KHURULA 11 - IBIBILIA INDAKATIFU MU LUTIRICHI LWITAKHO NENDE LWISUKHA

Lichelihitso khu Matiinyu Kukhumalilikha

¹ Nalwo lwa Mwami Nyasaye yavoolela Musa, “Niitsa khurumila Mwami wa Misri nende vandu veve litiinyu lilala lionyeshe. Matukhu mati nikakhavira, aliitsa khumuvoolela muruli mu shivala shieshie. Katoto, lwa aliitsa khumulekha khutsia, aliitsa khumukhunga mu shivala shieshie.

² Lomoloma khu Vaisraeli, uvavoolele vareeve vareende vavo vavahe vindu vialombwa khu itsahabu nende ifetsa.”

³ Mwami Nyasaye yalomba Vamisri, khulolela Vaisraeli vulahi muno. Ni kilikali, varumishi vu Mwami wa Misri, halala na vandu voosi vali vavukula Musa, khuva ni tsingulu tsinyishi.

⁴ Nalwo lwa Musa yavoolela Mwami wa Misri, “Mwami Nyasaye avoolanga, ‘Himbi mu vutukhu hakari, niitsa khuchenda shia havundu hosi mu shivala shia Misri.

⁵ Vaana vi shiyayi voosi vakhulundu vu mu shivala shia Misri valiitsa khukhutsa, khuraanjila khu mwana wi shiyayi mukhulundu wu Mwami wa Misri, wikhalanga khu shisoko shiu vwami, khutukha khu mwana wi shiyayi mukhulundu wu mukhali murukwa, usietsanga imu; khali vimoli vi tsing'ombe tsiosi viu khuraanga khwivulwa viliitsa khukhutsa.

⁶ Vandu valiitsa khulila tsikhwili tsinyishi muno shia havundu hosi mu shivala shia Misri -- tsikhwili tsindamanu muno khali tsishili khuhulilikhanakhu inoho tsiliitsa khuvula khandi khuhulilikhanakhu.

⁷ Navutswa khali isiimbwa iliitsa khuvula khusamila mundu Muisraeli inoho miruku chiavo. Muliitsa khumanya ndi inzi, Mwami Nyasaye nara vwavukhani Vamisri nende Vaisraeli.’ ”

⁸ Musa yamalila navoola, “Varumishi vovo voosi valiitsa khwinzi ma vasikamili, khandi valiitsa khumbolela ninyanza mbukuli vandu vaanje voosi ma nzi. Nivamali khukhola ndio, niitsa khurulaho.” Musa yalekha Mwami wa Misri, nali nu vurima vululu muno.

⁹ Mwami Nyasaye yavoolela Musa, “Mwami wa Misri aliitsa khutsililila khwambakhana khuhuchilila, khu nzililile khukhola viloleshitsu vianje vinyishi mu shivala shia Misri.”

¹⁰ Musa nende Haruni vakhola viloleshitsu yivi viosi imbeli wu Mwami wa Misri; navutswa Mwami Nyasaye yalomba Mwami wa Misri, khuva muhaaka, khali niyambakhana khuhuchilila Vaisraeli, khurula mu shivala shieshie.