LITSUSHITSWA 32 - IBIBILIA INDAKATIFU MU LUTIRICHI LWITAKHO NENDE LWISUKHA

¹ “Yivi likulu, uhulishitsi makhuva kaanje, yivi lilova, uhulili makhuva kambolanga.

² Leshi mechitso kaanje karonye khuli imbula lilomoloma lianje lishi khuli liime, khuli imbula inyililanga niroonya khu vunyasi vuvisi, khuli imbula ikhuvanga mu vunyishi nikwa khu viraakwa vitoro.

³ Niitsa khwitsominya lira liu Mwami Nyasaye, na munyi muliitsa khuvoola, ‘Nyasaye weru nu wi tsingulu tsinyishi!’

⁴ “Mwami Nyasaye neye lwanda lu vulindi vulahi; mihinzilu chiechie ni chiatoto. Neye Nyasaye uli musuuvilwa vuchila vutamanu muye, neye wu kholanga vikholwa vilahi khandi viu vulunji.

⁵ Navutswa muli vakoyanu khuye; khali shiumuli vaana veve, shichila vwoni vwenyu, munyi vandu vi likhula liu vwoni khandi vakoyana.

⁶ Munyi vandu vayiingwa khandi vavula vusitsa, nindi munyala khukhola Mwami Nyasaye? Kanyala khuva neye tata wenyu, wamuloonga, wamulomba khandi namuha tsingulu?

⁷ “Mwitsushitsikhu shindu khumatukhu kavira, kanakanikhu vandu va matukhu kali kakhale; reevikhu vakuuka venyu vamuvoolele kikholekha, reevikhu vasakhulu vamwivaalile makhuva shichila matukhu kavira.

⁸ Lwa Nyasaye Uli Ikulu khu Viosi yakavulila vandu vi tsimbia tsiosi miandu chiavo; lwa yakavula vandu, neye waviritsa mipaka chia vandu, khurulana khu vunyishi vwa vandu,

⁹ navutswa yivukulila vandu veve mwene, yarovola vandu vi inzu ya Yakobo khuva miandu chiechie.

¹⁰ “Yavanyola nivahuya huyanga mu shiangalangwi, mu shivala shiahangalala, ni imbuutsa inditoho. Yavashinga navalinda vulahi; yavalinda khuli indolelo yi imoni yeye.

¹¹ Yavalinda khuli shilitsa shilindanga shitsu shiashio, lwa shisila silanga khu viminyoli viashio, nishivambula tsimbaha tsiashio khuvikumila, nu khuvichinjila khu tsimbaha tsiashio.

¹² Mwami Nyasaye wonyene yimilila vandu veve, vuchila khukhonywa na nyasaye mucheni.

¹³ “Yavaha vunyali vu khwamiha vikulu viaraambiha, nivalia viraakwa viu mu milimi. Vanyola vushi vumbulimu mu lwanda; misala chiavo chi misayituni chiameela matunda mu lwanda lutinyakanu.

¹⁴ Vashela maveele manyishi mu tsing'ombe tsiavo nende tsimbuli; vali na mamiiko makhomeelu, tsimbuli tsikhomeelu nende tsing'ombe tsikhomeelu, inganu nende idivai indahi muno.

¹⁵ “Vaisraeli vali vakhomeelu, nivakwa vahingani; vali vakhomeelu, nivavira tsinda khandi nivava nu vuhinda; navutswa vivilila khu Nyasaye wali niyavaloonga, nivachaya Lwanda lwachila nivahonyinywa.

¹⁶ Misambwa chiavo chiachila nashendekha; vindu vi shifwavi via vakhola viachila navalolela vurima.

¹⁷ Vakhola misango khu matimoni, vuchila khukholela Nyasaye -- nivali vanyasaye va vakorwa, nivali vanyasaye vali nivalolekha vwangu yuvu, vanyasaye va vakuuka venyu vali nivambakhana khuha luyali.

¹⁸ Valekhana nu Lwanda lwali nu lwavaha vulamu; vivilila Nyasaye wavivula.

¹⁹ Mwami Nyasaye yalola kenako, navambakhana, shichila vaana vavo vi shiyayi nende vi shikhana vamurindila.

²⁰ Yavoola, ‘Niitsa khwivisa khurula khuvo,’ ndole kaliitsa khwikholekha khuvo lukhumalilikha, shichila ni vandu vi likhula liakoyana, vaana vamenyanga limenya livula vusuuvilwa.

²¹ Vachila nivashendeshela khuvirila khu nyasaye wi shikhaya, vandindila khuvirila khu misambwa chiavo. Niitsa khuvakhola vashendeshele vandu vi shikhaya niitsa khuvarindila lwa niitsa khuvarumila vandu vayiingwa.

²² Vurima vwanje vuliitsa khuhamba khuli mulilu nu khusamba shia shindu shiosi mu shihatisi, Vuliitsa khulaalitsa lilova nende shia shindu shiosi mulio, khali kuliitsa khulaalitsa misinji chi vikulu.

²³ “‘Niitsa khuchila matiinyu katsililile khuvakwila, nu khuvalesa ni mivanu chianje chiosi.

²⁴ Valiitsa khung'aha shichila inzala, valiitsa khutivitswa shichila murengo. Valiitsa khukhutsa shichila lukhutsu lutamanu. Niitsa khuruma tsinyama tsiumbulimu khuvinjilila, nende tsinzukha tsiu vutsiva khuvaluma.

²⁵ Vandu valiitsa khukhutsila mu tsinjila tsi litaala; valiitsa khutechela mu tsingo tsiavo. Vayayi vavukha nende vakhali vavukha valiitsa khukhutsa; khali vaana vatoro inoho vasakhulu valiitsa khuvula khwihonolokha.

²⁶ Ninzi wavoola, niitsa khuvativitsa khali vavuli khwitsushitswakhu.

²⁷ Navutswa ninzi wikalila vatsiku vavo khwichinjilila ndi vakuuri vandu vaanje, lwa inzi mwene navativitsa.’

²⁸ “Israeli nu luhia luvula vwoongo; luvula vusitsa vwosi.

²⁹ Niiva vakhavele nu vusitsa, vakhavele nivamanyi kenako, vakhamanyi vulahi vwene kaliitsa khuvakwila!

³⁰ Mundu mulala anyala khukuura vandu iheelefu indala, inoho vandu vavili vonyene vutswa khukuura vandu tsiheelefu likhomi? Mwami Nyasaye, uli Nyasaye wavo yali wavalekha; Nyasaye wavo uli nu vunyali yali wavambakhana.

³¹ Vatsiku vavo vamanya ndi vanyasaye vavo vene vateteshela, shivali nu vunyali khuli vwa Nyasaye wa Israeli tawe.

³² Vatsiku vavo vakoyana khuli mataala ka Sodomu nende Gomora, vali khuli misala chi misabibu chiamanga matunda ku vutsiva;

³³ khuli idivai yalombwa khu vutsiva vwi tsinzukha, ili nu vutsiva khuli vwi tsinzukha.

³⁴ “Mwami Nyasaye yitsushitsanga ka vatsiku vavo vakholi; alindililanga litukhu lienyekhanga liu khuvasalilitsa.

³⁵ Mwami Nyasaye aliitsa khuvanza nu khuvasalilitsa; litukhu liliitsa khutukha lwa vamululwa; litukhu liu khutivitswa khwavo lili himbi khutukha.

³⁶ Mwami Nyasaye aliitsa khuhavina vandu veve lwa aliitsa khulola nivavwele tsingulu. Aliitsa khulolela tsimbavasi yavo vamurumishilanga, lwa aliitsa khulola vavula mundu unyala khuvakhonya.

³⁷ Mwami Nyasaye aliitsa khureeva vandu veve, ‘Khali vanyasaye vu vunyali vamwasuuvililanga yavo vali hena?’

³⁸ Mwavalomba nivalia shivana shi tsinyama tsia mwakholela misango manumuvaha idivai yu khung'wa. Leshi vitsi khumukhonya nunundi; leshi vitsi khumuhonyinya.

³⁹ “‘Inzi, khandi ninzi wonyene, neye Nyasaye; khali nyasaye wundi avulakhuho uli watoto. Nziiranga mambana vulamu, salilitsanga khandi mbonyinya, mundu avulakhuho unyala khuhinganyinya kakholanga.

⁴⁰ Khumatukhu koosi inzi Nyasaye shili mwoyo, njinganga mukhono kwanje mwikulu khwisuuha

⁴¹ ndi niitsa khuyakala shivavi shianje shimemanga nishihemukha khuli luheni, khulola ndi katoto kakholwangwa. Niitsa khuvanzila vatsiku vaanje ka vakholanga nu khusalilitsa yavo vahimanga inzi.

⁴² Mivanu chianje chiliitsa khwikholela masahi kavo, khandi nilirumishila shivavi shianje khwiira yavo voosi vahinganyinyanga inzi. Niitsa khuvula khwihonoloshitsa mundu ungwananga; khali vandu vasalilitswa nende vavohe valiitsa khukhutsa.’

⁴³ “Munyi vandu vi tsimbia tsindi tsiosi, mwitsominye Mwami Nyasaye -- asalilitsanga yavo voosi viiranga vandu veve. Avanzilanga vatsiku veve khandi asemeha vwoni vwa vandu veve.”

⁴⁴ Musa nende Yoshwa mwana wa Nuni vimba lwimbo yulu, khu vandu valuhulile.

Mivaalo ka Musa Kukhumalilikha

⁴⁵ Lwa Musa yali niyakhamala khwechitsa Vaisraeli mechitso ka Nyasaye,

⁴⁶ yavoola, “Kenyekhanga mulole ndi mulondi malako koosi, kamwechitsi nunundi. Mwechitsi khandi vaana venyu, khu vave vacheli khulonda mechitso koosi ka Nyasaye.

⁴⁷ Mechitso yaka, shikali vutswa makhuva mele tawe; nako vulamu vwenyu munyi vene. Mukalonde mamumenye khumatukhu manyishi mu shivala shili injelekha wu Muchela kwa Yorodani, shia muli himbi khutsia khumenyamu.”

⁴⁸ Khulitukhu lienelo, Mwami Nyasaye yavoolela Musa,

⁴⁹ “Simukha utsi khu Shikulu shia Abarimu shili mu shivala shia Moabu, khuluveka lundi lwi litaala lia Yeriko; nina khu Shikulu shia Nebo, ma uheenze shivala shia Kanaani, shiandi himbi khuha Vaisraeli khuva shiavo.

⁵⁰ Uliitsa khukhutsila khu shikulu shienesho, khuli amwavo wowo Haruni yakhutsila khu Shikulu shia Hori,

⁵¹ shichila munyi vavili mwambakhana khuva vasuuvilwa khwinzi imbeli wa Vaisraeli. Lwa mwali numuli ha tsisieveye tsia Meriba, himbi mu litaaala lia Kadeshi, lili Mwichendanyama mwa Sini, mwakholela inzi tsisoni imbeli wa vandu.

⁵² Khulwa yako, uliitsa khuheenza shivala shienesho nuli ihale wene; shiuliitsa khwinjila mu shivala shiambetsanga Vaisraeli tawe.”