LITSUSHITSWA 10 - IBIBILIA INDAKATIFU MU LUTIRICHI LWITAKHO NENDE LWISUKHA

Khuli Musa Yanyola Malako khuli Kukhuraanga

¹ “Mumatukhu kenako, Mwami Nyasaye yambolela, ‘Khonga machina kavili khuli kali ku khuraanga ma ulombe lisanduku liu khukavikhamu khu musala. Tikulukha khu shikulu witsi khwinzi,

² ninzi niitsa khuhandika khu machina kakhongwa kenako makhuva ka nali nahandika khu machina ka waraanyinya, ma ukare mu lisanduku.’

³ “Nalwo lwa nalomba lisanduku khu musala ku munyenye, manimbatsa machina kavili kakhongwa khuli kali ku khuraanga manimbila khu shikulu.

⁴ Mwami Nyasaye yahandika khu machina kenako, makhuva malala mele ka yali niyahandikakhu lukhuraanga, Malako Likhomi, ka yamuha lwa yalomoloma khu munyi khuvirila mu mulilu khulitukhu lia mwakanila ha shikulu. Mwami Nyasaye yamba machina kenako.

⁵ Nishevukha ninzikha hasi khurula khu shikulu, maninda machina kenako mu lisanduku lia nali ninombi, khuli Mwami Nyasaye yali nambolele khole; khandi kaliho nunundi.”

⁶ Vaisraeli vraanjila luchendo lwavo ha Tsisieveye tsia Yahakani, nivatukha mu litaala lia Mosera. Haruni yakhutsilaho, ma mmbili kwekwe nu kuyeveelwa mu shilindwa; ma mwana wewe Eliazari nava musalisi havukono hehe.

⁷ Varulayo nivatsia mu litaala lia Gudigoda nivatukha havundu halaangwangwa Yotibatsa, havundu ha matsi manyishi kali nikitsula.

⁸ Mumatukhu kenako, Mwami Nyasaye yarovola vandu vu lwivulu lwa Levi khuchinga Lisanduku li Lilakano, khurumikha khuli vasalisi, khandi khukasitsa vandu khuvirila khu lira lielie. Mihinzilu yichi nachio chia vakholanga khali nunundi.

⁹ Nashio shivune shichilanga vandu vu lwivulu lwa Levi nivavula khunyolakhu lusomo lwosi, khuli vandu vi tsimbia tsindi vanyola; vaheelwa vwiyangu vu khuva vasalisi vu Mwami Nyasaye, khuli Mwami Nyasaye, uli Nyasaye wenyu yali niyalaaka aliitsa khuvaha.

¹⁰ “Namenya khu shikulu khumatukhu makhomi kane mbasu nu vutukhu, khuli lwa nakhola lwali lukhuraanga. Mwami Nyasaye yambulishitsa khandi, manimbula khwiira munyi.

¹¹ Nalwo lwa Mwami Nyasaye yambolela, ‘Rula hanu, uraanje luchendo lu khwimilila vandu vaanje, khutsia khwinjila mu shivala shia nalaaka, niitsa khuha vakuuka vavo.’

Ka Nyasaye Yenyanga Khukhole

¹² “Khulwa yako, munyi Vaisraeli, muhulishitsi shia Nyasaye yenyanga mukhole, ‘Musaale khu Mwami Nyasaye khandi mukhole koosi ka yenyanga mukhole. Mumuyaanze, ma mumurumishile nu mwoyo kwosi,

¹³ khandi mulonde malako keke koosi.’ Muheetsanga malako nende mechitso yaka nunundi khu kamukhonye.

¹⁴ Khali niiva likulu ni liu Mwami Nyasaye, lilova ni lielie nende vindu viosi vili mulio,

¹⁵ navutswa khali ndio, Mwami Nyasaye yali wayaanza muno vakuuka venyu manamurovola vuchila khurovola vandu vandi vutswa; khali nunundi mushili vandu veve va yarovoola.

¹⁶ Khulwa yako, khuraanjila nunundi mulonde malako ku Mwami Nyasaye, ma muvuli khuva vahaaka.

¹⁷ Mwami Nyasaye, uli Nyasaye wenyu ali ni tsingulu khuvira vanyasaye vandi voosi nende vami vandi voosi. Ali ni tsingulu, vunyali khandi utushili khuheelwa luyali. Shianyala khwihonela mundu inoho khuheelwa asoya tawe.

¹⁸ Akholelanga vavisandu nende vakhutsakhali katoto; khandi wayaanza vandu vi tsimbia tsindi, khuvaha shiukhulia nende tsinguvu.

¹⁹ Muliitsa khuyaanza khandi vandu vacheni venavo, shichila khali munyi vene mwamenyanga khuli vacheni mu shivala shia Misri.

²⁰ Muhe Mwami Nyasaye, uli Nyasaye wenyu luyali; nu khusaala khuye wonyene vutswa. Muve vasuuvilwa khuye, khandi mwisuuhi khuvirila khu lira lielie lionyene vutswa.

²¹ Neye wamwitsominya; ni Nyasaye wenyu, umukholele vindu viu khuchenyinya khandi viu khurishitsa, via muloli ni tsimoni tsienyu.

²² Vakuuka venyu vasimukha nivatsia mu shivala shia Misri, nivali isavu ya vandu makhomi saba. Navutswa nunundi Mwami Nyasaye, uli Nyasaye wenyu wachila mwayivulana mu vunyishi, khuli tsinyining'ini mu malesi.