ISAYA 53 - IBIBILIA INDAKATIFU MU LUTIRICHI LWITAKHO NENDE LWISUKHA

¹ Ni viina wasuuvila makhuva ka khwahulila? Ni viina wamanyinywa tsingulu tsiu Mwami Nyasaye?

² Yavilukha imbeli wewe khuli shiraakwa shitoro khandi khuli shirina shiseevukhanga khurula hasi mu malova kumakana. Shiyalikhu nu luyali inoho likoondo liakaasa khukhulera khuye mwene, inoho ni likoondo lilahi khu khumwikombe tawe.

³ Vandu vamuchaya khandi nivamwambakhana, mundu wali nu vuveleli mu mwoyo khandi wamenya nanyakhananga. Mundu avulakhuho wali ni lienya liu khumuheenzakhu. Khwamulechelitsa nu khuvula khumuvukula khuli ni shindu.

⁴ Ni kilikali, yikhutsila linyakhana lia khwenyekhanga khunyakhane, khali nachinga vulwale vweru; navutswa khwali ninganakani ndi linyakhana lia yanyakhananga liarulanga khu Nyasaye.

⁵ Navutswa yasalilitswa tsinguma shichila vwoni vweru, yashiutwa shichila vutamanu vweru; lisalilitswa lia yavirilamu liachila nu khunyola vulamu, khandi tsinguma tsia yarumulwa tsiakhuhonyinya.

⁶ Khutsi voosi khwakora khuli makondi, shia mulala khu khutsi wakoyana; navutswa Mwami Nyasaye neye wamutiukha vutamanu vweru vwosi.

⁷ Yatambitswa khandi nanyashitswa, nikhali avula shindu shia yalomoloma; khuli shimeme shihilwangwa khutsia khusinzwa, khandi likondi lia vatsitsanga khukhalaka vwoya, vuchila khulomolomakhu shindu shiosi.

⁸ Yatambitswa, yakhalachila nahilwa khutsia khwiirwa, khandi ni viina walomolomakhu shindu shiosi khu vitsukhulu veve? Yakhutsa shichila vwoni vwa vandu veru.

⁹ Yavikhwa mu shilindwa halala na vandu vatamanu, nayeveelwa halala na vahinda, khali niiva shindu shitamanu shivulakhuho shia yali nakholi, inoho khuvoola vuvehi.

¹⁰ Nikhali liali lienya liu Mwami Nyasaye ashiutwi nu khunyakhana, khali shihanwa shiu khusemeha vwoni vweru. Aliitsa khuva nu vulamu mihika ni mihika nu khulola vitsukhulu veve; neye uliitsa khurweshitsa lienya liu Mwami Nyasaye.

¹¹ Mwami Nyasaye avoolanga, “Namali khuvirila mu linyakhana, aliitsa khuva nu vuyaanzi; aliitsa khumanya ndi shiyanyakhananga shikhaya tawe. Murumishi wanje wihaana nu mwoyo kwosi, wa nayaanzitswa naye, aliitsa khwitiukha lisalilitswa lia vandu voosi khandi niitsa khuvasemeha shichila ye.

¹² Khulwa yako, niitsa khumuha havundu hali nu luyali mu vi tsingulu, havundu ha aliitsa khuva halala na vi tsingulu nende vu vunyali. Mwene yirulitsa manasanga mu likhutsa lia vandu vatamanu vali ni vatushili khuvirilamu. Yavukula vwiyangu vwa vooni vanyishi khali nasaalila vandu vatamanu khu vasemehwi.”