KHURULA 20 - IBIBILIA INDAKATIFU MU LUTIRICHI LWITAKHO NENDE LWISUKHA

Malako Likhomi

¹ Nyasaye yalomoloma makhuva yaka koosi, navoola,

² “Ninzi Mwami Nyasaye, uli Nyasaye wenyu, wamurulitsa mu shivala shia Misri, wa mwamenyanga mu vurukwa.

³ “Uvuli khusaalakhu khu vanyasaye vandi khumeeta khwinzi.

⁴ “Uvuli khwilombelakhu musambwa kwosi, khusasa shia shindu shiosi shili mwikulu inoho hasi khulilova inoho mu matsi hasi hi lilova.

⁵ Uliitsa khuvula khuchinamila inoho khusaala khu misambwa chenecho, shichila Ninzi Mwami Nyasaye, uli Nyasaye wenyu, nashila lishiendekha. Salilitsanga yavo vanzambakhananga halala na vitsukhulu vavo khutukha khu likhula lia khavaka nende lia khane;

⁶ navutswa niitsa khumanyinya vuyaanzi vwanje vwi mihika ni mihika khu vandu va makhula tsiheelefu, yavo vanyanza khandi valondanga malako kaanje.

⁷ “Uvuli khurumishilakhu lira liu Mwami Nyasaye munjila indamanu; shichila ninzi Mwami Nyasaye, uli Nyasaye wowo. Niitsa khusalilitsa shia mundu wosi wurumishilanga lira lianje munjila indamanu.

⁸ “Witsushitse litukhu li Lisabato nu khulikhola khuva litakatifu.

⁹ Uli na matukhu sita ka unyala khukholelamu muhinzilu kwokwo kwosi khandi shia shindu shiosi.

¹⁰ Navutswa litukhu lia saba ni litukhu li Lisabato liu Mwami Nyasaye, uli Nyasaye wowo. Khulitukhu lienelo, uvuli khukholakhu muhinzilu kwosi, ave nivi, inoho vaana vovo vi shiyayi, inoho vaana vovo vi shikhana, murumishi wowo musatsa, inoho murumishi wowo mukhali, inoho tsing'ombe tsiotsio, inoho mundu mucheni wumenyanga mu shivala shienyu;

¹¹ shichila mumatukhu sita Mwami Nyasaye yalomba likulu nende lilova, inyanza, nende vindu viosi vimenyamu, manahulukha khulitukhu lia saba. Mwami Nyasaye yakasitsa litukhu li Lisabato, nalikhola khuva litakatifu.

¹² “Uhe tata wowo nende mama wowo luyali, uhindile mu shivala shiu Mwami Nyasaye, uli Nyasaye wowo atsitsanga khukhuha.

¹³ “Uvuli khwiirwakhu.

¹⁴ “Uvuli khuheeyakhu.

¹⁵ “Uvuli khahuuvakhu.

¹⁶ “Uvuli khwichishilakhu mureende wowo.

¹⁷ “Uvuli khwikombakhu inzu yu mureende wowo; inoho mukhali wewe, inoho murumishi wewe musatsa inoho murumishi wewe mukhali inoho ing'ombe yeye inoho ipunda yeye, inoho khali shia shindu shiosi shiu mureende wowo ali nashio.”

Vandu Varia

¹⁸ Lwa vandu vahulila likulu nilihilikananga, khandi shisiliva nishikhuvanga khandi nivalola luheni nuluhemukhanga nende mwooshi nu kurulanga khu shikulu; vatechela nivaria nivasinjila ihale wene muno.

¹⁹ Vavoolela Musa, “Niiva uliitsa khulomoloma khu khutsi, khunyala khukhuhulishitsa; navutswa khuli nuvuri ndi niiva Nyasaye alalomoloma khu khutsi, khuliitsa khukhutsa.”

²⁰ Musa yavoolela Vaisraeli, “Leshi khuria. Nyasaye witsi vutswa khumuchelitsa, khumulomba mutsililile khumuha luyali ma muleshe khukhola vwoni.”

²¹ Navutswa vandu vatsililila khusinjila ihale wene muno. Nikhali, Musa neye wonyene wisuunda himbi khu malesi malitoho ha Nyasaye yali nali.

Malako khu Vwaali

²² Mwami Nyasaye yavoolela Musa avoolele Vaisraeli, “Munyi vene muloli khuli nakhalomoloma khu munyi khurula mwikulu.

²³ Muvuli khwilombelakhu vene vanyasaye khu ifetsa, inoho khu itsahabu khusaala khumeeta khwinzi.

²⁴ Munzumbashile vwaali khurula khu malova. Muliitsa khusambila khuvwo musango kwosi kwa makondi kenyu nende tsing'ombe tsienyu, khuli shihanwa shiu khulera milembe. Havundu hosi ha niitsa khwahula haluveka ha muliitsa khusaala khwinzi, niitsa khu munyi mamukasitse.

²⁵ Niiva muliitsa khunzumbashila vwaali khurula khu machina, muvuli khurumishilakhu machina kakhongwa, shichila numurumishila shindu shiu khuvaatsila machina kenako, nalwo lwa muliitsa khwononyinya vwaali vwenovo.

²⁶ Muvuli khumbakhu vwaali vwanje ni viiko viu khwinjila muvwo. Niiva muliitsa khukhola kenako, muliitsa khwinavula shekenye shienyu, lwa muliitsa khuva numuninanga khu viiko viu vwaali.