LIKHUNULILWA 4 - IBIBILIA INDAKATIFU MU LUTIRICHI LWITAKHO NENDE LWISUKHA

Khuli Lisaala Likholwangwa Mwikulu

¹ Yaka nikamali khuvira, nalola malolo kandi nindola muliango nu kwikushi kwalame mwikulu. Mwoyo kwa nahulila lukhuraanga nu kulomolomanga khwinzi khuli shisiliva, kwavoola, “Hamba ikulu hanu; ninzi nzitsanga khukhumanyinya makhuva katsitsanga khwikholekha yaka nikamali khuvira.”

² Nonoho Roho yanzimilila, nindola shisoko shiu vwami mwikulu mundu niyikhalekhu.

³ Mundu wali niyikhale khu shisoko shienesho, yasasanga khuli machina ku vukuuli vululu khuli machina ku vulimu nende lichina liang'ang'anga limuuchi. Luhembo lwasasanga vulimu lwa votokhana khu shisoko shiu vwami.

⁴ Khwali ni visoko vindi makhomi kavili na vine, nivivotokhane shisoko shiu vwami; khandi vasakhulu makhomi kavili na vane vali nivikhale khuvio. Vasakhulu venavo vali nivifwali tsinguvu tsindavu nende tsitaachi tsiali ni tsialombwa khu itsahabu khu mirwi chiavo.

⁵ Tsimemo tsiu luheni, khandi liyooko liu khuhilikana khwi likulu viahulilikhana khurula khu shisoko shiu vwami shiali nishili hakari hi visoko vindi. Tsitaaha saba, tsili khuli miroho saba varumishilanga Nyasaye tsiakhanga khuli mulilu imbeli wi shisoko shiu vwami.

⁶ Imbeli wi shisoko shiu vwami shienesho, khwaliho ni shindu shisasanga khuli inyanza nilenjeli khuli shiho, khuli machina ki imparafu. Shia mu tsimbeka tsiosi tsi shisoko shiu vwami shienesho, khwalimu ni vilombe vili mwoyo vine vili ni tsimoni imbeli nende inyuma.

⁷ Shilombe shiu khuraanga shiasasanga isimba; shia khavili shiasasanga khuli shihunwa; shia khavaka shiali ni likoondo khuli liu mundu; na shia khane shiasasanga khuli shilitsa nishipulukhanga.

⁸ Shia shilombe khu vilombe vine vili mwoyo vienevo, shiali ni tsimbaha sita; khandi viali ni tsimoni shia shia havundu hosi, khali mukari nende ikulu washio. Viatsililila khwimba tsinyimbo mbasu nu vutukhu nivoola: “Mutakatifu, Mutakatifu, Mutakatifu, neye Nyasaye Uli Ikulu khu Viosi, waliho, uliho nunundi, khandi wenyekhanga khwitsa.”

⁹ Lwa vilombe vili mwoyo viahaananga vukhumi nende luyali nu khusanditsa woyo wikhalanga khu shisoko shiu vwami, khandi uli mwoyo mihika ni mihika,

¹⁰ vasakhulu makhomi kavili na vane vinamila woyo wikhalanga khu shisoko shiu vwami, nu khusaala woyo uli mwoyo mihika ni mihika. Vanavulanga tsitaachi tsiavo vasiuva imbeli wi shisoko shiu vwami nivavoola,

¹¹ “Mwami Nyasaye, uli Nyasaye weru! Nivi utushili khuheelwa vukhumi, luyali nende tsingulu. Nivi waloonga shia shindu shiosi, khandi khuvirila khu lienya liolio vialoongwa khutsililila khuvaho khandi vive nu vulamu.”