ISAYA 63 - IBIBILIA INDAKATIFU MU LUTIRICHI LWITAKHO NENDE LWISUKHA

Khuli Mwami Nyasaye Akhalachila Vatsiku Veve

¹ Ni viina uyu witsanga narula mu shivala shia Edomu, khurula Bozira, niyifwali tsinguvu tsiu vutavala vumuuchi? Ni viina uyu wifwali inguvu yu vukhumi, uchendanga naroonjele ni tsingulu tsiu vunyali vwevwe?

² Shichila shina tsinguvu tsiotsio tsiamuuchiha, khuli tsiu mundu ukhamululanga matunda ki misabibu ha vaminikanga idivai?

³ “Mali khukhamulula matunda ki misabibu wonyene, mundu avulakhuho khali mulala khu vandu vaanje wakhonyakhu. Natuuvachila hasi vandu vi tsimbia tsindi mu vurima vwanje, nivaseneela hasi khuvirila mu vululu. Tsinguvu tsianje tsiayikhola masahi kavo.

⁴ Naviritsa mu mwoyo ndi litukhu liu khuvanzila vatsiku vaanje limali khutukha; muhika ku khuhonyinya vandu vaanje kumali khutukha.

⁵ Naheenza, navutswa shinanyolakhu mundu unyala khukhonya tawe; nachenya, shichila mundu avulakhuho wandinyishitsa; nanyola likuura khuvirila mu tsingulu tsianje mwene, vurima vwanje navwo vwanzuvishitsa.

⁶ Natuuvachila hasi vandu mu vurima vwanje, vululu vwanje vwachila nivatanda; khandi nisuundula masahi ku vulamu vwavo hasi.”

Vulahi vwa Nyasaye khu Israeli

⁷ Niitsa khwivaalakhu shindu shichila vuyaanzi vwi mihika ni mihika vu Mwami Nyasaye, vindu via yakhola vichilanga yitsominywa, khulondokhana khu koosi ka yakhukholela, khandi vulahi vwevwe khu Vaisraeli, vwa ya vamanyinya shichila tsimbavasi tsietsie, khandi shichila vunyishi vu vuyaanzi vwevwe vwi mihika ni mihika.

⁸ Mwami Nyasaye yavoola, “Ni kilikali, navo vandu vaanje, vaana vanyala khuvula khukaata.” Nakwa Muhonyinyi wavo.

⁹ Khali ye yanyakhana khuli vo vanyakhananga, khandi injelosi yeye ya vahonyinya; ya vahavina khuvirila mu vuyaanzi vwevwe nende tsimbavasi tsietsie; neye wa valinda vulahi vwene khurula khale.

¹⁰ Navutswa khali ndio, vahinganyinya Nyasaye nivavelelitsa Roho Mutakatifu wewe. Yakalukhana nakwa mutsiku khuvo, khali mwene navakwana.

¹¹ Nalwo lwa vandu veve varaanga khwitsushitsa matukhu kakhale, mumatukhu ka Musa wali murumishi wu Mwami Nyasaye. Vareeva, “Ni hena wu Mwami Nyasaye ali wahonyinya vimilili va vandu veve khurula mu inyanza? Ni hena wu Mwami Nyasaye ali wara hakari havo Roho Mutakatifu wewe,

¹² warumishila tsingulu tsietsie tsiu vukhumi khukhola vindu viu khuchenyinya khuvirila khu Musa, wavukhanyinya matsi imbeli wavo, khwilombela lira liliitsa khuvaho mihika ni mihika?

¹³ Neye wavimilila khuvirila mu luliiva mu inyanza, ni vakhalakanyilamu khuli ifarasi vuchila khwisikarila.

¹⁴ Khuli tsing'ombe tsikholomokhanga nitsitsia khwaya mu luhoongo, nindio khandi Roho wu Mwami Nyasaye yahulushitsa vandu va Nyasaye. Nindio khandi yivi wimilila vandu vovo, nu wilombela lira liu vukhumi.”

Lisaala liu Khureeva Tsimbavasi nende Vukhonyi

¹⁵ Yivi Nyasaye, nuyaanza ukhuheenze nuli mwikulu ma ukhulole, ukhuheenze nuli havundu hoho hatakatifu haheelwa vukhumi. Ni hena ha shinani shioshio nende vunyali vwovwo vili? Wakhwima vuyaanzi vwovwo nende tsimbavasi tsiotsio.

¹⁶ Khulwa yako, nivi tata weru, khali niiva Aburahamu yali wakhukorwa khutsi khali niiva Israeli shiyakhumanya khutsi tawe; Mwami Nyasaye, nivi uli tata weru. Khurula khale nivi walaangwangwa, “Muhavini weru.”

¹⁷ Yivi Mwami Nyasaye, shichila shina uchilanga nu khuvula khulonda tsinjila tsiotsio? Shichila shina wu khukholanga nu khuva vahaaka nu khwambakhana khukhuha luyali? Kalukhanyinya tsinganakani tsiotsio shichila khuli varumishi vovo, nivali vandu vi tsimbia tsiali tsiotsio khurula khale.

¹⁸ Vandu vatakatifu vovo vali vamenya Havundu Hatakatifu hoho khumatukhu mati vutswa; navutswa vatsiku veru vatuuvachilaho hasi.

¹⁹ Khumali khukwa khuli vandu va ushili khwamihakhu, khuli yavo vashili khusaalakhu khu yivi.