LIKHUNULILWA 20 - IBIBILIA INDAKATIFU MU LUTIRICHI LWITAKHO NENDE LWISUKHA

Mihika Ihelefu Indala

¹ Nalola injelosi niyikhanga hasi khurula mwikulu, nikumile mu mukhono kwayo lufungu lwikulanga mu shihatisi nende munyololo mulitoho.

² Yakumila kuyuukha, inzukha yali yakhale yeyo nili Ibilisi, inoho Shetani, manimuvoha nu munyololo mihika iheelefu indala.

³ Injelosi yamusiuva mu shihatisi, nimwikalilamu khandi nirakhu likafuli, avuli khukaatilitsakhu vandu vi tsimbia tsiosi, khutukha mihika iheelefu indala nichimali khuvwa. Niyakhakhola ndio, aliitsa khuvohololwa hatititi vutswa.

⁴ Nalola visoko viu vwami; khandi yavo vali nivikhale khuvio vaheelwa vunyali vu khukhalachila vandu. Nalola khandi mioyo chia yavo, vali niviirwa shichila vali vayilwatsa makhuva khulondokhana khu katoto, ka Yesu yamanyinya khandi khulondokhana khu likhuva lia Nyasaye. Vambakhana khusaala khu kunani inoho shifwanani shiakwo; inoho shivanyolakhu shimanyilu shiu kunani mu vweni vwavo inoho mu makhono kavo tawe. Visimukha khurula mu likhutsa, khandi nivamiha khuli vami na Kristo, khumihika iheelefu indala.

⁵ Valala khuvo, shivisimushitswa khurula mu likhutsa mihika iheelefu indala nichishili khuvwa tawe. Yukhu nakhwo khwisimushitswa khukhuraanga khurula mu likhutsa.

⁶ Vali ni ikhaavi khandi vakasitswa muno, yavo vavalitswa mu lisimushitswa khurula mu likhutsa liu khuraanga lia vandu vakhutsa. Likhutsa lia khavili livula tsingulu tsiosi khuvo; valiitsa khuva vasalisi va Nyasaye khandi va Kristo. Valiitsa khwamiha naye khumihika iheelefu indala.

Liihe Liukhumalilikha

⁷ Lwa mihika iheelefu indala chienecho, chiliitsa khuva nichimali khuvwa, Shetani aliitsa khuvohololwa khurula mucheela mwemwe,

⁸ naye aliitsa khutsia khukaata vandu vi tsimbia tsiosi, tsiasalana shia havundu hosi mu shivala, nakhwo khuvoola Gogo nende Magogo. Shetani aliitsa khuvalaanga halala khuvakwana; isavu yavo ili khuli muyeeshe khuluchinga lwi inyanza.

⁹ Vasalana shia havundu hosi mu shivala, khandi nivavotokhana maheemo ka vandu va Nyasaye vamenyamu, khandi litaala likali lia yayaanza. Navutswa mulilu kwarula mwikulu nu kuvamulula.

¹⁰ Nalwo lwi Ibilisi, wali niyavakaatilitsa, yasiuvwa mu inyanza yu mulilu nende salufa, wa kunani nende muprofeti wu vuvehi, vali nivasiuvwa khale. Namwo mwa valiitsa khutambitswa vululu muno, mbasu nu vutukhu mihika ni mihika.

Likhalachilwa Liukhumalilikha

¹¹ Nalola shisoko shiu vwami shikali shilavu, khandi woyo wikhalanga khushio. Lilova nende likulu, viakorela imbeli wewe, vuchila khandi khulolekhakhu.

¹² Nalola vandu vakhutsa, vakali khu vati, nivasinjile imbeli wi shisoko shiu vwami. Vitabu vikulwa, ma shitabu shindi nishikulwa, nishili shitabu shia vandu valiitsa khunyola vulamu. Vandu vakhutsa vakhalachilwa khulondokhana khu ka vali nivakhola, khuli kali nikahandikwa mu vitabu vienevo.

¹³ Vandu vakhutsila mu inyanza varulamu; khandi likhutsa nende shihatisi, nivahaana vali mulio. Shia mundu wosi yakhalachilwa khulondokhana khu ka yali niyakhola.

¹⁴ Likhutsa nende shihatisi, viasiuvwa mu inyanza yu mulilu. Inyanza yu mulilu nalio likhutsa lia khavili.

¹⁵ Shia mundu wosi, wi lira lielie lishili khuhandikwakhu mu shitabu shia vandu valiitsa khunyola vulamu, yasiuvwa mu inyanza yu mulilu.