ISAYA 48 - IBIBILIA INDAKATIFU MU LUTIRICHI LWITAKHO NENDE LWISUKHA

Vaisraeli ni Vahaaka

¹ Munyi vandu vi inzu ya Yakobo, muhulishitsi yaka, munyi vamwamanyikhana khu lira lia Israeli, munyi varulanga mu vandu vu lwivulu lwa Yakobo; va mwisuuhanga khuvirila khu lira liu Mwami Nyasaye, numusaala khu Nyasaye wa Israeli; navutswa mwalekha khukhola ndio munjila yatoto inoho yu vulunji.

² Mwilolanga numuvoola ndi litaala likali litakatifu ni lienyu, khandi mwayikhala vutswa khu Nyasaye wa Israeli amukhonya, uli ni lira Mwami Nyasaye wi Mikaanda Chiliihe.

³ Mwami Nyasaye avoolelanga Vaisraeli, “Vindu via namuvoolela havulavu khale viliitsa khwikholekha, navio vikholekhanga nunundi; ninzi mwene walomoloma makhuva kenako khandi nikamanyikhana; nonoho nakakhola nikikholekha.

⁴ Nali namanya muli vahaaka, mwatinya mirwi khuli shivia, khandi mwayuma imoni khuli mukasa.

⁵ Nali namuvulila havulavu khurula khale, nivishili khwikholekha nali namuvoolela, nikanyalikha mulilekha khuvoola, ‘Misambwa chianje nachio chiachila vindu vienevo nivikholekha; vifwanani vianje via navaatsa nende vifwanani vialoongwa navio viachila nikakholekha.’

⁶ “Shia shindu shiosi shia navoola shiliitsa khwikholekha shikholeshe; khutukha mwiyame ndi makhuva ka namuvoola kali katoto. Niitsa khumuvoolela vindu vicheni viliitsa khwikholekha, makhuva ka nali nishili khumuvoolela havulavu.

⁷ Vindu vienevo vikholekhanga nunundi, navutswa shikali viakholekha khale tawe; mwali numushili khuhulilakhu khale, nikakhali nunundi lwonyene. Kava kilikali, khani mwavoola, ‘Loli! Khwali khwahulilakhu khale.’

⁸ Mushili khuhulilakhu inoho khumanyakhu; khurula khale maroyi kenyu kashili khwikukha; shichila nali namanya ndi mwashila mahingani; khandi khurula khulitukhu lia mwivulwa mwali vandu vahingani.

⁹ “Khwenya vandu vahe lira lianje luyali, nashio shiachila nimbula khuvukula vurima vu vwangu; khuvela nali ni lienya liu khwitsominywa, nikanyalikha mbuli khumutivitsa.

¹⁰ Loli! Mali khumuchelitsa, shikali khuli ifetsa isambwangwa mu mulilu tawe; navutswa mali khumuchelitsila mu mulilu kwi lijiko liu khumunyashitsa.

¹¹ Kholanga ndio khulwanje mwene, shichila nyenyanga lira lianje livuli khuchaywa. Mbulakhu wanyala khusanga naye mu vukhumi vwanje!”

Kureeshi neye Mwimilili Warovolwa wu Mwami Nyasaye

¹² Mumbulishitsi munyi vandu vuluhia lwa Yakobo, munyi Vaisraeli va nalaanga! Ninzi Nyasaye, Ninzi wu khuraanga khandi wu khumalilikha!

¹³ Ninzi mwene wayeeva musinji kwi lilova, narumishila tsingulu tsianje khuvambalitsa likulu. Lwa nanganga lilova nende likulu, viosi vitsanga halala nivilolekha imbeli wanje.

¹⁴ “Munyi voosi, hambi halala muhulishitsi! Nu musambwa shina khu misambwa chiosi kwa muvoolelakhu vindu yivi nivishili khwikholekha? Mwami Nyasaye wayaanza mundu mwenoyo; shichila aliitsa khurweshitsa ka yavoola kaliitsa khwikholekha khu Babilonia, nu khukwana Vababilonia.

¹⁵ Ni kilikali, ninzi walomoloma makhuva kenako, nimulaanga; ninzi wamulera, khandi aliitsa khukuura mu shia shindu shiosi shia kholanga.

¹⁶ “Hambi himbi khwinzi khandi mumbulishitsi, Khurula lwa naraanga khuvoola makhuva yaka shili khulomolomelakhu muvwivisi. Khurula lwa vindu yivi viakholekha, inzi Mwami Nyasaye nali nindiho vutswa.”

Lienya lia Nyasaye Aloshitsilanga Vandu veve

¹⁷ Mwami Nyasaye, uli Muhavini wenyu, Nyasaye Mutakatifu wa Israeli avoolanga, “Ninzi Mwami Nyasaye, uli Nyasaye wenyu, umwechitsanga makhuva ku khumukhonya, umumwililanga khu injila indahi yamulondelakhu.

¹⁸ Muva numulondanga malako kaanje, mwakhanyoli tsikhaavi khuli matsi kakholomokhanga mu muchela, khandi mwakhakholi likhola liu vulunji khuli maruundu mu inyanza.

¹⁹ Vitsukhulu venyu vakhivulane mu vunyishi khuli muyeeshe, ni kilikali, vakhavele khuli ruchina ru muyeeshe; lira liavo lilatsililila khwitsushitswa nu khuvula khutivitswa.”

²⁰ Ruli mu shivala shia Babilonia, kholi vwangu mwilushi Vababilonia! Mulaanjilile numuvoola nu vuyaanzi makhuva kenako; nu mulanditsa shia havundu hosi khulilova; numuvoola, “Mwami Nyasaye umali khuhonyinya murumishi wewe Yakobo.”

²¹ Khali niiva yavimilila khukhalakanyila mu shiangalangwi; vavulakhu vuluhu vwa valeka; yachila matsi ka vang'wa nikarula mu lwanda; yatikhanyinya lwanda ma matsi nikasila khurulamu.

²² Mwami Nyasaye avoolanga, “Mundu mutamanu avulakhu milembe chia aliitsa khunyola.”