KHURULA 6 - IBIBILIA INDAKATIFU MU LUTIRICHI LWITAKHO NENDE LWISUKHA

¹ Navutswa Mwami Nyasaye yavoolela Musa, “Uliitsa khulola nunundi ka nzitsanga khukhola Mwami wa Misri. Ni kilikali, niitsa khurumishila tsingulu khutukha, lwa aliitsa khuvahuchilila khurula mu shivala shieshie.”

Khuli Nyasaye Yalaanga Musa

² Nyasaye yavoolela Musa, “Ninzi Mwami Nyasaye.

³ Ninzi walolekha khu Aburahamu, Isaka, nende Yakobo, khuli Nyasaye Uli Ikulu khu Viosi; navutswa shinali ni lienya liu khwenya vamanye, khuvirila khu lira lianje litakatifu Mwami Nyasaye tawe.

⁴ Ninzi wakhola khandi navo lilakano lianje, liu khuvaha shivala shia Kanaani, shivala shia vamenyamu khuli vandu vacheni.

⁵ Mali khuhulila nunundi khuli Vaisraeli, va Vamisri vakhola khuva varukwa valilanga tsikhwili, khandi nzitsushitse lilakano lianje.

⁶ Voolela Vaisraeli, ‘Ninzi Mwami Nyasaye! Niitsa khumuhonyinya, khandi mukhole khuva vavoholole khurula mu vurukwa mu shivala shia Misri. Niitsa khuvasalilitsa vululu muno, khandi muhonyinyi.

⁷ Niitsa khumukhola khuva vandu vaanje mwene, ninzi niliva Nyasaye wenyu. Nalwo lwa muliitsa khumanya ndi ninzi Mwami Nyasaye, uli Nyasaye wenyu wamukhola khuva vavoholole khurula mu vurukwa mu shivala shia Misri.

⁸ Niitsa khumuhila mu shivala shia nali nisuuha niitsa khuha Aburahamu, Isaka nende Yakobo. Niitsa khumuha shive shienyu shiu khumenyamu. Ninzi Mwami Nyasaye.’ ”

⁹ Musa yavoolela Vaisraeli makhuva kenako. Navutswa vambakhana khumuhulishitsa, shichila vali vakhutsa mwoyo, khandi shichila vanyashitswangwa vululu muno mu vurukwa.

¹⁰ Nalwo lwa Mwami Nyasaye yavoolela Musa,

¹¹ “Simukha utsi khuvoolela Mwami wa Misri aleshe Vaisraeli varuli mu shivala shieshie.”

¹² Navutswa Musa yavoolela Mwami Nyasaye, “Niiva Vaisraeli valambakhana khumbulishitsa. Mwami wa Misri anyala khumbulishitsa ndina, lwa ndi mundu wakorwa khulomoloma?”

¹³ Navutswa Mwami Nyasaye yavoolela Musa nende Haruni makhuva khulondokhana khu Vaisraeli nende Mwami wa Misri, ku khurulitsa Vaisraeli mu shivala shia Misri.

Lwivulu lwa Musa nende Haruni

¹⁴ Rubeni, mwana mukhulundu wa Yakobo yali wayivula vaana vi shiyayi vane, nivali Hanoku, Palu, Hezironi, nende Karami. Navo vali vakuuka vi tsinzivulu tsia vakulikhwa.

¹⁵ Simioni yali wayivula vaana vavaka sita vi shiyayi. Mira kavo ni Yemweli, Yamini, Ohadi, Yakini, Zohari, nende Shahuli, mwana wayivula khu mukhali wali Mukanaani. Navo vali vakuuka vi tsinzivulu tsia vakulikhwa.

¹⁶ Levi yali wayivula vaana vi shiyayi. Mira kavo ni Gerishoni, Kohaatsi, nende Merari. Navo vali vakuuka vi tsinzivulu tsia vakulikhwa. Levi yamenya mihika imia indala na makhomi saba.

¹⁷ Gerishoni yali wayivula vaana vavili vi shiyayi. Mira kavo ni Libuni nende Shimei, khandi vali na vitsukhulu vanyishi.

¹⁸ Kohaatsi yali wayivula vaana vi shiyayi vane. Mira kavo ni Amuramu, Izuhari, Heburoni, nende Uzieli. Kohaatsi yamenya mihika imia indala makhomi kavaka na kavaka.

¹⁹ Merari yali wayivula vaana vi shiyayi vavili. Mira kavo ni Mahuli nende Mushi. Navo vali tsinzivulu tsia Levi nende vitsukhulu vavo.

²⁰ Amuramu yahila mbotso wa tata wewe wali ni lira Yokebedi, khuva mukhali wewe. Yivula khuye Haruni nende Musa. Amurami yamenya mihika imia indala makhomi kavaka na saba.

²¹ Izuhari yali wayivula vaana vavaka vi shiyayi, nivali Kora, Nefegi, nende Zikuri.

²² Uzieli yali wayivula khandi vaana vi shiyayi vavaka. Mira kavo ni Mishaheli, Elizafani nende Sitsiri.

²³ Haruni yahila mukhali walaangwangwa Elisheba, mwana wi shikhana wa Aminadabu, wali nali mbotso Nahashoni. Haruni yivula khuye Nadabu, Abihu, Eliazari, nende Itsamari.

²⁴ Kora yali wayivula vaana vi shiyayi vavaka. Mira kavo ni Asiri, Elikana nende Abiasafu. Navo vali vakuuka vi tsinzivulu tsi tsinzu tsia Kora.

²⁵ Eliazari, wali mwana wa Haruni yahila mulala khu vaana vi shikhana va Putieli. Yivula khuye mwana walaangwangwa Finiasi. Navo vali vimilili vi tsinzu nende tsinzivulu tsia vandu vu lwivulu lwa Levi.

²⁶ Haruni nende Musa, navo vu Mwami Nyasaye yavoolela, “Rulitsi vandu vi tsimbia tsia Israeli mu shivala shia Misri.”

²⁷ Musa nende Haruni navo vandu vavoolela Mwami wa Misri, avoholole Vaisraeli khurula mu shivala shia Misri.

Haruni Alalomoloma mu Vwiyangu vwa Musa

²⁸ Lwa Mwami Nyasaye yalomoloma khu Musa, wali nali mu shivala shia Misri,

²⁹ yamuvoolela, “Ninzi Mwami Nyasaye. Uvoolele Mwami wa Misri shia shindu shiosi shia khuvoolela.”

³⁰ Navutswa Musa yamuvoolela, “Lwa yivi mwene wamanya vulahi ndi inzi nakorwa khulomoloma, usuuvilanga Mwami wa Misri anyala khumbulishitsa?”