ivanjeli.

¹⁴ Mulombe tsinganakani tsienyu isaa nishili khutukha khandi muvuli khuheenda mwoyo khulondokhana khu ka namuvoole khwishinga vene;

¹⁵ shichila niitsa khumuha makhuva nende vusitsa, vwa khali mulala khu vatsiku venyu akhanyala khwambakhana inoho khukalukhanyinya kamuvoolanga khuva ku vuvehi tawe.

¹⁶ Muliitsa khutsamwa khali na vivuli venyu, vamwavo venyu, viikho venyu nende valina; khandi valiitsa khwiira valala khu munyi;

¹⁷ vandu voosi valiitsa khumuhima shichila inzi.

¹⁸ Navutswa khali liswi khurula khu mirwi chienyu liliitsa khuvula khukora.

¹⁹ Muve vitsumishitsi, khu mulihonyinywa.

Yesu Yalomoloma khu Litivitswa lia Yerusalemi

²⁰ “Navutswa lwa muliitsa khulola litaala likali lia Yerusalemi nilivotokhanilwi na vasikali, nalwo lwa muliitsa khumanya ndi khutivitswa khwalio khumali khutukha.

²¹ Nalwo lwa muliitsa khulekha yavo vali mu lusomo lwa Yudeya vilushili mu vikulu; yavo vali mu litaala likali khurulamu; khandi yavo vali ilwanyi valivula khutsiakhu mu litaala likali;

²² shichila kaliitsa khuva ‘Matukhu ku khusalilitswa,’ khurweshitsa koosi kahandikwa mu Mahandiko Matakatifu.

²³ Vuliitsa khuva vutiinyu muno mumatukhu kenako khu vakhali vaheelitsa khandi khu vakhali vanunyinyanga vaana vatoro! Shichila linyakhana litamanu liliitsa khuva linyishi mu shivala shinu; khandi Nyasaye aliitsa khusalilitsa vandu yava.

²⁴ Vandu valala valiitsa khwiirwa ni shivavi; khandi vandi valiitsa khuvukulwa khuli vavohe khuhilwa mu vivala viosi; ma litaala likali lia Yerusalemi lilikuurwa na vandu vi tsimbia tsindi, khutukha lwa matukhu ka vandu vi tsimbia tsindi kaliitsa khurweshitswa.

Khukalukha khu Mwana wu Mundu

²⁵ “Khuliitsa khuva ni vindu viu khuchenyinya nivikholekhanga khu liuva, mweli, nende tsinyining'ini. Vandu vu mu vivala viosi valiitsa khuheenda mwoyo, valiitsa khuria shichila khuhilikana khwi inyanza nende maruundu mu inyanza.

²⁶ Vandu valiitsa khushinda shichila vuri lwa valiitsa khuva nivalindililanga kaliitsa khwikholekha shia havundu hosi khulilova; shichila tsingulu tsiu mwikulu tsiliitsa khunuyanyinywa khurula mu makono katsio.

²⁷ Mwana wu Mundu aliitsa khulolekha, khuvirila mu malesi ni tsingulu tsinyishi nende vukhumi.

²⁸ Lwa vindu vienevo viranga khwikholekha, sinjili mulindilile, shichila muli himbi khuhonyinywa.”

Liechitso khu Musala ku Mukhuyu

²⁹ Nalwo lwa Yesu yavavoolela lukanu yulu: “Kanakanikhu shindu khulondokhana khu musala ku mukhuyu nende misala chindi chiosi;

³⁰ lwa masambu kachio karaanganga khulolekha, nalwo lwa mumanyanga ndi matukhu ki shimiyu kali himbi khutukha.

³¹ Munjila indala yeneyo, lwa muliitsa khulola vindu vienevo nivikholekhanga, nalwo lwa muliitsa khumanya ndi vwami vwa Nyasaye vuli himbi khwitsa.

³² “Musuuvilitsanga ndi vindu vienevo viosi viliitsa khwikholekha, vandu voosi vashili mwoyo nunundi nivashili khukhutsa.

³³ Likulu nende lilova viliitsa khurulaho, navutswa makhuva kaanje shikaliitsa khurulaho tawe.

Shiheeli Shilatukha Vuchila Khumanya

³⁴ “Muve vacheli! Muleshe khulitohitswa khukorela mu milukha chi lilia linyishi, mulitanda khandi khuheenda mwoyo, shichila vulamu yuvu inoho litukhu lienelo khumunyolishitsa vwangu

³⁵ khuli mureeko; shichila liliitsa khutukha khu vandu voosi vamenyanga khulilova.

³⁶ Navutswa muheenze tsisaa tsiosi, khandi musaale shia khase khosi khu muve ni tsingulu tsiu khwihonolokha khurula khu vindu viosi viliitsa khwikholekha, khandi mulisinjila imbeli wu Mwana wu Mundu.”

³⁷ Yesu yamala matukhu kenako koosi niyechitsanga mu Litempeli; khandi lwa khulukolovo khwatukhanga, yatsitsanga khumala vutukhu vwosi khu Shikulu shia Misayituni.

³⁸ Shia litukhu nu kushili mu mavwevwe, vandu voosi viitsanga khumuhulishitsa mu Litempeli.