LIKHUNULILWA 11 - IBIBILIA INDAKATIFU MU LUTIRICHI LWITAKHO NENDE LWISUKHA

Vaprofeti Vavili va Nyasaye

¹ Nikamali khwikholekha kario, naheelwa shisala shiasasanga khuli ikavilo yu khupimila, manimbolelwa, “Simukha utsi khupima Litempeli lia Nyasaye nende vwaali, nu khuvalitsa vandu voosi vasaalanga mu Litempeli lienelo.

² Navutswa uvuli khupimakhu lwanyi lwi Litempeli; shichila lwaheelwa vandu vi tsimbia tsindi vatamanu vakorwa Nyasaye, navo valiitsa khwamiha litaala litakatifu khu mieli makhomi kane na kavili.

³ Niitsa khuruma vashiahidi vaanje vavili, nivifwali tsinguvu tsi makunia, navo valiitsa khwilwatsa likhuva lia Nyasaye, mumatukhu iheelefu indala tsimia tsivili na makhomi sita.”

⁴ Vashiahidi vavili venavo, navo vali khuli misala chivili chi misayituni nende tsitaaha tsivili, tsiasinjila imbeli wu Mwami Nyasaye wamihanga shia shindu shiosi khulilova.

⁵ Niiva mundu aliitsa khuchelitsa khuvasalilitsa, mulilu kuliitsa khurula mu minwa chiavo, nu khutivitsa vatsiku vavo. Nindi mundu uliitsa khuchelitsa khuvasalilitsa, aliitsa khwiirwa.

⁶ Vandu venavo vali nu vunyali vu khwikalila malesi khu imbula ivuli khukhuva, mumatukhu ka valiitsa khuva nivilwatsanga likhuva lia Nyasaye. Vali nu vunyali khandi khwikalila tsisieveye tsia matsi, khukalukhana khukwa masahi. Vali nu vunyali khandi vu khuleera vulwale lukanu na lukanu khulilova, isaa yosi ya venyanga khukhola kenako.

⁷ Lwa valiitsa khuva nivamali khwilwatsa likhuva liavo, kunani kuliitsa khuva nukuruli mu shihatisi, kuliitsa khuvakwana. Kunani kwenoko kuliitsa khuvakuura nu khuviira,

⁸ khandi mivili chiavo chiliitsa khulaakalala mu tsinjila tsi litaala likali liene, wu Mwami wavo yavambilwa. Shimanyilu shi lira li litaala likali lienelo ni Sodomu, inoho shivala shia Misri.

⁹ Vandu khurula mu vandu vi tsimbia tsiosi, mu vivala viosi, mu tsinomolomo tsinyishi lukanu, nende tsinzivulu valiitsa khuheenza khu mivili chienecho, khumatukhu kavaka nende inusu, nu khwikalila mivili chienecho, khuyeveelwa mu vilindwa.

¹⁰ Vandu voosi khulilova valiitsa khuva nu vuyaanzi shichila vandu vavili venavo vamali khukhutsa. Valiitsa khwikhoya nu khuheelelana vihanwa vene khuvene, shichila vaprofeti vavili venavo vachila vandu voosi khulilova nivanyakhana.

¹¹ Lwa matukhu kavaka nende inusu, kali nikamali khuvira, muuya kuhaananga vulamu kwarula khu Nyasaye, nu kwinjila muvo, khandi nivasinjila vulunji. Vandu voosi vavalola vachenya muno.

¹² Nalwo lwa vaprofeti vavili venavo, vahulila mwoyo nu kurulanga mwikulu, nu ku vavoolelanga, “Hambi ikulu hanu.” Vasimukha nivatsia mwikulu khuvirila mu malesi, vatsiku vavo ni vavaheenzanga.

¹³ Mutsisaa tsienetso, shivala shiatechela vutamanu muno. Luveka lulala khu tsimbeka likhomi tsi litaala likali lienelo, liayongovela; ma vandu tsiheelefu saba, nivakhutsa. Vandu vandi varikala vali ni lichenya, khandi nivitsominya vukhumi vwa Nyasaye wu mwikulu.

¹⁴ Vutiinyu vwa khavili vumali khuvwa; navutswa vutiinyu vwa khavaka, vuliitsa khwitsa vwangu yuvu!

Shisiliva shia Saba

¹⁵ Injelosi ya saba, yakhuva shisiliva shiayo, ma liyooko likali nilihulilikhana mwikulu, livoolanga, “Tsingulu tsiu khwamiha shia shindu shiosi mu shivala ni tsiu Mwami Nyasaye, uli Nyasaye weru nende Masiha wewe; naye aliitsa khwamiha mihika ni mihika!”

¹⁶ Nalwo lwa vasakhulu makhomi kavili na vane, vikhalanga khu visoko viu vwami imbeli wa Nyasaye vinama hasi nivasaala khu Nyasaye,

¹⁷ nivavoola, “Nyasaye Uli Ikulu khu Viosi, woyo uliho nunundi, khandi waliho! Khukhusanditsanga shichila umali khuvukula tsingulu tsiotsio tsiu khuchenyinya, umali khuraanga khwamiha!

¹⁸ Vandu vi tsimbia tsindi vatamanu vakorwa Nyasaye vali nu vurima vunyishi, shichila isaa yoyo yu khuvalolela vurima imali khutukha, isaa ya vandu vakhutsa vakhalachilwa. Isaa imali khutukha yu khukholela varumishi vovo, nivali vaprofeti vindu vilahi, halala na vandu vovo voosi, yavo voosi vakhuheetsanga luyali, vakali khu vati. Isaa imali khutukha yu khumulula yavo viiranga vandu khulilova khunu!”

¹⁹ Litempeli lia Nyasaye liu mwikulu likulwa; khali nivalolayo Lisanduku li Lilakano. Khwaliyo ni tsimemo tsiu luheni, khuhilikana nende khuhemukha khwi likulu. Shivala shiatechela, ma imbula ya machina nikhuva inyishi muno.