LIVALITSWA 6 - IBIBILIA INDAKATIFU MU LUTIRICHI LWITAKHO NENDE LWISUKHA

Malako ka Vanaziri Valonda

¹ Mwami Nyasaye yavoolela Musa,

² “Lomoloma khu Vaisraeli, uvavoolele, niiva mundu musatsa inoho mukhali aliitsa khulaaka khuva Munaziri, lilaaka liu khukholwa khuva mutakatifu khu Mwami Nyasaye,

³ aliitsa khuvula khung'wakhu idivai inoho malwa inoho shilulu shialombwa khu idivai inoho khu matunda ki idivai yuminywa. Aliitsa khulekha khung'wakhu matsi ki ichumbi ki misabibu inoho khulia matunda kene inoho matunda kandi koosi.

⁴ Khumatukhu koosi ka aliitsa khuva nali Munaziri, aliitsa khulekha khuliakhu shindu shiosi shialombwa khu matunda ki misabibu, khali tsinzoli inoho makhanda khurula khu matunda ku musabibu.

⁵ “Khumatukhu koosi ka yalaaka khuva Munaziri, aliitsa khulekha khukhalakakhu liswi lielie inoho khuliveka. Khwisuuha khwekhwe khuliitsa khumwikalila, khutukha lwa aliitsa khumala matukhu koosi ka yalaaka khukholwa mutakatifu khu Mwami Nyasaye. Namali khukhola ndio, nalwo lwa aliitsa khuyumbitsa matelu keke.

⁶ Khumatukhu koosi ka yalaaka khuva mutakatifu khu Mwami Nyasaye, aliitsa khulekha khwisuundakhu himbi khu mmbili ku mukhutsu.

⁷ Khali niiva tata wewe inoho mama wewe inoho amwavo wewe inoho mbotso wewe aliitsa khukhutsa, aliitsa khulekha khwiyononyinya shichila vo; shichila shindu shimanyinyanga wakholwa khuva mutakatifu khu Nyasaye shili mu liswi lielie.

⁸ Khumatukhu koosi kaliitsa khuva nali Munaziri, aliitsa khutsililila khuva mutakatifu khu Mwami Nyasaye.

⁹ “Niiva mundu aliitsa khukhutsila vwangu himbi hali, nakhwo khuvoola aliitsa khuva wayononyinya liswi lielie liakholwa khuva litakatifu, mundu mwenoyo aliitsa khulekha liswi lielie. Aliitsa khuliveka khulitukhu lia aliitsa khuva nakholelwi khuva munihu. Aliitsa khuliveka khulitukhu lia saba.

¹⁰ Khulitukhu lia munane, aliitsa khulera vituti vivili inoho vinamusotsi vivili khu musalisi, mu vwinjililu vwi Liheemo Litakatifu.

¹¹ Musalisi aliitsa khusinza shilala, khuli shihanwa shiu khurulitsaho vwoni khandi shindi khuli shihanwa shiu khusambwa, khukhola mulukha ku khumukhola khuva munihu, shichila yatiila khu mmbili ku mukhutsu. Khulitukhu lienelo, aliitsa khukhola liswi lielie khuva litakatifu khandi,

¹² nu khukhola matukhu keke ku khuva Munaziri khuva matakatifu khandi khu Mwami Nyasaye. Matukhu kali kakhale kavira yako kaliitsa khulekhwa khuvalitswa, shichila liswi lielie liali liayononyinywa. Aliitsa khulera shimeme shi likondi lili nu muhika mulala khuli shi shihanwa shiu khuvasa.

¹³ “Lwa Munaziri aliitsa khuva namali khurweshitsa ka yalaaka, aliitsa khukhola mulukha. Aliitsa khuhilwa mu vwinjililu vwi Liheemo Litakatifu

¹⁴ ahaane khu Mwami Nyasaye, miruku chivaka vuchila imbala yosi: likondi limiiko liu muhika mulala, khuli shihanwa shiu khusambwa, khandi shimeme shikhali shi likondi, lili nu muhika mulala khuli shihanwa shiu khurulitsaho vwoni.

¹⁵ Aliitsa khuhaana khandi mikati mu muhinda chialombwa vuchila mamela: mikati militoho chialombwa khu vusi, vwa tsukanywa na makura ku musayituni nende visikuti via vekhwakhu makura ku musayituni. Aliitsa khumeetakhu vihanwa vi imu nende idivai.

¹⁶ “Musalisi aliitsa khuhaana vihanwa vienevo viosi khu Mwami Nyasaye; khandi ahaane shihanwa shiu khurulitsaho vwoni nende shihanwa shiu khusambwa.

¹⁷ Aliitsa khuhaana muhinda kwi mikati chialombwa vuchila mamela; nu khusinza limiiko khuli shihanwa shiu khulera milembe khu Mwami Nyasaye, halala ni shihanwa shi imu nende shi idivai.

¹⁸ Munaziri aliitsa khuveka liswi lielie, lia yakhola khuva litakatifu mu vwinjililu vwi Liheemo Litakatifu. Aliitsa khuvukula liswi lienelo khu lira mu mulilu kwi shihanwa shiu khulera milembe.

¹⁹ “Lwa Munaziri aliitsa khuva namali khuveka liswi lielie, lia yakhola khuva litakatifu, musalisi aliitsa khuvukula inyama yi liveka li likondi limiiko, mukati nende shisikuti shialombwa, vuchila mamela khurula mu muhinda khuvira mu makhono ku Munaziri, namali khuveka liswi lielie lia yisuuha aliitsa khuvula khuveka.

²⁰ Lulondakhu, musalisi aliitsa khuvihaana khu Mwami Nyasaye, khuli shihanwa shilahi shiene. Viliitsa khuva vihanwa vitakatifu viu musalisi, khumeeta khu tsimbele nende shilenje shi likondi limiiko, via musalisi anyolanga khulondokhana khu malako. Niyakhamala khukhola ndio, Munaziri anyala khung'wa idivai.

²¹ “Yaka nako malako ka Vanaziri, valiitsa khulonda; navutswa niiva Munaziri walaaka khuhaana khwinzi Mwami Nyasaye shihanwa shikali khuvira shia yenyekhanga khuhaana, aliitsa khurweshitsa vutswa shia yalaaka aliitsa khuhaana.”

Khuli Musalisi Akasitsa Vandu

²² Mwami Nyasaye yavoolela Musa,

²³ “Voolela Haruni nende vaana veve khurumishila makhuva yaka, lwa valiitsa khuva nivakasitsanga Vaisraeli,

²⁴ ‘Mwami Nyasaye amukasitse nu khumulinda vulahi vwene;

²⁵ Mwami Nyasaye amukholele malahi nu khumulolela tsimbavasi;

²⁶ Mwami Nyasaye amukholele malahi khandi mumenye mu milembe.’ ”

²⁷ Mwami Nyasaye yavoola, “Niiva Haruni nende vaana veve, valiitsa khukasitsa Vaisraeli khuvirila mu lira lianje, niitsa khuvakasitsa.”