LIVALITSWA 16 - IBIBILIA INDAKATIFU MU LUTIRICHI LWITAKHO NENDE LWISUKHA

Kora, Datsani, nende Abiramu Vahinganyinya Musa

¹ Kora, mwana wa Izuhari, mwana wali wa Kohaatsi, mwana wa Levi, halala na Datsani nende Abiramu vaana va Eliabu, halala na Onu, mwana wa Peletsi, varulanga mu vandu vuluhia lwa Rubeni,

² vahinjitsa Musa. Vavukula vandu tsimia tsivili na makhomi karanu, voosi nivali vimilili vamanyikhana va Vaisraeli, vali ni varovolwa khuva valala khu vi shikhaalo.

³ Vivunjelitsa imbeli wa Musa nende Haruni, nivavoola, “Muli vavirililu! Vaisraeli voosi ni vatakatifu, shia mundu wosi khuvo, khandi Mwami Nyasaye ali navo. Shichila shina mwivukulanga vene, khuva vimilili va vandu vu Mwami Nyasaye?”

⁴ Lwa Musa yahulila makhuva kenako, yakwa hasi mahunama,

⁵ navoolela Kora nende valondi veve, “Mukamba mu mavwevwe, Mwami Nyasaye aliitsa khukhumanyinya, ni viina uli wewe, uli mutakatifu; khandi unyala khuhaana vihanwa khuye. Mundu wu Mwami Nyasaye, aliitsa khurovola naye wa aliitsa khukhola khwisuunda himbi khuye.

⁶ Kora, yivi nende valondi vovo voosi khutukha mukhole makhuva yaka: Muvukule tsinjio tsiu khusambilakhu vubani,

⁷ murekhu mulilu nu vubani vu khusambilamu khu vwaali. Mundu wu Mwami Nyasaye aliitsa khuva narovoole, neye uliitsa khuva mutakatifu. Munyi vandu vu lwivulu lwa Levi, muli vandu vavirililu!”

⁸ Musa yavoolela Kora khandi, “Munyi vandu vu lwivulu lwa Levi, muhulishitsi!

⁹ Mukanakananga ni likhuva litititi khu Nyasaye wa Israeli khumwahula haluveka mu Vaisraeli voosi, khwisuunda khuye, khukhola muhinzilu kwenyu mu Liheemo Litakatifu liu Mwami Nyasaye, khukholela Vaisraeli mihinzilu nu khuvarumishila?

¹⁰ Wamuhuchilila munyi, halala na vandu vandi vuluhia lwa Levi khunyola luyali lwenolo -- khandi nunundi muchelitsanga khunyola khandi muhinzilu ku khuva vasalisi!

¹¹ Lwa mung'ung'unanga shichila Haruni, ni kilikali munyi nende valondi venyu, muhinganyinyanga Mwami Nyasaye.”

¹² Nalwo lwa Musa yalaanga Datsani nende Abiramu, nivali vaana va Eliabu. Navutswa vavoola, “Shiukhutsitsanga khwitsa tawe!

¹³ Wakhola shindu shitamanu muno, lwa wa khurulitsa mu shivala shia Misri, shili nu vuhinda khandi lilova lilahi nende vushi, khukhulera khukhutsila mwichendanyama yumu. Wenyanga khukhwimilila nunundi khandi?

¹⁴ Ni kilikali, ushili khukhulera mu shivala shi lilova lilahi nende vushi inoho khukhuha milimi nende milimi chi misabibu, khuva chieru vene; khandi nunundi uchelitsanga khukhukaata. Shiukhutsitsanga khwitsa tawe!”

¹⁵ Musa yali nu vurima, navoolela Mwami Nyasaye, “Uvuli khuhuchililakhu shihanwa shiosi, shia vandu yava vakhulerela. Shili khukholelakhu khali mulala khuvo shindu shitamanu. Khali shili khuvukulakhu, indala khu tsipunda tsiavo.”

¹⁶ Musa yavoolela Kora, “Yivi nende valondi vovo khwitsa muliitsa mukamba khu Liheemo Litakatifu, Haruni aliitsa khuvaho khandi,

¹⁷ shia mulala khu munyi, aliitsa khwitsa ni shindu shieshie shiu khusambilamu vubani, khuramu vubani, nu khuvihaana khu vwaali.”

¹⁸ Shia mundu wosi yavukula shindu shieshie, shiu khusambilakhu vubani, nahaambitsakhu mulilu khandi navikhakhu vubani, nivasinjila halala na Musa nende Haruni, mu vwinjililu vwi Liheemo Litakatifu.

¹⁹ Kora yalaanga halala Vaisraeli voosi, nivasinjila khuluveka lundi, nivaheenzi Musa nende Haruni, mu vwinjililu vwi Liheemo Litakatifu. Nonoho lwa vukhumi vu Mwami Nyasaye vwashila Vaisraeli voosi,

²⁰ ma Mwami Nyasaye, navoolela Musa nende Haruni,

²¹ “Mwiyahule vene khurula mu Vaisraeli voosi, vali hanu yava, ninzi vativitsi vwangu.”

²² Navutswa Musa nende Haruni, vakwa hasi mahunama, nivavoola, “Nyasaye, nivi shirula shiu vulamu vwosi. Lwa mundu mulala akholanga vwoni, ulolelanga vurima vandu voosi?”

²³ Mwami Nyasaye yavoolela Musa,

²⁴ “Voolela vandu voosi, ‘Ruli vwangu mu maheemo ka Kora, Datsani nende Abiramu vamenyamu.’ ”

²⁵ Musa yasinjila, natsia ha Datsani nende Abiramu vali nivali; ma vimilili va Vaisraeli nivamulonda.

²⁶ Yavoolela vandu, “Sinjili ihale wene, khurula mu maheemo ka vandu vatamanu yava! Muvuli khutiilakhu khali khu vindu viavo viosi; inoho munyala khumululwa, halala navo shichila vwoni vwavo.”

²⁷ Vasinjila ihale wene, khurula mu maheemo ka Kora, Datsani, nende Abiramu vamenyamu. Datsani nende Abiramu, vali nivali ilwanyi, khandi vali nivasinjile mu vwinjililu vwa maheemo kavo, halala na vakhali vavo nende vaana vavo.

²⁸ Musa yavoolela vandu, “Nindi mutsitsanga khumanya ndi Mwami Nyasaye undumi khukhola vindu yivi viosi khandi shikali nu khulondokhana khu tsinganakani tsianje tsichili nivikhola tawe:

²⁹ Niiva vandu yava vanyala khukhutsa vutswa, vuchila khusalilitswa na Nyasaye, kalolekhanga Mwami Nyasaye anyala khuva shiyanduma tawe.

³⁰ Navutswa niiva Mwami Nyasaye aliitsa khukhola shindu, shia mushili khali khuhulilakhu, na lilova lihutushi nu khumumiila munyi, halala ni miandu chiavo, khwililitswa nivashili mwoyo khutsia mu shilindwa; muliitsa khumanya ndi vandu yava vambakhane Mwami Nyasaye.”

³¹ Lwa Musa yali namali khulomoloma, havundu ha Datsani nende Abiramu vali nivasinjile hatikha manihalama

³² namiila vo nende vandu vi tsinzu tsiavo, halala na valondi va Kora voosi nende miandu chiavo.

³³ Viyinikha hasi, nivashili mwoyo nivatsia mu shilindwa, halala ni miandu chiavo. Lilova lia vakhunikha, manivakora.

³⁴ Vaisraeli voosi, vali nivaliho himbi vilukha, lwa vahulila nivalilanga. Valaanjilila, nivavoola, “Khwilushi! Lilova linyala khandi khukhumiila khutsi!”

³⁵ Mulilu kwarula khu Mwami Nyasaye, nu kusamba vandu tsimia tsivili na makhomi karanu vali nivasambi vubani khuye.

Vindu viu Khusambilakhu Vubani

³⁶ Mwami Nyasaye yavoolela Musa,

³⁷ “Voolela musalisi Eliazari, mwana wa Haruni, arulitse vindu viu khusambilakhu vubani vialombwa khu mukasa, khurula mu mivili chia vandu vasambwa, nu khusiuva mandaa karulimu havundu handi vutswa, shichila vindu viu khusambilakhu vubani ni vitakatifu.

³⁸ Viakalukhana khuva vitakatifu, lwa vialerwa khu vwaali vu Mwami Nyasaye khuvukula vindu viu khusambilamu vubani, via vandu viirwa shichila vwoni vwavo, uviraanyinyi mu mavati manyelele, ma ulombe shindu shiu khukhunishila vwaali. Shiliitsa khuva shindu shiu khuchelihitsa Vaisraeli.”

³⁹ Nalwo lwa musalisi Eliazari yavukula vindu viu khusambilakhu vubani, maniyiraanya mu mavati manyelele khulomba shindu shiu khukhunikha khu vwaali.

⁴⁰ Yishi nashio shiali lichelihitso khu Vaisraeli ndi mundu wosi ukharulanga mu vitsukhulu va Haruni shikenyekhanga atsikhu khu vwaali khusambilakhu vubani vu Mwami Nyasaye tawe. Nikakhavele kario, anyala khwiirwa khuli Kora nende vandu veve viirwa. Yaka koosi kakholekha khuli Mwami Nyasaye yali navoolele Eliazari khuvirila khu Musa.

Haruni Yahonyinya Vandu

⁴¹ Litukhu lialondakhu mu mavwevwe, Vaisraeli voosi vililila, shichila Musa nende Haruni nivavoola, “Munyi mwayiira valala khu vandu vu Mwami Nyasaye.”

⁴² Lwa vandu vali nivamali khwakanila imbeli wavo, khwivaala makhuva kachilanga nivililila, Musa nende Haruni vakalukhana, nivaheenza khu Liheemo Litakatifu. Valola malesi nikakhunikhanga Liheemo Litakatifu, ma vukhumi vu Mwami Nyasaye nuvulolekha.

⁴³ Musa nende Haruni vasimukha, nivatsia khusinjila imbeli wi Liheemo Litakatifu

⁴⁴ ma Mwami Nyasaye navoolela Musa,

⁴⁵ “Sinjila ihale wene, khurula mu vandu yava, nikanyalikha khuvativitsa ha vali yaho vwangu.” Musa nende Haruni, vakwa hasi mahunama,

⁴⁶ ma Musa navoolela Haruni, “Vukula luchio lwolwo lu khusambilakhu vubani, uremu vubani, nu mulilu kurulanga khu vwaali; khandi utsi vwangu khu Vaisraeli, khuvakholela mulukha ku khuvasemeha. Mwami Nyasaye umali khuraanga khukhulolela vurima; khali vulwale vwakharaanga khulolekha.”

⁴⁷ Haruni yakhola ka yavoolelwa, navukula luchio lwelwe lu khusambilakhu vubani. Yilukhaka, natsia hakari mu vandu vali nivaliho. Lwa yalola ndi vulwale vumali khuraanga khulolekha, yavikha vubani mu mandaa ku mulilu, nakhola mulukha ku khusemeha vandu.

⁴⁸ Yasinjila hakari ha vandu vali nivashili mwoyo, nende yavo vali nivakhutsa, ma vulwale nuvukora.

⁴⁹ Navutswa vandu tsiheelefu likhomi na vane ni tsimia saba vakhutsa, shichila vulwale vwenovo, khumeeta khu yavo vali nivakhutsa khale, shichila vutamanu vwa Kora yali niyakhola.

⁵⁰ Lwa Haruni yakalukha khu Musa, wali nali mu vwinjililu vwi Liheemo Litakatifu, vulwale vwali nuvukori.