ISAYA 51 - IBIBILIA INDAKATIFU MU LUTIRICHI LWITAKHO NENDE LWISUKHA

Makhuva Kukhuleminya Mwoyo Yerusalemi

¹ Mwami Nyasaye avoolanga, “Mbulishitsi, munyi vamuli ni lienya liu khuhonyinywa, khandi mukhavanga inzi Mwami Nyasaye; kanakanikhu lwanda lwa mwarulamu, mwiyeevo mwa mwayeevwamu.

² Kanakanikhu shindu khu kuuka wenyu Aburahamu, khandi khu Sara wa muli vitsukhulu vavo; shichila lwa Aburahamu yali wonyene vutswa vuchila mwana wosi, ninzi wamulaanga, nimukasitsa khandi nimukhola khwivula vitsukhulu vanyishi.

³ “Ni kilikali, niitsa khuleminya mwoyo Sayoni; khali niitsa khuleminya mwoyo yavo voosi vamenyanga mu lichiinga lialio; khali niiva shivala shialio shilolekhanga khuli nu mwichendanyama, shiliitsa khukwa khuli mulimi kwa Edeni, khandi shiangalangwi shialio khuva khuli mulimi kwanje inzi Mwami Nyasaye. Vandu valiitsa khuva nu vuyaanzi nivasangala; valiitsa khunzimbila tsinyimbo tsiu khusanditsa.

⁴ “Munyi vamuli vandu vaanje, mumbulishitsi; munyi vandu vuluhia lwanje, muhulile kambolanga; shichila liechitso liliitsa khurula khwinzi, khandi katoto kaanje kaliitsa khuva khuli vulavu khu vandu.

⁵ Niitsa khwitsa vwangu nu khuvahonyinya; matukhu kaanje ku khukuura katukhanga. Inzi mwene niitsa khwamiha vandu vi tsimbia tsindi. Vandu vamenyanga khuluchinga lwi inyanza vanindililanga, khandi vali ni lisuuvilitswa liu khuvahonyinya.

⁶ Heenzi ikulu mulole likulu, khandi muheenze hasi khulilova; shichila likulu liliitsa khutuumakha nu khuvwaho khuli mwooshi, khandi lilova liliitsa khwatikhanamu khuli inguvu irandukhanga khandi vandu vamenyamu valiitsa khumululukha khuli tsinji. Navutswa vuhonyinyi vwanje vuliitsa khuva vwi mihika ni mihika, khandi likuura lianje liliitsa khuvaho khumatukhu koosi.

⁷ “Mumbulishitsi, munyi vamwamanya likhola liu vulunji, munyi vandu va mwakumila lilako lianje mu mioyo chienyu; muvuli khuria lwa vandu vamukholelanga shihenye henye inoho khutechela shichila manyeko kavo;

⁸ shichila tsinjetso tsiliitsa khumulia khuli inguvu itsunukhananga, khandi tsikhungu tsiliitsa khumutsunulanyinya khuli ipamba; navutswa likhola lianje liu vulunji liliitsa khuvaho mihika ni mihika; khandi vuhonyinyi vwanje vuliitsa khuvaho khumatukhu koosi.”

⁹ Yivi Mwami Nyasaye, nuyaanza ukhole shindu, ukholekhu shindu! Rumishila tsingulu tsiotsio ma ukhuhonyinye; kholakhu shindu, khuli lwa wakhola mumatukhu kavira, khuli mumatukhu kakhale. Shiali nivi watoonyanyinya mu vitonye Rahabu, kwali kunyama kukali mu inyanza?

¹⁰ Nivi wakhaaminya inyanza, matsi ku luliiva lukali muno, nulomba muhaanda mu luliiva lwi inyanza khu vandu va wahonyinya khukhalakanyilamu nivambukha.

¹¹ Yavo va wahonyinya valiitsa khukalukha, mavatushi mu Sayoni nivimbanga tsinyimbo; valiitsa khuva nu vuyaanzi vwi mihika ni mihika, khandi valiitsa khuvula khuvelela nu khuheenda mwoyo.

¹² Mwami Nyasaye avoolanga, “Ninzi Mwami Nyasaye umuleminyanga mwoyo. Muli vanga viina vamuritsanga mundu utushili khukhutsa, mwana wu mundu vutswa uvula khumenya khumatukhu manyishi khuli vunyasi.

¹³ Mwamala khunzivilila inzi Mwami Nyasaye, uli muloonji wamuloonga, wavambalitsa likulu nalomba musinji kwi lilova; khandi mwamenya numwaria shia litukhu shichila vurima vwa yavo vamutambitsanga, venyanga khumutivitsa? Vurima vwa vandu vamutambitsanga vuli hena?

¹⁴ Yavo vavohwa mucheela valiitsa khuvohololwa vwangu yuvu; valiitsa khuvula khukhutsa ni vali mucheela, inoho inzala khuvamala.

¹⁵ “Ninzi Mwami Nyasaye, uli Nyasaye wenyu, uvwanyinyanga mulilu mu inyanza ma maruundu karaanga khurundukha -- lira lianje ni Mwami Nyasaye wi Mikaanda Chiliihe.

¹⁶ Mali khukhuvoolela ka muvoola; nu khukhushinga ni tsingulu tsianje -- Ninzi wavambalitsa likulu, khandi nimbikha musinji kwi lilova; ninzi uvoolelanga vandu va Sayoni, ‘Munyi navo vandu vaanje.’ ”

Linyakhana lia Yerusalemi Limali Khuvwa

¹⁷ Yivi litaala likali lia Yerusalemi, kholakhu shindu, kholakhu shindu! Nuyaanza sinjila! Yivi wang'wa khurula mu shikombe shi lisalilitswa lia Nyasaye, nishili shikombe shiu vurima vwevwe, wang'wa numala shia shindu shiosi khandi nutanda khuli vandu vachendanga nivavoya voya.

¹⁸ Khali khurula mu vaana voosi va wivula avulakhumu khali mulala unyala khukhwimilila; khali khurula mu vaana va yavilushitsa avulakhumu khali mulala unyala khukhukumila mukhono.

¹⁹ Matiinyu hali khavili yaka kamali khukhukwila -- ni viina uliitsa khukhuleminya mwoyo, liononyinywa ni litivitswa, inzala nende liihe. Ni viina uliitsa khukhulolela tsimbavasi?

²⁰ Vandu vovo vashiindanga, valaakalalanga shia havundu hosi mu tsinjila tsi litaala likali, khuli impongo yu mureeko kwakumila. Vasalilanga vululu muno khurulana khu vurima vwanje lwa inzi ndi Mwami Nyasaye khandi nilili khuli likondekha lianje inzi Nyasaye wenyu.

²¹ Munyi vandu vanyakhananga, muhulile kambolanga, munyi vamwatanda, navutswa shikali shichila idivai tawe.

²² Mwami Nyasaye, uli woyo ulindanga vandu veve avoolanga, “Loli! Mali khurulitsaho shikombe shia mwang'wamu nishimutanditsa; shikombe shiu vurima vwanje. Muliitsa khandi khuvula khung'wamu.

²³ Niitsa khukhola vandu vamutambitsanga vang'wi mu shikombe shienesho, nivali yavo vamuvoolela, ‘Koni hasi vulunji khuchendele khu munyi khwikulu.’ Mwakhola mikongo chienyu khuva khuli hasi, khuli injila yavo yu khuchendelakhu.”