LEVI 27 - IBIBILIA INDAKATIFU MU LUTIRICHI LWITAKHO NENDE LWISUKHA

Khurweshitsa khuli Khwalaaka Mwami Nyasaye

¹ Mwami Nyasaye yavoolela Musa,

² “Uvoolele Vaisraeli, niiva mundu anyala khwirulitsa khuhaana mundu khu Mwami Nyasaye, khuli yali niyalaaka aliitsa khukhola, mundu mwenoyo anyala khuva muvoholole nikava aliitsa khurunga tsisenti tsitushili khuhaanwa tsienetso,

³ mundu musatsa, hakari hi mihika makhomi kavili nende makhomi sita aliitsa khurunga ifetsa vitonye makhomi karanu, khulondokhana khu shipimu shia matukhu kenako.

⁴ Niiva nu mwana wi shikhana, aliitsa khurunga vitonye vi ifetsa makhomi kavaka.

⁵ Niiva nu muyayi muvukha uli ni mihika chiranu khutukha khumihika makhomi kavili, aliitsa khurunga ifetsa vitonye makhomi kavili.

⁶ Niiva mundu ali ni mihika hasi hi mihika chiranu, aliitsa khurunga ifetsa vitonye viranu. Mwana wi shikhana mutititi, aliitsa khurunga ifetsa vitonye vivaka khulondokhana khu shipimu shia matukhu kenako.

⁷ Mundu musatsa wavira mihika makhomi sita, aliitsa khurunga vitonye vi ifetsa likhomi na viranu. Mundu mukhali wavira mihika makhomi sita aliitsa khurunga vitonye vi ifetsa likhomi.

⁸ “Niiva mundu wali niyalaaka mwenoyo, nu mumanani unyala khukhaywa khurunga murungu kutushili, aliitsa khulera mundu mwenoyo khu musalisi, ma musalisi alole vukuuli vu mundu mwenoyo, khulondokhana khuli mundu wali niyalaaka mwenoyo anyala khurunga.

⁹ “Niiva yali wayisuuha aliitsa khuhaana muruku kwahuchililwa, khuli shihanwa khu Mwami Nyasaye, muruku khuli kwenoko nu kumali khuhaanwa khu Mwami Nyasaye, nu mutakatifu.

¹⁰ Mundu wali niyalaaka mwenoyo aliitsa khuvula khukalukhanyinya khu muruku kundi khu kwenoko. Niiva aliitsa khukhola ndio, miruku chienecho chiosi chiliitsa khuva chiu Mwami Nyasaye.

¹¹ Navutswa niiva lilaaka lielie, liliitsa khulondokhana nu muruku kwoneshe, kuliitsa khuvula khuhuchililwa khuli shihanwa khu Mwami Nyasaye, mundu wali niyalaaka mwenoyo, aliitsa khuhila muruku kwenoko khu musalisi.

¹² Musalisi aliitsa khuviritsa murungu kwakwo, khulondokhana khu vulahi vu muruku kwenoko inoho vutamanu vwakwo, khandi murungu kwenoko kuliitsa khuva khuli amali khuviritsa yolo.

¹³ Niiva mundu mwenoyo, anyala khwenya khandi khukukuula, aliitsa khurunga vukuuli vutushili khurungwa vu muruku kwenoko, nu khumeetakhu murungu kwa makhomi kavili mu imia indala.

¹⁴ “Lwa mundu ahaananga inzu yeye, khuva indakatifu khu Mwami Nyasaye, musalisi aliitsa khuviritsa vukuuli vwayo, khulondokhana khu vulahi vwayo inoho khu vutamanu vwayo, ma murungu kuve vutswa khuli kwaviritswa yolo.

¹⁵ Niiva mundu wali niyahaana inzu mwenoyo, aliitsa khwenya khuchikuula khandi, aliitsa khurunga vukuuli vwi inzu vutushili, nu khumeetakhu murungu kwa makhomi kavili mu imia indala.

¹⁶ “Niiva mundu aliitsa khuhaana shitonye shilala khu shiu mulimi kwekwe, khuva shitakatifu khu Mwami Nyasaye, vukuuli vwi shitonye shienesho, vuliitswa khuviritswa khulondokhana khu vukuutsa vuraakwamu, khu shia ifetsa vitonye likhomi khu shia ishayiri tsikilo makhomi kavili.

¹⁷ Niiva aliitsa khuhaana shitonye shiu mulimi kwenoko vwangu, muhika ku khukalushilwa nu kumali khuvwa, murungu kuliitsa khuva vutswa khuli kwenyekhanga.

¹⁸ Niiva aliitsa khucheleva khukuhaana, musalisi aliitsa khuviritsa vukuuli vwakwo vutushili khurungwa, khulondokhana khumihika chirikale khutukha khumuhika muyia ku khukalushilwa, nu khuchehitsa vukuuli vwi shitonye shiu mulimi kwenoko.

¹⁹ Niiva mundu wali niyahaana shitonye shiu mulimi kwenoko, aliitsa khwenya khukukuula khandi, aliitsa khurunga vukuuli vutushili khurungwa vwi shitonye shiu mulimi kwenoko, nu khumeetakhu murungu kwa makhomi kavili mu imia indala.

²⁰ Navutswa niiva aliitsa khuvula khwenya khukuula khandi shitonye shiu mulimi kwenoko, inoho khukuulitsa khu mundu wundi vutswa, aliitsa khulekha khukukuula khandi.

²¹ Khumuhika muyia ku khukalushilwa shitonye shiu mulimi shienesho shiliitsa khuva shitakatifu khu Mwami Nyasaye, khuli shitonye shiu mulimi shiakholwa khuva shitakatifu. Shitonye shienesho, shiliitsa khuva shia vasalisi.

²² “Niiva mundu aliitsa khwirulitsa khuhaana nu mwoyo mulala khu Mwami Nyasaye shitonye shiu mulimi kwa ye mwene yakuula,

²³ musalisi aliitsa khukhava vukuuli vwi shitonye shiu mulimi kwenoko, khulondokhana khumihika chirikale khutukha khumuhika ku khukalushilwa; khandi mundu mwenoyo aliitsa khurunga vukuuli vwi shitonye shiu mulimi kwenoko khulitukhu lilala liene yelo. Tsisenti tsi shitonye shiu mulimi kwakuulitswa kwenoko tsiliitsa khuva tsiu Mwami Nyasaye.

²⁴ Khumuhika ku khukalushilwa, shitonye shiu mulimi kwenoko, shilitsa khukalushitsilwa mwene shitonye shienesho inoho vitsukhulu veve.

²⁵ “Vukuuli vwosi vuliitswa khuviritswa khulondokhana khu shipimu shitakatifu shia matukhu kenako.

²⁶ “Muruku ku khuraanga khwivulwa ku muruku kwosi, nu ku Mwami Nyasaye, khwenya mundu khuvula khwirulitsakhu khukuhaana khuye, khuli shihanwa shiu khwirulitsa khuhaana. Ing'ombe inoho likondi viliitsa khuva viu Mwami Nyasaye;

²⁷ navutswa niiva nu muruku ku khuraanga khwivulwa ku muruku kwoneshe kuliitsa khukuulwa khandi khulondokhana khu shipimu shia matukhu kenako khandi murungu kwa makhomi kavili mu imia indala kuliitsa khumeetakhu. Niiva kuliitsa khuvula khukuulwa khandi, kuliitsa khukuulitsilwa mundu wundi vutswa khu vukuuli vutushili vwa matukhu kenako

²⁸ “Mundu avulakhu vunyali vu khukuulitsa inoho khukuula khandi shindu shia mwene yirulitsa khuhaana nu mwoyo mulala khu Mwami Nyasaye, shive nu mundu, nu muruku, inoho mulimi. Shia shindu shiosi shiakholwa khuva shitakatifu ni shiu Mwami Nyasaye.

²⁹ Khali mundu wakholwa khuva mutakatifu aliitsa khuvula khukuulwa; shichila aliitsa khwiirwa.

³⁰ “Itsaka yi viraakwa vicheswangwa mu mulimi, kave ni imu inoho matunda, viosi ni viu Mwami Nyasaye; shichila ni vitakatifu khuye.

³¹ Niiva mundu anyala khwenya khukuula khandi shilala khuvio, mundu mwenoyo aliitsa khurunga vukuuli vutushili khurungwa, nu khumeetakhu murungu kwa makhomi kavili mu imia indala.

³² Shia likhomi khu miruku chiu munzu, ni chiu Mwami Nyasaye. Lwa miruku chienecho chivetsanga nichimali khuvalitswa, shia muruku kwi likhomi nu ku Mwami Nyasaye.

³³ Mwene miruku chienecho aliitsa khulekha khuvikha havundu miruku chiosi khurovolamu miruku chiang'aha, inoho khukalukhanyinya miruku chienecho, ni miruku chindi. Niiva aliitsa khukalukhanyinya muruku mulala khwanyole kundi, khu miruku chivili chienecho, chiliitsa khuva chiu Mwami Nyasaye, khandi chiliitsa khuvula khukuulwa.”

³⁴ Yaka nako malako ku Mwami Nyasaye, yavoolela Musa avoolele Vaisraeli, lwa yali nali khu Shikulu shia Sinai.