ISAYA 50 - IBIBILIA INDAKATIFU MU LUTIRICHI LWITAKHO NENDE LWISUKHA

¹ Mwami Nyasaye avoolanga, “Ni hena wa ibarwa yu khulekhana yu khuhilana yachila nu khulekhana na mama wenyu ili? Inoho ni viina wandi ni likoovi lielie wachila nimukuulitsa khuye? Loli! Vwoni vwenyu navwo vwachila numukuulanyinywa, vutamanu vwenyu navwo vwachila nu khulekhana na mama wenyu.

² Shichila shina nitsaho nimbula khunyola mundu? Lwa nalaanga, shichila shina mundu navula khunjipa? Khunyala khuvoola mukhono kwanje kwahimbiha kunyala khuvula khuhonyinya? Inoho nyala khuva mbulakhu tsingulu tsiu khuhonyinya? Loli, ngondeshelanga inyanza ma ikhaama matsi, kholanga michela chikwa khuli shiangalangwi; tsisutsi tsiachio tsihuunyanga vukuundu shichila tsivula matsi, nitsikhutsa shichila vuluhu.

³ Ninzi umwaminyanga malesi, khuli ni vandu vikhulanga vakhutsu vavo.”

Varumishi vu Mwami Nyasaye Valalonda Malako

⁴ Mwami Nyasaye unzechitsi kanyala khuvoola, khu ndinyilitsi woyo wateteshela. Shia mu mavwevwe neye wu kholanga mba ni lienya liu khwenya khuhulila ka yenyanga khunzechitsa.

⁵ Mwami Nyasaye wanzikula maroyi kaanje, khandi shili khuhinganakhu inoho khumwambakhana.

⁶ Nahaana mukongo kwanje khu yavo vandumulanga, tsiseye tsianje khu yavo vasinyulanga matelu kaanje; shinavakayakhu lwa vambetsanga tsisoni inoho khundutsila maree mu moni mwanje tawe.

⁷ Navutswa Mwami Nyasaye neye ukhonyanga inzi, shinyala khuheenditswa mwoyo tawe. Khali nuumanga imoni khuli lichina, khandi manyi vulahi ndi niitsa khuvula khuheelwa tsisoni.

⁸ Woyo ushinganga khurula mu vutamanu ali himbi ninzi. Ni viina unyala khumbinjitsa? Leshi khusinjile naye mushiina. Ni viina wenyanga khunzala? Leshi avoole makhuva kachilanga niyenya khunzala.

⁹ Loli! Mwami Nyasaye neye ukhonyanga inzi; ni viina unyala khuvoola havulavu vutamanu vwa nakhola? Loli, vandu venavo voosi valiitsa khuvwa tsingulu khuli inguvu irandukhanga; tsinjetso tsiliitsa khuvalia khutukha lwa vavwa.

¹⁰ Ni viina khu munyi uheetsanga Mwami Nyasaye luyali nu khulonda likhuva liu murumishi wewe, khali niiiva achendanga mu shisuundi vuchila khulola vulavu, navutswa khali ndio, wasuuvilila mu Mwami Nyasaye khandi aheenza khu Nyasaye wewe amukhonye?

¹¹ Loli! Munyi voosi va muvwanyinyanga mulilu mu vandi khwenya vativitswi, muliitsa khutivitswa nu mulilu kwa mwa vwanyinyanga mu vandi. Mwami Nyasaye aliitsa khuchila kikholeshe; khandi muliitsa khunyakhana vululu muno.