LIKHUNULILWA 12 - IBIBILIA INDAKATIFU MU LUTIRICHI LWITAKHO NENDE LWISUKHA

Mukhali nende Kuyuukha Kukali

¹ Shindu shikali khandi shiu khuchenyinya shialolekha mwikulu. Khwaliho nu mundu mukhali, niyifwali inguvu yali ni yang'ang'anga vulavu khuli liuva, nasinjile khu mweli niyifwali khu murwi kwekwe itaachi yi tsinyining'ini likhomi na tsivili.

² Mukhali mwenoyo, yali waheelitsa; khandi yalila nahulila isalila indulu muno, lwa yali niyenyanga khwivula mwana.

³ Shindu shindi shiu khuchenyinya shialolekha mwikulu. Khwaliho nu kuyuukha kukali kumuuchi ni mirwi saba nende tsinzika likhomi, ni itaachi khu shia murwi kwayo.

⁴ Mushila kwayo kweya tsinyining'ini tsine khurula mwikulu, nu kusiuva hasi khulilova. Kuyuukha kwenoko kwasinjila imbeli wu mukhali mwenoyo, nu kwirecheshe khulia vwangu mwana, lwa aliitsa khuva namali khwivulwa.

⁵ Nalwo lwa mukhali mwenoyo yivula mwana wi shiyayi, uliitsa khwamiha vandu voosi khulilova nu vunyali vunyishi. Navutswa yanuulwa mwana mwenoyo, nahilwa khu Nyasaye khandi mu shisoko shiu vwami vwevwe.

⁶ Mukhali mwenoyo yilukha natsia mu shiangalangwi, havundu ha Nyasaye yali niyamulombela, walindwa vulahi vwene khumatukhu iheelefu indala tsimia tsivili na makhomi sita.

⁷ Nalwo lwa liihe liaraanga mwikulu. Mikaheli nende tsinjelosi tsietsie, vakwana kuyuukha kwenoko, khali kwo nu kuvakwana ni tsinjelosi tsietsie;

⁸ navutswa kuyuukha kwenoko kwakuurwa; ma kwo nende tsinjelosi tsietsie, nivakhungwa mwikulu khuvula khandi khumenyamu.

⁹ Kuyuukha kwenoko kwasiuvwa ilwanyi—inzukha yali ya khale yeyo, ilaangwangwa Ibilisi, inoho Shetani, kwakaatilitsa vandu mu shivala. Kwasiuvwa hasi khulilova, halala ni tsinjelosi tsietsie tsiosi.

¹⁰ Nalwo lwa nahulila mwoyo mukali khurula mwikulu, nu kuvoolanga, “Vuhonyinyi vwa Nyasaye, vumali khutukha nunundi! Nyasaye umali khumanyinya nunundi vunyali vwevwe khuli Mwami! Masiha wewe umali khumanyinya nunundi vunyali vwevwe! Shichila woyo wasinjilanga imbeli wa Nyasaye weru, nu khuyaala vasuuvili vashieru mbasu nu vutukhu, umali khusiuvwa khurula mwikulu.

¹¹ Vasuuvili vashieru vamali khumukuura, khuvirila mu masahi ki Shimeme shi Likondi, khandi khuvirila mu katoto ka vilwatsanga. Khali vali ni lienya liu khwihaana vulamu vwavo nu khukhutsa.

¹² Munyi vindu viosi vimenyanga mwikulu, khandi munyi voosi vamuli hanu, musangale! Wooyi! Muliitsa khuva ku vutiinyu vurina khu munyi vamenyanga khulilova nende mu inyanza! Shichila Ibilisi wamala khwitsa khu munyi, khandi wayitsula vurima, shichila wamanya ndi ali na matukhu mati konyene.”

¹³ Lwa kuyuukha kwali nu kwakhamanya vulahi ndi kumali khusiuvwa khulilova, kwaraanga khuhitsanyinya mukhali, wali niyivula mwana wi shiyayi.

¹⁴ Mukhali mwenoyo yaheelwa tsimbaha tsivili tsi shilitsa shikali, khupulukha khutsia mu shiangalangwi, mwa yenyekhanga ave nali, wa aliitsa khulindwa vulahi vwene khumihika chivaka nende inusu, ha kuyuukha kuliitsa khuvula khumukwana.

¹⁵ Kuyuukha kwenoko kwasala matsi manyishi ki michelelo, khurula mu munwa kwekwe munyuma mu mukhali mwenoyo, muchelelo kwa matsi kumuhilane.

¹⁶ Navutswa lilova liakhonya mukhali mwenoyo; shichila matsi, kali nikaruli mu munwa ku kuyuukha kwenoko, kakhaamila mulilova.

¹⁷ Kuyuukha kwenoko, kwalolela vurima mukhali mwenoyo, nu kutsia khukwana valala khu vitsukhulu vu mukhali mwenoyo, nivali yavo voosi valondanga malako ka Nyasaye, khandi vali vasuuvilwa mu katoto ka Yesu yamanyinya.

¹⁸ Kuyuukha kwenoko, kwasinjila khuluchinga lwi inyanza.