LIVALITSWA 1 - IBIBILIA INDAKATIFU MU LUTIRICHI LWITAKHO NENDE LWISUKHA

Livalitswa Liukhuraanga lia Vaisraeli

¹ Mwami Nyasaye yalomoloma khu Musa, mu Liheemo Litakatifu mu Shiangalangwi shia Sinai, khulitukhu liu khuraanga liu mweli kwa khavili, khumuhika kwa khavili lwa Vaisraeli, vali nivakharula mu shivala shia Misri. Yavavoolela,

² “Muvalitse vandu vi tsimbia tsiosi tsia Israeli, khuraanjila khu tsinzu nende tsinzivulu, numuhandika shia mundu wosi lira lielie, shia mulala.

³ Yivi nende Haruni Vaisraeli voosi muliitsa khuvalitsakhulondokhana khu tsinzu nende tsinzivulu tsiavo, vandu voosi vali ni mihika makhomi kavili inoho vali ni mihika minyishi, vanyala khutsia khukwana muliihe.

⁴ Voolela mwimilili mulala wa shia inzu khurula mu shia luhia khumukhonya.”

⁵ Mira ka vandu vatsitsanga khukhukhonya ni Elizuri mwana wa Shedehuri khurula mu vandu vuluhia lwa Rubeni;

⁶ Shelumieli mwana wa Zurishadai khurula mu vandu vuluhia lwa Simioni;

⁷ Nahashoni mwana wa Aminadabu khurula mu vandu vuluhia lwa Yuda;

⁸ Netsaneli mwana wa Zuhari khurula mu vandu vuluhia lwa Isakari;

⁹ Eliabu mwana wa Heloni khurula mu vandu vuluhia lwa Zabuloni;

¹⁰ varovola khurula mu vaana va Yosefu, khurula mu vandu vuluhia lwa Efurahimu, Elishama mwana wa Amihudi, nende Gamalieli mwana wa Pedahuzuri khurula mu vandu vuluhia lwa Manaase;

¹¹ Abidani mwana wa Gidioni khurula mu vandu vuluhia lwa Benyamini;

¹² Ahihezeri mwana wa Amishadai khurula mu vandu vuluhia lwa Dani;

¹³ Pagiheli mwana wa Okurani khurula mu vandu vuluhia lwa Asheri;

¹⁴ Eliasafu mwana wa Dehuheli khurula mu vandu vuluhia lwa Gadi;

¹⁵ nivarovola Ahira mwana wa Enani khurula mu vandu vuluhia lwa Nafutali.

¹⁶ Navo vali vimilili varovolwa khurula mu vandu vi tsimbia tsia Israeli, nivali vimilili va vandu vi tsimbia tsia vakuuka vavo. Navo vali vimilili vi tsinzivulu tsia Israeli.

¹⁷ Musa nende Haruni vavukula vandu vamira kavo, kali ni kahandikwa venavo,

¹⁸ nivalaanga halala Vaisraeli voosi khulitukhu liu khuraanga liu mweli khavili. Vandu vihandika mira kavo, khulondokhana khu tsinzu nende tsinzivulu tsiavo, khandi vandu vali ni mihika makhomi kavili inoho mihika minyishi vahandikwa shia mulala lira lielie,

¹⁹ khuli Mwami Nyasaye yali navoolele Musa akhole. Musa yavalitsa vandu mu Shiangalangwi shia Sinai.

²⁰ Vavalitsa vandu varulanga mu vitsukhulu va Rubeni, mwana mukhulundu wa Yakobo: Vandu vasatsa voosi vi mihika makhomi kavili inoho minyishi khuvira chienecho, vanyala khutsia khukwana muliihe, vahandikwa mira khulondokhana khu makhuva, kali nikahandikwa khale khu tsinzu tsiavo nende tsinzivulu tsiavo.

²¹ Vandu vavalitswa mu vandu vuluhia lwa Rubeni, vali tsiheelefu makhomi kane na sita ni tsimia tsiranu.

²² Vavalitsa vandu varulanga mu vitsukhulu va Simioni: Vandu vasatsa voosi vali ni mihika makhomi kavili inoho minyishi khuvira mihika chienecho, vanyala khutsia khukwana muliihe, vahandikwa mira, khulondokhana khu makhuva, kali nikahandikwa khale khu tsinzu tsiavo nende tsinzivulu tsiavo.

²³ Vandu vavalitswa mu vandu vuluhia lwa Simioni, vali tsiheelefu makhomi tisa ni tsimia tsivaka.

²⁴ Vavalitsa vandu vuluhia lwa Gadi: Vandu vasatsa voosi vali ni mihika makhomi kavili inoho minyishi khuvira mihika chienecho, vanyala khutsia khukwana muliihe, vahandikwa mira kavo, khulondokhana khu makhuva kali nikahandikwa khale khu tsinzu tsiavo nende tsinzivulu tsiavo.

²⁵ Vandu vavalitswa mu vandu vuluhia lwa Gadi, vali tsiheelefu makhomi kane na varanu tsimia sita na makhomi karanu.

²⁶ Vavalitsa vandu vuluhia lwa Yuda: Vandu vasatsa voosi vali ni mihika makhomi kavili inoho minyishi khuvira mihika chienecho, vanyala khutsia khukwana muliihe vahandikwa mira kavo, khulondokhana khu makhuva, kali nikahandikwa khale khu tsinzu tsiavo nende tsinzivulu tsiavo.

²⁷ Vandu vavalitswa mu vandu vuluhia lwa Yuda, vali tsiheelefu makhomi saba na vane ni tsimia sita.

²⁸ Vavalitsa vandu vuluhia lwa Isakari: Vandu vasatsa voosi vali ni mihika makhomi kavili inoho minyishi khuvira mihika chienecho, vanyala khutsia khukwana muliihe vahandikwa mira kavo, khulondokhana khu makhuva kali nikahandikwa khale khu tsinzu tsiavo nende tsinzivulu tsiavo.

²⁹ Vandu vavalitswa mu vandu vuluhia lwa Isakari vali tsiheelefu makhomi karanu na vane ni tsimia tsine.

³⁰ Musa yavalitsa vandu vuluhia lwa Zabuloni: vandu vasatsa voosi vi mihika makhomi kavili inoho khuvira mihika chienecho vali ni tsingulu tsiu khutsia khukwana muliihe vahandikwa mira kavo, khulondokhana khu makhuva kali nikahandikwa khale khu tsinzu tsiavo nende tsinzivulu tsiavo.

³¹ Vandu vavalitswa mu vandu vuluhia lwa Zabuloni vali tsiheelefu makhomi karanu na saba ni tsimia tsine.

³² Vavalitsa vaana va Yosefu, nivali vitsukhulu va Efurahimu: Vandu vasatsa voosi vali ni mihika makhomi kavili inoho minyishi khuvira mihika chienecho vanyala khutsia khukwana muliihe vahandikwa mira kavo, khulondokhana khu makhuva kali nikahandikwa khale khu tsinzu tsiavo nende tsinzivulu tsiavo.

³³ Vandu vavalitswa mu vandu vuluhia lwa Efurahimu vali tsiheelefu makhomi kane ni tsimia tsiranu.

³⁴ Vavalitsa vandu vuluhia lwa Manaase: Vandu vasatsa voosi vali ni mihika makhomi kavili inoho minyishi khuvira mihika chienecho, vanyala khutsia khukwana muliihe, vahandikwa mira kavo, khulondokhana khu makhuva, kali nikahandikwa khale khu tsinzu tsiavo nende tsinzivulu tsiavo.

³⁵ Vandu vavalitswa mu vandu vuluhia lwa Manaase, vali tsiheelefu makhomi kavaka na vavili ni tsimia tsivili.

³⁶ Vavalitsa vandu vuluhia lwa Benyamini: Vandu vasatsa voosi vali ni mihika makhomi kavili inoho minyishi khuvira mihika chienecho, vanyala khutsia khukwana muliihe, vahandikwa mira kavo, khulondokhana khu makhuva, kali nikahandikwa khale khu tsinzu tsiavo nende tsinzivulu tsiavo.

³⁷ Vandu vavalitswa mu vandu vuluhia lwa Benyamini vali tsiheelefu makhomi kavaka na varanu ni tsimia tsine.

³⁸ Vavalitsa vandu vuluhia lwa Dani: Vandu vasatsa voosi vi mihika makhomi kavili inoho minyishi khuvira mihika chienecho, vanyala khutsia khukwana muliihe, vahandikwa mira kavo, khulondokhana khu makhuva, kali nikahandikwa khale khu tsinzu tsiavo nende tsinzivulu tsiavo.

³⁹ Vavalitsa vandu vuluhia lwa Dani vali tsiheelefu makhomi sita na vavili ni tsimia saba.

⁴⁰ Vavalitsa vandu vuluhia lwa Asheri: Vandu vasatsa voosi vali ni mihika makhomi kavili inoho minyishi khuvira mihika chienecho, vanyala khutsia khukwana muliihe, vahandikwa mira kavo, khulondokhana khu makhuva, kali nikahandikwa khale khu tsinzu tsiavo nende tsinzivulu tsiavo.

⁴¹ Vandu vavalitswa mu vandu vuluhia lwa Asheri, vali tsiheelefu makhomi kane nu mulala ni tsimia tsine.

⁴² Vavalitsa vandu vuluhia lwa Nafutali: Vandu vasatsa voosi vi mihika makhomi kavili inoho khuvira mihika chienecho vanyala khutsia khukwana muliihe, vahandikwa mira kavo, khulondokhana khumakhuva, kali nikahandikwa khale khu tsinzu tsiavo nende tsinzivulu tsiavo.

⁴³ Vandu vavalitswa khurula mu vandu vuluhia lwa Nafutali, vali tsiheelefu makhomi karanu na vavaka ni tsimia tsine.

⁴⁴ Navo vandu va Musa, Haruni nende vimilili likhomi na vavili, va Vaisraeli vavalitsa, shia mulala nasinjililanga inzu ya vandu vuluhia lwelwe.

⁴⁵ Vandu vasatsa voosi Vaisraeli, vi mihika makhomi kavili inoho khuvira mihika chienecho vanyala khutsia khukwana muliihe, vavalitswa khulondokhana khu tsinzu tsiavo.

⁴⁶ Vandu vavalitswa voosi, vali tsiheelefu tsimia sita ni tsimia tsiranu.

⁴⁷ Navutswa vandu vu lwivulu lwa Levi, shivali vavalitswakhu halala na vandu vi tsinzivulu tsindi tawe,

⁴⁸ shichila Mwami Nyasaye, yali wavoolela Musa,

⁴⁹ “Lwa uliitsa khuvalitsa vandu vasatsa vanyala khutsia khukwana muliihe, lekha khuvalitsilamu vandu vu lwivulu lwa Levi.

⁵⁰ Navutswa warovola vandu vu lwivulu lwa Levi, khusinjilila Liheemo Litakatifu, halala na shia shindu shiosi shirumikhamu. Vali nu vunyali vu khuchinga Liheemo Litakatifu lienelo, halala ni vindu virumikhamu, khali via varumishilamu, nu khumbakha tsinzu tsiavo tsiu khumenyamu khundulu khwalio.

⁵¹ Havundu hosi, ha muliitsa khwisuunda khutsia khumenya, vandu vu lwivulu lwa Levi valiitsa khuvukula Liheemo Litakatifu khulikholomoshitsa havundu havisuunda yaho, nu khulisinjilitsaho. Mundu uliitsa khwisuundakhu khu Liheemo Litakatifu lienelo, aliitsa khwiirwa.

⁵² Vaisraeli valiitsa khuva nivarikale, valiitsa khumenya mu maheemo, khulondokhana khu tsinzu nende tsinzivulu tsiavo, shia mulala mu liheemo lielie, ni ipendera yeye.

⁵³ Navutswa vandu vu lwivulu lwa Levi valiitsa khumenya mu maheemo, kali himbi khundulu khwi Liheemo Litakatifu khwosi khulilinda, nikanyalikha mundu avuli khwisuundukhu himbi khulio, khukhola khulolela vurima Vaisraeli voosi.”

⁵⁴ Vaisraeli vakhola shia shindu shiosi, khuli Mwami Nyasaye yali niyavoolela Musa vakhole.