LEVI 25 - IBIBILIA INDAKATIFU MU LUTIRICHI LWITAKHO NENDE LWISUKHA

Muhika kwa Saba

¹ Mwami Nyasaye yavoolela Musa khu Shikulu shia Sinai,

² “Voolela Vaisraeli, lwa muliitsa khwinjila mu shivala shia muheetsanga, muliitsa khuha Mwami Nyasaye luyali, niiva muliitsa khuvula khulima milimi shia khumuhika kwa saba.

³ Muliitsa khuraaka viraakwa mu milimi chienyu, musosole misala chienyu chi misabibu, khandi muchese viraakwa vienyu khumihika sita.

⁴ Navutswa muhika kwa saba, nakwo muhika kwa mulimi kuliitsa khuvula khulimwa, muhika kwi Lisabato khu Mwami Nyasaye. Muliitsa khuraakakhu viraakwa mu milimi chienyu, inoho khusosolakh misala chi misabibu chienyu.

⁵ Muliitsa khuvula khuchesakhu khali viraakwa vimeelela viene, vuchila khuraakwa, khandi matunda ki misabibu khu misala chia mwavula khusosolakhu. Nakwo kuliitsa khuva muhika, kwa muliitsa khuvula khulimakhu milimi chienyu.

⁶ Khali niiva muliitsa khuvula khulimakhu mulimi khumuhika kwenoko, kuliitsa khumuha shiukhulia shienyu, shia varukwa venyu, shia vandu venyu va mwasamulitsa khumukholela muhinzilu, shia vacheni vamenyanga mu munyi, valiitsa khulia,

⁷ shi miruku chienyu chia mwavaaya hango nende tsinyama tsiumbulimu tsili mu mumbulimu. Muliitsa khulia shia shindu shiosi shimeelanga mu mulimi kwenoko.

Muhika ku Khukalushitswa

⁸ “Muliitsa khuvalitsa hali saba khumihika saba, mihika chiosi makhomi kane na tisa.

⁹ Khulitukhu li likhomi liu mweli wa saba, khulitukhu liu mulukha ku khurulitsaho vwoni vwa vandu, muliitsa khuruma mundu shia havundu hosi, nakhuvanga shisiliva.

¹⁰ Numukhola ndio, nalwo lwa muliitsa khuvikha haluveka muhika kwi likhomi na kharanu, ma mukhole vandu voosi vamenyanga mu shivala khuva vavoholole. Khumuhika kwenoko, miandu chiosi chiali ni chiakuulitswa, chiliitsa khukalushitswa khu mwene chio inoho khu vitsukhulu veve. Shia mundu wosi yali ni yakuulitswa khuli murukwa, aliitsa khukalukha khu vandu vi inzu yeye mwene.

¹¹ Muliitsa khuvula khuraakakhu viraakwa mu milimi chienyu, inoho khuchesa imu yimeelela yene inoho khwatuula matunda ki misabibu mu mulimi kwi misabibu khu misala chishili khusosolwa.

¹² Muhika kwosi kuliitsa khuva mutakatifu khu munyi; muliitsa khulia viraakwa via varulitsanga vulunji mu mulimi.

¹³ “Khumuhika kwenoko, miandu chiosi chiali ni chiakuulitswa, chiliitsa khukalushitswa khu mwene chio.

¹⁴ Niiva muliitsa khukuulitsila mureende wenyu mulimi inoho khukuula mulimi, khurula khuye, muvuli khwihonelana vene khuvene.

¹⁵ Vukuuli vu mulimi kwenoko, vuliitsa khuviritswa khulondokhana khu isavu yi mihika mulimi kwenoko kunyala khumeela viraakwa, Muhika ku Khukalushitswa nu kushili khutukha.

¹⁶ Niiva khuliho ni mihika minyishi, vukuuli vu mulimi kwenoko vuliitsa khuva ikulu. Navutswa niiva ni mihika mitititi chionyene vutswa, vukuuli vu mulimi kwenoko vuliitsa khuchehitswa, shichila vindu vikuulitswangwa ni isavu yi viraakwa vinyala khumeela mu mulimi kwenoko.

¹⁷ Muvuli khukaatana vene khuvene; navutswa muhe Nyasaye wenyu luyali; shichila ninzi Mwami Nyasaye, uli Nyasaye wenyu.

Vutiinyu vu Muhika kwa Saba

¹⁸ “Mulonde mechitso kaanje nende mivaalo kaanje, khu mumenye mu milembe mu shivala shienesho.

¹⁹ Mulimi kuliitsa khumeela viraakwa viakwo; khandi muliitsa khuva ni shia shindu shiosi, shia mwenyanga khulia nu khumenya mu vulindi vulahi.

²⁰ “Navutswa mundu wundi anyala khureeva shia valiitsa khulia mu muhika kwa saba, lwa viraakwa vivula khuraakwa mu mulimi khandi khuvula khuchesa viraakwa,

²¹ niitsa khumukasitsa khumuhika kwa sita, khu mulimi kulimeela viraakwa vinyishi, vinyala khumala mihika chivaka.

²² Lwa muraaka viraakwa mu milimi chienyu mu muhika kwa munane, mulatsililila khulia viraakwa via mwali numwachesa khale. Muliitsa khutsililila khulia viraakwa vienevo khutukha lwa mulichesa viraakwa viu muhika kwa tisa.

Khukalushitswa khwi Miandu

²³ “Mulimi kuliitsa khuvula khukuulitswakhu, shichila ni miandu chianje; lwa munyi muli vandu vacheni khandi khu luchendo mu shivala shianje.

²⁴ “Lwa mulimi kukuulitswangwa, mundu wali mwene mulimi kwenoko ali nu vunyali vu khukuula.

²⁵ Niiva Muisraeli aliitsa khukwa mumanani nu khunikwa khukuulitsa mulimi kwekwe, mwiikho wewe wa himbi, anyala khukuula khandi mulimi kwenoko.

²⁶ Navutswa niiva mundu mwenoyo, aliitsa khuva navula mwiikho unyala khukuula khandi mulimi kwenoko, kaloleshe ndi ye mwene ali nu vuhinda khandi ali ni tsisenti tsinyishi tsiu khukuula mulimi kwenoko,

²⁷ aliitsa khuvalitsa vukuuli vwakwo, khurula mihika chiosi chiavira khurula nakuulitsa khukalusihitsila mundu wa yali niyakuulitsila mulimi kwenoko ni tsisenti tsietsie. Namali khukhola ndio, nalwo lwa aliitsa khuvukula khandi mulimi kwekwe.

²⁸ Navutswa niiva avula tsisenti tsianyala khumurunga khukalushitsa mulimi kwenoko, mulimi kwenoko kulatsililila khuva mu makhono ku mundu wakuula, khutukha khu Muhika ku Khukalushitswa. Mulimi kwenoko kuliitsa khukalushitswa khu mwene kwo lwa kwali nu kushili khukuulitswa.

²⁹ “Niiva mundu aliitsa khukuulitsa inzu yeye mu litaala lievwa na masisi, mundu mwenoyo ali nu vunyali vu khuchikuula khandi mumuhika ku khuraanga kwosi, khuraanjila khulitukhu lia yali niyakuulitsa yelo.

³⁰ Navutswa niiva aliitsa khuvula vunyali vu khuchikuula mu muhika kwenoko, inzu yeneyo iliitsa khuva yu mundu wachikuula khu mihika chiosi nende vitsukhulu veve. Iliitsa khuvula khukalushitswa mu Muhika ku Khukalushitswa.

³¹ Navutswa tsinzu tsili mu michitsi chivula masisi chinyala khuvukulwa khuli milimi vutswa. Mwene tsinzu tsienetso wali wu khuraanga ali nu vunyali vu khukuula khandi; nu khutsikalushitsa mu muhika ku khukalushitswa.

³² Nikhali, vandu vu lwivulu lwa Levi vali nu vunyali vu khukuula khandi miandu chiavo khumatukhu koosi mu mataala ka vaheelwa.

³³ Niiva inzu yosi mu mataala kenako inyala khukuulitswa nu mundu urulanga mu vandu vu lwivulu lwa Levi nu khuvula khukuulwa, ilakalushitswa mu Muhika ku Khukalushitswa, shichila tsinzu tsia vandu vu lwivulu lwa Levi vali natsio mu mataala kavo ni miandu chiavo khumatukhu koosi mu Vaisraeli.

³⁴ Navutswa havundu ha vanyala khwayitsa miruku mu lusomo luli himbi khu mataala ka vandu vu lwivulu lwa Levi havuli khukuulitswa; shichila ni miandu chiavo mihika ni mihika.

Vukhonyi khu Vamanani

³⁵ “Niiva Muisraeli weshie wumenyanga himbi na munyi, aliitsa khukwa mumanani, khandi akhaywi khwiliishitsa mwene, khutukha mumuhe shialia, khuli muheetsanga varumishi va mwasamulitsa, khu atsililile khumenya himbi na munyi, khuli mundu mucheni inoho uli khu luchendo.

³⁶ Muvuli khunyolela khuye vukhala; navutswa muhe Nyasaye wenyu luyali, khu Muisraeli weshie atsililile khumenya himbi na munyi.

³⁷ Muvuli khumurunjitsa vukhala khu tsisenti, tsia mumwikopitsanga, inoho khunyola vukhala khu shiukhulia shia mukuulitsanga khuye.

³⁸ Ninzi Mwami Nyasaye, uli Nyasaye wenyu, wamurulitsa mu shivala shia Misri, khumuha shivala shia Kanaani, khandi khu mbe Nyasaye wenyu.

Khulakholwa khwa Varukwa

³⁹ “Niiva Muisraeli weshie wumenyanga himbi na munyi, aliitsa khukwa mumanani, nu khwikuulitsa mwene khu munyi khuli murukwa, muvuli khumukholitsa muhinzilu khuli murukwa.

⁴⁰ Aliitsa khumenya na munyi khuli mundu wa mwasamulitsa, khutukha khu Muhika ku Khukalushitswa.

⁴¹ Ye mwene nende vaana veve, valiitsa khukholwa vavoholole, khukalukha khu vandu vayivulwamu, khandi mu miandu chia vakuuka veve.

⁴² Vaisraeli ni varukwa vu Mwami Nyasaye; khandi neye wa varulitsa mu shivala shia Misri. Valiitsa khuvula khukuulitswa khuli varukwa.

⁴³ Muvuli khuvamiha khuvirila mu vululu; navutswa muhe Nyasaye wenyu luyali.

⁴⁴ Muliitsa khurulitsa varukwa venyu, vave vasatsa inoho vakhali, khurula mu vandu vi tsimbia tsili himbi khu munyi. Muliitsa khukuula varukwa khurula mu vandu venavo.

⁴⁵ Munyala khukuula khandi vaana va vandu vacheni vamenyanga mu munyi. Vaana khuli venavo, shichila vayivulwa mu shivala shienyu valiitsa khuva miandu chienyu;

⁴⁶ ma muvaleshe vave miandu chia vaana venyu vi shiyayi, va varumishila matukhu koosi ka vashili mwoyo. Navutswa muvuli khululila Vaisraeli veshie.

⁴⁷ “Khuvoole mundu mucheni wumenyanga na munyi, aliitsa khukwa muhinda, nikhali mundu Muisraeli weshie akwi mumanani nu khwikuulitsa mwene, khuli murukwa khu mundu mucheni mwenoyo inoho khu mundu urulanga mu inzu yu mundu mucheni mwenoyo.

⁴⁸ Lwa aliitsa khuva niyakhakuulitswa, ali nu vunyali khandi vu khukuulwa. Mulala khu vamwavo veve

⁴⁹ inoho khootsa wewe inoho musiala wewe inoho mwiikho wewe wundi wa hahimbi, anyala khumukuula khandi; inoho niiva ye mwene anyolanga tsisenti tsinyishi, anyala khutsirunga mwene khukholwa khuva muvoholole.

⁵⁰ Ye halala nu mundu wamukuula valiitsa khuvalitsa mihika khurula lwa yikuulitsa mwene khutukha khu Muhika ku Khukalushitswa. Vukuuli vu khumukhola khuva muvoholole, vuliitsa khulondokhana nu murungu ku mundu wasamulitswa khukhola mihinzilu, anyolanga mumatukhu kenako.

⁵¹ Niiva mihika minyishi chiliitsa khuva chiarikala, aliitsa khurunga khulondokhana khu vuvoholole vwevwe, murungu munyishi khuvira murungu kwa ye mwene yali niyarungwa.

⁵² Niiva mihika mitititi chiliitsa khuva chirikale khutukha khumuhika ku khukalushitswa, aliitsa khuvalitsa mihika chienecho, nu khurunga murungu kwekwe khulondokhana khumihika chirikale.

⁵³ Aliitsa khuvukulwa khuli mundu wasamulitswa khukhola muhinzilu khurula khumuhika yuku, khutsia khutukha khumuhika kundi. Muheenze mulole ndi muruchi wewe avuli khumwamiha khuvirila mu vululu.

⁵⁴ Khali niiva aliitsa khuvula khukholwa khuva muvoholole khuvirila munjila iyi, ye mwene nende vaana veve valiitsa khukholwa khuva vavoholole mu Muhika ku Khukalushitswa,

⁵⁵ shichila Vaisraeli ni varukwa vaanje. Vo ni varukwa vaanje, va narulitsa mu shivala shia Misri. Ninzi Mwami Nyasaye, uli Nyasaye wenyu.”