ISAYA 59 - IBIBILIA INDAKATIFU MU LUTIRICHI LWITAKHO NENDE LWISUKHA

Lichelihitso khu Vwoni

¹ Loli, mukanakananga Mwami Nyasaye nu muteteshele, khuvula khumuhonyinya munyi inoho wayikala maroyi khali khumuhulila munyi lwa musaalanga khuye nu mwenya khukhonywa!

² Navutswa vwoni vwenyu navwo vwa mwavukhanyinya khurula khu Nyasaye wenyu; vwoni vwenyu navwo vuchilanga navula khumuhulila amukhonye;

³ shichila mwaayitavanila masahi khu makhono kenyu, muli vatamanu. Mulomolomanga makhuva ku vuvehi, numuvoola vindu vitamanu.

⁴ Khali mulala khu munyi avulakhuho wilililanga mu katoto; avulakhuho uyaalanga wundi mu vulunji. Muheenzelelanga khu makhuva ka vutswa, numuvoola vuvehi; kachilanga mukwa mu vutiinyu numukhola vindu vitamanu.

⁵ Kalolekhanga muli khuli mureelanga mavuyu ki tsinzukha tsiu vutsiva khuli mulombanga inzu yu luvuvi. Mundu uliitsanga mavuyu katsio aliitsa khukhutsa, khali lwa lilala liatikhanga, nalwo lwa imbilikong'o irulamu.

⁶ Tsinzu tsi tsimbuvi tsinyala khuvula khurumishilwa khuli tsinguvu; vandu shivanyala khwifwala vindu via mwalomba tawe. Mihinzilu chiavo ni mihinzilu mitamanu, khandi vikholwa viavo ni viu khulera likhutsa.

⁷ Vilukhachilanga khukhola vwoni; ni vaangu khwiira mundu uvula vutamanu vwosi. Tsinganakani tsiavo ni tsinganakani tsindamanu; varikanga vindu nivioneshe nu khutivitsa shia havundu hosi ha vatsitsanga.

⁸ Khali vakorwa khumanya khuli milembe chinyolekhanga; valekha khukhola vwatoto. Vayilombela tsinjila tsishiamu; khali mundu avulakhuho uchendelakhu umenyi mu milembe.

Vandu Viyama Vwoni Vwavo

⁹ Nashio shivune shichilanga katoto nikavula khumanyikhana, khandi nu khuvula khukholelwa ku vulunji. Khwalindililanga khunyole vulavu, navutswa shisuundi nashio shiliho vutswa; khwenyanga mbasu, navutswa khuchendelanga mu shisuundi tititi.

¹⁰ Khuchendanga khuli vavekhu nu khutiilatila khu lisisi, khuchendanga khuli vandu vavula tsimoni; khwisikarilanga hakari mbasu, manya khuli nu vutukhu; nu khuli halala na vandu vi tsingulu khulolekhanga khuli vandu vakhutsa.

¹¹ Khuhumanga khuli makunyuli; khulakulanga, khulakulanga khuli vituti; khukhavanga khukholelwi vwatoto, navutswa kavulaho kakhulolanga; khuhonyinywa, navutswa khuvula shia khunyolanga;

¹² shichila vutamanu vweru nu vunyishi imbeli wowo, vwoni vweru vuhaananga vushiahidi khu kenako. Khwamenya nu khukholanga vutamanu, khwamanya vwoni vweru;

¹³ khuli vahingani, khali khwayambakhana yivi Mwami Nyasaye, khwayambakhana khulonda malako koko. Khwanyashitsa vandu khandi khwakhwivilila. Tsinganakani tsieru ni tsindamanu; lilomoloma lieru ni liu vuvehi.

¹⁴ Vwatoto vuli ihale wene, khandi likhola liu vulunji livulakhuho likholekhanga; katoto kavulakhuho mu vandu kanyala khurweshitswa; khandi malahi kavula.

¹⁵ Katoto kavula shia havundu hosi, khandi woyo wosi wambakhananga vutamanu neye unyolekhamu. Mwami Nyasaye yalola nikakholekhanga, navula khuyaanzitswa shichila vwatoto shiu vwakholekhanga tawe.

¹⁶ Yalola ndi mundu avulakhuho, manava ni lichenya shichila shiyalolakhu mundu unyala khukhonya vandu vanyashitswangwa tawe. Khulwa yako, yarumishila vunyali vwevwe khumuhonyinya likhola liu vulunji nilimuha tsingulu.

¹⁷ Yifwala shiuchi mu shiliru shieshie khuva khuli shimanyilu shiu vulunji vwevwe, khandi ikofia yu mukasa khu murwi kwekwe khuli shimanyilu shiu vuhonyinyi vwevwe; yifwala tsinguvu khuva khuli shimanyilu shiu khuvanzila nava nu vurima khuli wifwali ikaanzu yeye.

¹⁸ Aliitsa khusalilitsa mutsiku khulondokhana khu ka yakhola, nu khuvanzila ka vatsiku vakhola mavanzili vandu vamenyanga mu visuulu khurulana khu ka vakhola.

¹⁹ Vandu valiitsa khuha Mwami Nyasaye luyali, khurulila imbo, khandi khumuha vukhumi khurulila wa liuva lirulilanga; shichila aliitsa khwitsa khuli muchela kuviranga nu kuhilikana, kwa vushindu vu Mwami Nyasaye vuhuutsanga.

²⁰ Ye aliitsa khwitsa mu Sayoni khuli muhonyinyi, muhonyinyi wa vandu vi inzu ya Yakobo valiitsa khulekhana nu vwoni vwavo. Mwami Nyasaye umali khuvoola.

²¹ Mwami Nyasaye avoolanga, “Inzi kholanga na munyi lilakano lianje yili: Roho wanje wa namwitsulitsa, makhuva kaanje ka namuvoolela kaliitsa khuvula khuva ki shikhaya vutswa, khandi vaana venyu inoho vitsukhulu venyu shivaliitsa khukivilila khumatukhu koosi tawe.”