LIKHUNULILWA 2 - IBIBILIA INDAKATIFU MU LUTIRICHI LWITAKHO NENDE LWISUKHA

Ibarwa Yahandikwa Khu Likanisa lia Efeso

¹ “Handichila injelosi yi likanisa lia Efeso makhuva yaka: “Yaka nako makhuva karulanga khu woyo ukumilanga tsinyining'ini saba mu mukhono kwekwe musatsa, nachenda mu vikuru saba vi tsitaaha vialombwa khu itsahabu.

² Ninzi wamanya ka wakhola; khali namanya khuli wakhola mihinzilu ni tsingulu tsinyishi, khandi khuli wali nu wikhutsila. Namanya ndi shiunyala khuyaanzilila vandu vatamanu, khandi ndi wachelitsa khurunishitsa yavo vikholanga khuva varumwa, navutswa shivali varumwa tawe. Khali umali khuvanyola ni vandu vavehi.

³ Nivi uli mwikhutsili, wanyakhana shichila inzi; khandi ushili khukhutsa mwoyo.

⁴ Navutswa shindu shiliho shichilanga nimbula khukhuyaanza: walekha khunyanza nunundi, khuli lwa wali nu wanyanza lukhuraanga yolo.

⁵ Kanakanakhu havundu ha warula nu wakulukha! Lekhana nu vwoni vwovwo, ma ukhole vindu via wakholanga lukhuraanga. Niiva unyala khwambakhana khulekhana nu vwoni vwovwo, niitsa khwitsa khu yivi, mambukule shikuru shioshio shi itaaha khurula havundu hashio.

⁶ Navutswa yishi nashio shindu shichilanga nikhuyaanza: walekhana ni miima chia Vanikolai vakholanga; khali inzi nalekhana ni miima chienecho.

⁷ “Mundu uli na maroyi ku khuhulila, lekha ahulishitsi ka Roho avoolelanga makanisa! “Yavo valiitsa khukuura, niitsa khuvaha vunyali vu khulia litunda lirulanga khu musala kuhaananga vulamu kumeelanga mu Mulimi kwa Nyasaye.

Ibarwa Yahandikwa khu Likanisa lia Simina

⁸ “Handichila injelosi yi likanisa lia Simina makhuva yaka: “Yaka nako makhuva karulanga khu woyo wukhuraanga khandi wu khumalilikha, wakhutsa khandi niyisimushitswa khurula mu likhutsa.

⁹ Namanya vutiinyu vwovwo; namanya ndi uli mumanani -- navutswa katoto kene uli muhinda! Namanya vindu vitamanu vialomolomwa shichila yivi na vandu vikhola kholitsanga khuva Vayahudi, navutswa shivali Vayahudi tawe; ni shituma shia vandu va Shetani!

¹⁰ Uvuli khuria shia shindu shiosi shitsitsanga khuchila unyakhane. Hulishitsa! Ibilisi aliitsa khuchelitsa valala khu munyi, lwa iliitsa khuchila vavohwi mucheela, ma muve mu vutiinyu vu khunyakhana khumatukhu likhomi. Tsililila khuva musuuvilwa khwinzi, khali niiva nu khukhutsa; khandi niitsa khukhuha itaachi yu vulamu.

¹¹ “Mundu uli na maroyi ku khuhulila, lekha ahulishitsi ka Roho avoolelanga makanisa! “Yavo valiitsa khukuura, valiitsa khuvula khusalilitswa ni likhutsa lia khavili.

Ibarwa Yahandikwa khu Likanisa lia Peragamumu

¹² “Handichila injelosi yi likanisa lia Perigamu makhuva yaka: “Yaka nako makhuva karulanga khu woyo uli ni shivavi shiuchi tsimbeka tsiosi.

¹³ Namanya havundu ha wumenyanga, wa Shetani yamihanga. Uli watoto khwinzi, khandi watsililila khuva musuuvilwa mwinzi, khali mumatukhu ka Antipasi, wali mushiahidi wanje musuuvilwa yiirilwa hawenaho, havundu ha Shetani amenyanga.

¹⁴ Navutswa vindu vilala vili mu munyi vichilanga nimbula khumuyaanza: vandu valala vali mu munyi vahaandanga khu mechitso ka Balamu, wechitsa Balaka khuli anyala khwimilila Israeli khukhola vwoni, lwa ya vakaatilitsa khulia shiukhulia shiali ni shihaanilwi khuli musango khu misambwa khandi khukhola vuheeyi.

¹⁵ Munjila indala yeneyo, khuli na valala khandi mu munyi vahaandanga khu mechitso ka Vanikolai.

¹⁶ Khulwa yako, mwikanile nunundi khurula mu vwoni vwenyu! Niiva munyala khwambakhana khwikanila, niitsa khwitsa khu munyi vwangu yuvu, mamukwane ni shivavi shirulanga mu munwa kwanje.

¹⁷ “Mundu uli na maroyi ku khuhulila, lekha ahulishitsi ka Roho avoolelanga makanisa! “Yavo valiitsa khukuura, niitsa khuvaha shiukhulia shiaviswa shia maana. Niitsa khuha shia mulala khuvo lichina lilavu liene liahandikwakhu lira liyia liu mundu avulakhuho wamanya, navutswa liliitsa khumanyikhana vutswa khu mundu uliitsa khunyola lichina lienelo.

Ibarwa Yahandikwa khu Likanisa lia Tsiatira

¹⁸ “Handichila injelosi yi likanisa lia Tsiatira makhuva yaka: “Yaka nako makhuva karulanga khu Mwana wa Nyasaye, wi tsimoni tsietsie tsiakhanga nitsihemukha khuli mulilu, uli ni vilenje viang'ang'anga khuli mukasa kwavekhwa ilaanji.

¹⁹ Manyi ka wu kholanga; manyi vulahi khuli uli nu vuyaanzi, musuuvilwa, muhinzilu kwokwo nende likhutsila liolio. Namanya ndi utsilililanga khukhola nunundi vindu vinyishi khuvira via wakholanga muliraanga.

²⁰ Navutswa shindu shilala shiliho shichilanga nimbula khukhuyaanza: wayaanzilila mukhali ulaangwangwa Yezebeli, wilaanganga mwene murumwa wa Nyasaye. Mechitso keke kakoyanyinyanga varumishi vaanje khukhola vuheeyi nu khulia shiukhulia shihaanilwi khuli musango khu misambwa.

²¹ Mali khuha mukhali mwenoyo vwiyangu vu khwikanila khurula mu vwoni vwevwe; navutswa wayambakhana khwikanila khurula mu vuheeyi vwevwe.

²² Niitsa khurumula mukhali mwenoyo indovoshi, iliitsa khumusalilitsa vululu muno ye, halala na yavo vakholanga vulaaya naye. Niitsa khukhola ndio nunundi, niiva vatsitsanga khwambakhana khwikanila khurula mu vindu vitamanu via vakholanga naye.

²³ Niitsa khwiira khandi valondi veve; ma makanisa koosi kamanye ndi ninzi neye uheenzeshitsanga mioyo chia vandu nende tsinganakani tsiavo. Niitsa khurunga shia mulala khu munyi khulondokhana khu muhinzilu kwekwe kwa yakhola.

²⁴ “Navutswa vandu valala khu munyi, vamenyanga mu litaala lia Tsiatira vashili khulondakhu liechitso litamanu lienelo. Khali vashili khwekakhu shindu shiosi khulondokhana khu mechitso ka vandu valala valaanganga ‘Makhuva kaviswa ka Shetani.’ Muvoolelanga ndi shinyala khumutiukha musiko kundi mulitoho tawe.

²⁵ Muhande vutswa khu ka muli nako, khutukha lwa niitsa khwitsa.

²⁶ Mundu uliitsa khukuura matsililile khukhola lienya lianje khutukha lukhumalilikha, niitsa khumuha vunyali vu khwamiha vandu vi tsimbia tsindi.

²⁷ Aliitsa khuvamiha mu vululu ni indovoshi yalombwa khu shivia, manya khuli yaraanyinyanga tsinyungu mu vitonye, khali niiva inzi mwene nanyola vunyali khurula khu Tata wanje.

²⁸ Niitsa khumuha Inyining'ini ilolekhanga mu mavwevwe, lwa liuva liraanganga khwakha.

²⁹ “Mundu uli na maroyi ku khuhulila, lekha ahulishitsi ka Roho avoolelanga makanisa!