LUKA 18 - IBIBILIA INDAKATIFU MU LUTIRICHI LWITAKHO NENDE LWISUKHA

Lukanu khu Mukhutsakhali nende Mukhalachi

¹ Yesu yavoolela veechi veve lukanu yulu khuveechitsa ndi shia khase khosi khutukha vasaale vuchila khukhutsa mwoyo.

² Yavoola, “Mu litaala lindi, khwalimu nu mukhalachi wali niyambakhana khuria Nyasaye inoho khuha vandu luyali;

³ khandi khwaliho nu mukhutsakhali mu litaala lienelo wali niyamenya natsitsanga khuye khumureeva nayaanza amukhonye, ‘Kholela katoto khu vatsiku vaanje.’

⁴ Mukhalachi mwenoyo yambakhana khumukhonya khumatukhu manyishi; navutswa lukhumalilikha yireevana mwene, ‘Khali niiva shinaria Nyasaye inoho shimbetsanga vandu luyali tawe,

⁵ nikhali, shichila mukhutsakhali uyu anyashitsanga, niitsa khumukholela katoto khu vatsiku veve. Niiva shinyala khumukholela ndio tawe, alasinya shichila khutsililila khwitsa khwekhwe!’ ”

⁶ Nalwo lwa Mwami yavoola, “Hulishitsi khuli mukhalachi mutamanu mwenoyo yavoola.

⁷ Nyasaye shialiitsa khukholela vandu veve vayarovola katoto, nivali yavo vamulililanga mbasu nu vutukhu? Aliitsa khuvula khuvukula luhono khuvakhonya!

⁸ Muvoolelanga, aliitsa khuvakholela katoto khandi akakhole vwangu. Navutswa lwa Mwana wu Mundu aliitsa khwitsa, kanyala khuva ni kilikali aliitsa khunyola vandu khulilova nivali ni lisuuvila?”

Lukanu khu Mufarisayo nende Musololi wu Vushuru

⁹ Yesu yavoola lukanu yulu khandi khu vandu valala vikhola kholitsanga khuva valunji nu khuchaya vandi.

¹⁰ “Litukhu lindi, vandu vavili vasimukha nivatsia mu Litempeli khusaala: mulala khuvo yali Mufarisayo, na wundi musololi wu vushuru.

¹¹ “Mufarisayo yasinjila haluveka nasaala, ‘Nyasaye, khusanditsanga shichila shindi khuli vandu vu vung'wang'wa, vambakhananga khukhola katoto, vaheeyi, inoho khuli musololi wu vushuru uyu tawe.

¹² Mbonganga vuchila khulia hali khavili khulisitsa; khandi khuha likhomi khurula khu vindu viosi vianyolanga khuli murungu kwanje.’

¹³ “Navutswa musololi wu vushuru yasinjila ihale wene niyambakhana khuheenzakhu mwikulu, navutswa yatuuya khu shiliru shieshie, navoola, ‘Nyasaye, ndolela tsimbavasi shichila ndi mundu mwoni!’

¹⁴ Muvoolelanga ndi musololi wu vushuru yakalukha ingo wewe nakholelwi khuva wi likhola liu vulunji khuvira Mufarisayo woyo; shichila mundu wikalihitsanga mwene khuvira vandi, aliitsa khuchehitswa, navutswa mundu wichehitsanga mwene, aliitsa khukalihitswa.”

Khuli Yesu Yakasitsa Vaana Vatititi

¹⁵ Vandu valala valera vaana vatititi vavo khu Yesu avavishikhu makhono keke. Veechi vavalola ni vavakondeshela khukhola ndio,

¹⁶ navutswa Yesu yalaanga vaana venavo khwitsa khuye, navoola, “Leshi vaana vatititi vitsi khwinzi, khandi muvuli khuvakaya, shichila Vwami vwa Nyasaye nu vwa vandu khuli yava.

¹⁷ Muvoolelanga kilikali ndi mundu uliitsa khuvula khunyola Vwami vwa Nyasaye khuli mwana mutititi, aliitsa khuvula khwinjilamu.”

Vuhinda nende Vwami vwa Nyasaye

¹⁸ Mwimilili mulala Muyahudi yareeva Yesu, “Mwechitsi Mulahi, ni shina shianyala khukhola khunyole vulamu vwi mihika ni mihika?”

¹⁹ Khulwa yako, Yesu yamureeva, “Shichila shina unaanganga mulahi? Mundu avulakhuho mulahi nikakhali Nyasaye wonyene.

²⁰ Wamanya malako yaka, ‘Uvuli khuheeya; uvuli khwiira; uvuli khuhuuva; uvuli khwichishilakhu vandi; khandi uhe tata wowo nende mama wowo luyali.’ ”

²¹ Mundu mwenoyo yachipa, “Khurula nindi muvukha, nalondanga malako yaka koosi.”

²² Lwa Yesu yahulila ndio, yamuvoolela, “Ni shindu shilala shia wenyekhanga ukhole. Kuulitsa vindu viuli navio viosi uhe vamanani tsisenti tsienetso; na ulava ni livishilu mwikulu; ma witsi unonde.”

²³ Navutswa lwa mundu mwenoyo yahulila ndio, yavelela muno, shichila yali mundu wi miandu minyishi.

²⁴ Yesu yamuheenza navoola, “Nu vutiinyu muno khu vandu vahinda khwinjila mu Vwami vwa Nyasaye!

²⁵ Nu vutoro muno khu ingamia khwinjila munduhu yisindani khuvira mundu muhinda khwinjila mu Vwami vwa Nyasaye.”

²⁶ Yavo vahulila ndio vareeva, “Ni viina unyala khuhonyinywa?”

²⁷ Navutswa Yesu yachipa, “Ka mundu anyala khuvula khunyala, kanyala khunyalikha khu Nyasaye.”

²⁸ Navutswa Petro yavoola, “Lola, khwamala khulekha tsinzu tsieru, ma khwakhulonda.”

²⁹ Yesu yavavoolela, “Muvoolelanga katoto ndi mundu wosi walekha inzu yeye inoho mukhali wewe inoho vamwavo veve inoho tata inoho mama wewe inoho vaana veve, shichila Vwami vwa Nyasaye,

³⁰ aliitsa khunyola vindu mu vunyishi muno mumatukhu kanu, khandi mumatukhu kaliitsa khuvaho vulamu vwi mihika ni mihika.”

Yesu Yalomoloma lwa Khavaka khu Likhutsa Lielie nende Lisimushitswa

³¹ Yesu yavukula veechi likhomi na vavili navahila haluveka, navavoolela, “Hulishitsi! Khutikulukhanga nu khutsia Yerusalemi, khandi shia shindu shiosi shiahandikwa na vaprofeti khulondokhana khu Mwana wu Mundu shilitsa khurweshitswa.

³² Aliitsa khuhaanwa khu vandu vi tsimbia tsindi. Valiitsa khumukholela shihenye henye, vamunyeche khandi vamusutsili maree.

³³ Valiitsa khumushuta ni shivoko nu khumwiira, navutswa matukhu kavaka nikakhavira, aliitsa khwisimushitswa khurula mu likhutsa.”

³⁴ Navutswa veechi shivali vamanyikhu khali shindu shiosi khulondokhana khu vindu vienevo tawe. Vaviswa shivune shia makhuva kenako; khandi vakorwa khumanya ka Yesu yali nalomolomanga khulondokhanakhu.

Yesu Yahonyinya Muvekhu Musavisavi

³⁵ Lwa Yesu yali nali himbi khutukha mu litaala lia Yeriko, mundu muvekhu yali niyikhale khundulu khu muhaanda nasava savanga.

³⁶ Lwa mundu mwenoyo yahulila shituma shia vandu nivaviranga, yareeva shikholekhanga.

³⁷ Vamuvoolela, “Yesu wa Nazareti avirilanga hanu.”

³⁸ Yalaanjilila nu mwoyo mukali navoola, “Yesu! Mwana wa Daudi! Mbelela tsimbavasi!”

³⁹ Navutswa vandu voosi vali nivali imbeli vamukondeshela, khandi nivamuvoolela ahonjele; navutswa yatsililila khulaanjilila ikulu muno, navoola, “Mwana wa Daudi! Mbelela tsimbavasi!”

⁴⁰ Yesu yasinjila navoola vamulerele mundu mwenoyo; navutswa lwa yisuunda himbi, Yesu yamureeva,

⁴¹ “Ni shina shia wenyanga khukholele?” Yachipa, “Mwami, nyenyanga tsimoni tsianje tsilole khandi.”

⁴² Yesu yamuvoolela, “Lola! Lisuuvila liolio limali khukhuhonyinya.”

⁴³ Mundu mwenoyo yalola vwangu; nalonda Yesu, nasanditsanga Nyasaye. Lwa shituma shia vandu valola ndio, voosi vitsominya Nyasaye.