LIKHUNULILWA 5 - IBIBILIA INDAKATIFU MU LUTIRICHI LWITAKHO NENDE LWISUKHA

Shimeme shi Likondi Shiavukula Shitabu Khurula khu Nyasaye

¹ Nalola shitabu mu mukhono musatsa kwa woyo wikhalanga khu shisoko shiu vwami. Shitabu shienesho shiali shiahandikwa khu tsimbeka tsiosi; khandi shiali shiayikalwa na makafuli saba.

² Nalola khandi injelosi yu vunyali, nivoolanga nu mwoyo mukali, “Ni viina utushili khwikula makafuli khandi khukhunula mu shitabu yishi”

³ Navutswa mundu avulakhuho mwikulu inoho khulilova inoho hasi hene mu shihatisi, wali nu vunyali vu khukhunula shitabu nu khukola mushio.

⁴ Nalila vululu tsikhwili muno, shichila mundu avulakhuho wanyolekhakhu utushili khukhunula shitabu inoho khukola mushio.

⁵ Nalwo lwa mulala khu vasakhulu venavo yambolela, “Lekha khulila! Lola! Isimba khurula mu vandu vuluhia lwa Yuda, uli mwitsukhulu wa Daudi, wamala khukuura, khandi neye uli nu vunyali vu khumeneka makafuli saba nu khwikula shitabu.”

⁶ Nikamali khwikholekha, nalola Shimeme shi Likondi nishisinjile hakari wi shisoko shiu vwami, nishimali khuvotokhanwa ni vilombe vine vili mwoyo nende vasakhulu. Shimeme shi Likondi shienesho shialolekhanga khuli shiayiirwa. Shiali ni tsinzika saba nende tsimoni saba, tsili khuli miroho saba varulanga khu Nyasaye varumwa shia havundu hosi mu shivala.

⁷ Shimeme shi Likondi shienesho, shiasimukha nishitsia khuvukula shitabu khurula mu mukhono musatsa kwa woyo wikhalanga khu shisoko shiu vwami.

⁸ Nishimali khukhola kenako, vilombe vine vili mwoyo nende vasakhulu makhomi kavili na vane, vasikama khwinamila Shimeme shi Likondi. Shia shilombe, shiali nu vukhana nende tsibakuli tsiali ni tsialombwa khu itsahabu nitsitsuli vubani, nivili khuli lisaala lia vandu va Nyasaye.

⁹ Vimba lwimbo luyia nivavoola: “Nivi utushili khuvukula shitabu nu khwikula. Nivi wali nu wiirwa, khandi khuvirila mu musango kwi likhutsa liolio nivi wahonyinya vandu va Nyasaye khurula mu shia luhia, lulomolomo, shivala nende lwivulu lwosi.

¹⁰ Nivi wa valomba khuva vwami vwa vasalisi khurumishila Nyasaye weru; khandi navo valiitsa khwamiha khulilova.”

¹¹ Naheenza khandi, manimbulila tsinjelosi tsinyishi, tsinyala khuvula khuvalitswa! Tsiavotokhana khu shisoko shiu vwami, vilombe vine vili mwoyo nende vasakhulu,

¹² khandi nitsimba lwimbo nu mwoyo mukali nitsivoola: “Shimeme shi Likondi shiali nishiirwa shitushili khunyola vunyali, miandu, vusitsa, ni tsingulu, luyali, vukhumi nu khwitsominywa!”

¹³ Nahulila khandi shia shilombe shiosi mwikulu, khulilova, hasi mulilova nende mu inyanza nende vindu viosi vimenyamu, nivimbanga lwimbo: “Khu woyo wikhalanga khu shisoko shiu vwami nende Shimeme shi Likondi, vitsominywi nu khuheelwa luyali, vukhumi nende vunyali, mihika ni mihika!”

¹⁴ Vilombe vine vili mwoyo viachipa, “Amina!” Khulwa yako, vasakhulu vasikama hasi nivasaala.