LEVI 23 - IBIBILIA INDAKATIFU MU LUTIRICHI LWITAKHO NENDE LWISUKHA

Matukhu Matakatifu

¹ Mwami Nyasaye yavoolela Musa,

² “Lomoloma khu Vaisraeli, uvavoolele, Yaka nako matukhu karovolwa kaanje inzi Mwami Nyasaye ka naviritsa ka munyala khwakanila halala khusaala.

³ Muli na matukhu sita, ka munyala khukholelamu muhinzilu kwenyu, navutswa litukhu lia saba, liliitsa khuva litukhu li Lisabato, nilili litukhu liu khuhulukha. Muvuli khukholakhu muhinzilu kwosi khulitukhu lienelo, navutswa muliitsa khwakanila halala khusaala khulitukhu li Lisabato, shichila ni liu Mwami Nyasaye, shia havundu hosi ha muliitsa khuva numumenyanga.

⁴ “Muliitsa khuvoola makhuva khulondokhana khu milukha chienecho, mumatukhu karovolwa.

Mulukha kwa Pasaka nende Kukhulia Mikati Chialombwa Vuchila Mamela

⁵ “Mulukha kwa Pasaka ku khwikhoya, nu khuha Mwami Nyasaye luyali, kuliitsa khuraanganga khulukolovo, khwilitukhu li likhomi na khane liu mweli ku khuraanga.

⁶ Khulitukhu li likhomi na kharanu khu mweli kwenoko, muliitsa khukhola Mulukha Kukhulia Mukati kwalombwa vuchila Mamela. Muliitsa khuvula khuliakhu khumatukhu saba mukati kwosi kwalombwa na mamela.

⁷ Khulitukhu liu khuraanga khumatukhu kenako, muliitsa khwakanila halala khusaala. Muvuli khukholakhu muhinzilu kwenyu kwa shia khase khosi.

⁸ Muliitsa khuhaana khumatukhu saba shihanwa shi shiukhulia shienyu khwinzi Mwami Nyasaye. Khulitukhu lia saba lienelo, muliitsa khwakanila halala khusaala, navutswa muvuli khukholakhu muhinzilu kwenyu kwa shia khase khosi.”

⁹ Mwami Nyasaye yavoolela Musa,

¹⁰ “Lomoloma khu Vaisraeli, uvavoolele: Lwa mwinjila mu shivala shia muheetsanga khandi muchese viraakwa vienyu, muliitsa khulerela musalisi shivoho shiukhuraanga shi shiraakwa, shia muliitsa khuva nu mwachesa.

¹¹ Musalisi aliitsa khuhaana shivoho shienesho, khuli shihanwa khu Mwami Nyasaye, nikanyalikha muhuchililwi. Musalisi aliitsa khuhaana shivoho shienesho, khulitukhu lilondanga litukhu li Lisabato.

¹² Khulitukhu lia muliitsa khuhaana shihanwa shi imu, muliitsa khusinza khandi khuli shihanwa shiu musango limiiko, lili nu muhika mulala vuchila imbala yosi, khuli shihanwa shiu khusambwa khwinzi Mwami Nyasaye.

¹³ Muliitsa khumeetakhu vusi vwa tsukanywa na makura ku musayituni tsikilo tsivili khuli shihanwa shi shiukhulia khwinzi Mwami Nyasaye. Mwayu kuhuunyanga nukurula khu shihanwa shienesho, khunyanzitsanga inzi Mwami Nyasaye. Muliitsa khuhaana khandi shihanwa shi idivai ilita indala.

¹⁴ Muleshe khulia imu yosi khu tsimu tsimpia, kave ni imu imbisi, yasihilwa, inoho yalombwakhu mukati, numushili khulera shihanwa shienesho khwinzi Nyasaye. Lilako yili, liliitsa khutsililila khulondwa na vitsukhulu venyu voosi, khumatukhu koosi kaliitsa khuvaho.

Mulukha kwi Lichesa

¹⁵ “Muliitsa khuvalitsa masitsa saba koosi halala, khuraanjila khulitukhu lilondanga litukhu li Lisabato, lia muliitsa khulera shivoho shiukhuraanga shi imu yenyu ya muliitsa khuva numuchesi khwinzi Mwami Nyasaye.

¹⁶ Khulitukhu lia makhomi karanu, litukhu lilondanga litukhu lia saba li Lisabato, muliitsa khuhaana shihanwa shindi shi imu impia khwinzi Mwami Nyasaye.

¹⁷ Shia vandu vi inzu valiitsa khulera mikati chivili, khali vachihaane khuli shihanwa khwinzi Mwami Nyasaye. Shia mukati kuliitsa khulombwa khu vusi tsikilo tsivili tsiu vwalombwa na mamela, khandi kuliitsa khuhaanwa khwinzi Mwami Nyasaye, khuli shihanwa shi imu yu khuraanga khucheswa.

¹⁸ Khumeeta khu mukati kwenoko, vandu voosi valiitsa khuhaana mamiiko saba. Shia likondi lili nu muhika mulala, shimoli shihunwa shilala nende makondi kavili, vuchila imbala yosi. Kaliitsa khuhaanwa khwinzi Mwami Nyasaye khuli shihanwa shiu khusambwa, halala ni shihanwa shi imu nende shihanwa shi idivai. Mwayu kuhuunyanga nu kurula khu vihanwa vienevo, kunyanzitsanga inzi Mwami Nyasaye.

¹⁹ Muliitsa khuhaana khandi, khuli musango imbuli ikhole indala, khuli shihanwa shiu khurulitsaho vwoni nende mamiiko kavili, kali nu muhika mulala, khuli shihanwa shiu khulera milembe.

²⁰ Musalisi aliitsa khuhaana mukati nende makondi kavili kenako, khuli shihanwa khwinzi Mwami Nyasaye shichila vasalisi. Vihanwa vienevo, viliitsa khuva vitakatifu khwinzi Mwami Nyasaye.

²¹ Muvuli khukholakhu khali muhinzilu kwosi khulitukhu lienelo. Navutswa muliitsa khwakanila halala khusaala. Vitsukhulu venyu valiitsa khutsililila khulonda lilako yili, khumatukhu koosi kaliitsa khuvaho, khali shia havundu hosi ha valiitsa khuva nivamenyanga.

²² “Lwa muchesanga viraakwa venyu mu milimi chienyu, muvuli khureemakhu imu ili khundulu khwi milimi chienyu, inoho khutsia khureema imu yarikala, lwa mwachesanga; lesheli vandu vamanani nende vandu vacheni. Ninzi Mwami Nyasaye, uli Nyasaye wenyu.”

Mulukha ku Muhika Muyia

²³ Mwami Nyasaye yavoolela Musa,

²⁴ “Voolela Vaisraeli ndi khulitukhu liu khuraanga liu mweli kwa saba, muliitsa khuva ni litukhu liu khuhulukha. Muliitsa khwakanila halala khusaala, lwa visiliva viliitsa khuva ni vikhuvwangwa.

²⁵ Muvuli khukholakhu muhinzilu kwenyu kwosi kwa shia khase khosi; navutswa muliitsa khuhaana shihanwa shi shiukhulia khwinzi Mwami Nyasaye.”

Litukhu liu Khusemehwa

²⁶ Mwami Nyasaye yavoolela Musa,

²⁷ “Litukhu li likhomi liu mweli kwa saba yuku, liliitsa khuva litukhu liu khukhola mulukha ku khurulitsaho vwoni vwa vandu. Liliitsa khuva litukhu lia vandu valiitsa khwakanila halala khusaala. Muvuli khuliakhu shindu shiosi; khandi muhaane shihanwa shi shiukhulia khwinzi Mwami Nyasaye.

²⁸ Muvuli khukholakhu muhinzilu kwosi khulitukhu lienelo; shichila liliitsa khuva litukhu liu khukhola mulukha ku khurulitsaho vwoni vwa vandu.

²⁹ Mundu uliitsa khuliakhu shindu shiosi khulitukhu lienelo, aliitsa khukhungwa khurula mu vandu veve.

³⁰ Niiva mundu aliitsa khukhola muhinzilu khulitukhu lienelo, niitsa khumwiira.

³¹ Lilako yili, liliitsa khuva lia vitsukhulu venyu voosi, khali shia havundu hosi ha valiitsa khuva nivamenyanga.

³² Liliitsa khuva litukhu lienyu li Lisabato liu khuhulukha. Muvuli khuliakhu shindu shiosi. Muliitsa khukhola kenyekhanga khulitukhu li Lisabato, khuraanjila khulukolovo khwi litukhu lia tisa liu mweli, khutukha khulukolovo khulondakhu yokho.”

Mulukha kwa Matiili

³³ Mwami Nyasaye yavoolela Musa,

³⁴ “Voolela Vaisraeli ndi khulitukhu li likhomi na kharanu liu mweli kwa saba, nalwo lwa muliitsa khuraanga Mulukha kwa Matiili. Mulukha kwenoko, kuliitsa khutsililila khumatukhu saba.

³⁵ Khulitukhu liu khuraanga, khumatukhu kenako, muliitsa khwakanila halala khusaala. Muvuli khukholakhu muhinzilu kwenyu kwa shia khase khosi.

³⁶ Muliitsa khuhaana shihanwa shi shiukhulia shia litukhu, khumatukhu saba. Khulitukhu lia munane, muliitsa khwakanila halala khusaala; nu khuhaana shihanwa shi shiukhulia khu Mwami Nyasaye. Liliitsa khuva litukhu liu khusaala. Muvuli khukholakhu muhinzilu kwenyu kwa shia khase khosi.

³⁷ “Yichi nachio milukha chia viritswa chiu Mwami Nyasaye, lwa mwakanila halala khusaala khandi khuhaana vihanwa vi viukhulia khu Mwami Nyasaye, vihanwa viu khusambwa, vihanwa vi imu, misango, nende vihanwa vi idivai, khuli kenyekhanga shia litukhu.

³⁸ Milukha yichi chiliitsa khumeetekha khumatukhu ki Lisabato ka shia khase khosi. Vihanwa yivi viliitsa khumeetwa khu vihanwa vienyu, via muhaananga shia khase khosi, vihanwa vienyu viu khurweshitsa lilaaka, nende vihanwa viu khwirulitsa nu mwoyo kwosi khuhaana khwinzi Mwami Nyasaye.

³⁹ “Lwa muliitsa khuva nu mwakhachesa viraakwa mu milimi chienyu, muliitsa khwikhoyela khumatukhu saba mulukha yuku, khuraanjila khulitukhu li likhomi na kharanu liu mweli wa saba. Muliitsa khuhulukha khulitukhu liu khuraanga, khandi khulitukhu lia munane.

⁴⁰ Khulitukhu lienelo, muliitsa khwatuula matunda malala malahi khurula khu misala chienyu. Muliitsa khuvukula tsisia tsiu musala kwa mashindu nende tsisia tsi misala chia masambu makali khundulu khu muchela; mamuraanje khwikhoyela inzi Mwami Nyasaye, uli Nyasaye wenyu.

⁴¹ Muliitsa khwikhoyela khumatukhu saba mulukha yuku khumuhika. Lilako yili lilatsililila khulondwa na vitsukhulu venyu, khumatukhu koosi kaliitsa khuvaho.

⁴² Vaisraeli voosi valiitsa khumenya mu matiili khumatukhu saba,

⁴³ nikanyalikha vitsukhulu venyu vamanye ndi Mwami Nyasaye yakhola Vaisraeli nivamenya mu matiili vutswa, lwa ya varulitsa mu shivala shia Misri. Ninzi Mwami Nyasaye, uli Nyasaye wenyu.”

⁴⁴ Khulwa yako, nindi khuli Musa yali niyivaalila Vaisraeli malako ku khulonda, ki milukha chiali nichiaviritswa chiu Mwami Nyasaye.