LEVI 1 - IBIBILIA INDAKATIFU MU LUTIRICHI LWITAKHO NENDE LWISUKHA

Shihanwa shiu Khusambwa

¹ Mwami Nyasaye yalaanga Musa, nalomoloma khuye nali mu Liheemo Litakatifu, navoola,

² “Lomoloma khu Vaisraeli, uvavoolele: Lwa shia mulala khu munyi aliitsa khuva naleranga shihanwa shieshie khu Mwami Nyasaye, aliitsa khulera shihanwa shieshie khurula mu shiayo shi tsing'ombe inoho khurula mu shiayo shia makondi keke.

³ Niiva shihanwa shieshie, shiliitsa khuva shihanwa shiu khusambwa khurula mu miruku chiechie, aliitsa khuhaana shihunwa vuchila imbala yosi. Aliitsa khuhaanila shihunwa shienesho, mu muliango kwi Liheemo Litakatifu, nikanyalikha Mwami Nyasaye amuhuchilile.

⁴ Mundu mwenoyo aliitsa khutiila mukhono kwekwe khu murwi kwi shihunwa shi shihanwa shiu khusambwa shienesho. Nashio shilitsa khuhuchililwa khuli musango kwa havukono hehe, ku khumusemeha khurula mu vwoni vwevwe.

⁵ Aliitsa khusinzila inzi Mwami Nyasaye shihunwa havundu henaho; ma vaana va Haruni varumikhanga khuli vasalisi khuvukula masahi ki shihunwa shienesho nu kukamitsa mu tsimbeka tsiosi tsiu vwaali vuli imbeli wi Liheemo Litakatifu.

⁶ Mundu mwenoyo aliitsa khuvaaka muruku kwi shihanwa shiu khusambwa kwenoko, nu khwavulanyinya mu vitonye;

⁷ ma vasalisi varecheshe tsikhuyi khu vwaali, nu khutsihaambitsa nu mulilu.

⁸ Vaana va Haruni vasalisi, valiitsa khurechekha vitonye vi tsinyama, khali murwi nende vivana, khu tsikhuyi tsiakhanga mulilu khu vwaali.

⁹ Mundu mwenoyo aliitsa khwochitsa na matsi, viungu viu munda nende vilenje vinyuma viu muruku kwenoko; ma musalisi wu kholanga musango asambile musango kwosi khu vwaali. Mwayu kuhuunyanga nu kurula khu shihanwa shi shiukhulia shienesho, kuyaanzitsanga Mwami Nyasaye.

¹⁰ “Niiva mundu mwenoyo yenyanga khuhaana likondi lilala khu makondi keke inoho imbuli indala khu tsimbuli tsietsie, aliitsa khuhaana isatsa vuchila imbala yosi.

¹¹ Aliitsa khusinzila inzi Mwami Nyasaye muruku kwenoko khuluveka luli ivuluka wu vwaali; ma vaana va Haruni vasalisi vamitse masahi ku muruku kwenoko mu tsimbeka tsiosi tsiu vwaali.

¹² Lwa mundu mwenoyo aliitsa khuva namali khwavulanyinya mu vitonye, musalisi wu kholanga musango aliitsa khuhaambitsa mulilu khu vitonye viosi, khali khu murwi nende vivana.

¹³ Mundu mwenoyo aliitsa khwochitsa na matsi viungu viu munda nende vilenje vinyuma viu muruku kwenoko. Musalisi aliitsa khulera viosi nu khuvisambila nu mulilu khu vwaali. Mwayu kuhuunyanga nu kurula khu shihanwa shi shiukhulia shienesho kuyaanzitsanga Mwami Nyasaye.

¹⁴ “Nikava yenyanga khuha Mwami Nyasaye shihanwa shiu khusambwa shia manyonyi, aliitsa khuhaana shituti inoho shinamusotsi.

¹⁵ Musalisi aliitsa khulera linyonyi lienelo khu vwaali, avorole ling'ori na makhono keke, nu khulisambila khu vwaali. Masahi kalio kaliitsa khuchetulushila khuluveka lu vwaali.

¹⁶ Aliitsa khurulitsa livotselo nende vindu vili mulio nu khuvisiuva khuluveka luli ivukwi wu vwaali wa likooshe liavikhwa.

¹⁷ Musalisi aliitsa khukumila tsimbaha tsi linyonyi lienelo, nu khuliavulanyinya mu vitonye vivili, vuchila khutong'ola tsimbaha tsi linyonyi lienelo. Aliitsa khulisambila liosi mu mulilu khu vwaali. Mwayu kuhuunyanga nu kurula khu shihanwa shiu khusambwa khuli shienesho, shihanwa shiu khusambwa, nishili shihuunyanga mwayu ku khuyaanzitsa Mwami Nyasaye.