ISAYA 47 - IBIBILIA INDAKATIFU MU LUTIRICHI LWITAKHO NENDE LWISUKHA

Khuli Shivala shia Babilonia Shikhalachilwa

¹ Mwami Nyasaye avoolanga, “Yivi litaala lia Babilonia, yikha hasi wikhale khu malova; Yivi litaala lia Babilonia, khola nu wikhala hasi vuchila shisiko shiu vwami; shichila utsitsanga khuvula khulaangwa munyelele inoho mutoro toro.

² Vukuli isio usi imu; Unavule shitambaya! Nurulitsa tsikaanzu tsiotsio, khandi ukumile tsinguvu tsiotsio khu vilenje nu khalakinyila mu michela.

³ Uliitsa khulolwa shekenye, ma tsisoni tsiotsio ni tsiloleshe havulavu niitsa khuvanzila, khandi mundu avulakhuho waniitsa khurika.”

⁴ Mwami Nyasaye wi Mikaanda Chiliihe neye Muhavini weru -- neye Nyasaye Mutakatifu wa Israeli.

⁵ Mwami Nyasaye avoolelanga Babilonia, “Yikhala nuhonjeli khandi mu shisuundi; shichila shiuliitsa khulaangwakhu khandi Muruchi wi shikhali wa vandu vi tsimbia tsindi tawe!

⁶ Nali nu vurima shichila vandu vaanje; nimbula khuvakhola khuli ni vaanje; nachila numuvakuura; wambakhana khuvavela tsimbavasi. Khali wanyashitsa vululu vandu vasakhula.

⁷ Wakanakana nuvoola, ‘Niitsa khuva mwami wi shikhali mihika ni mihika,’ khali wivilila khuvikha kenako mu mwoyo kwokwo inoho khali khukanakanakhu kaliitsa khukhukwila.

⁸ “Yivi wayaanza limenya liu khwiyaanzilila, uhulishitsi, yivi wikhalanga nukanakana wumenyanga vulahi, yivi uvoolanga mu mwoyo kwokwo, ‘Ninzi utushili, khandi mundu avulakhuho wundi khuvira inzi; niitsa khuvula khwikhala khuli mukhutsakhali inoho khukhutsilwa vaana vaanje.’

⁹ Vindu vivili yivi viliitsa khukhukwila vwangu khulitukhu lilala, vuchila khumanyakhu shindu: khukhutsilwa vaana vovo nende musatsa wowo. Viliitsa khukhukwila khuvira shichelo, khali niiva uchendanga mu valoochi vanyishi khandi wurumishilanga vakhumu vanyishi.

¹⁰ “Wali wasuuvilila mu vutamanu vwovwo; nuvoola, ‘Mundu avulakhuho ulolanga inzi’; vusitsa vwovwo nende vucheli vwovwo vwakhukoyanyinya; mwene nuvoola, ‘Ninzi utushili, mundu avulakhuho wundi unyala khusasanyinywa khwinzi.’

¹¹ Navutswa matiinyu kaliitsa khukhukwila, kaliitsa khukhaya khwikalilwa; matiinyu kaliitsa khukhunyola, ka uliitsa khukhaywa khurulitsaho; khandi uliitsa khutivitswa vwangu khali vuchila khumanyakhu shindu shiosi.

¹² Khulwa yako, tinyilila khurumishila vakhumu vovo halala na valoochi vovo vanyishi, va warumishilanga nushili muvukha; haundi uliitsa khukuura, haundi uliitsa khurishitsa vandu.

¹³ Khali yivi mwene wavwa tsingulu khurulana khu inganakani inyishi ya ukhonywangwa; nu vulahi, leshi vitsi imbeli vakhuhonyinyi, yavo varunishitsanga likulu, vaheenzanga khu tsinyining'ini, yavo vavoolanga kushili kaliitsa khwikholekha khu yivi mumatukhu ku mweli kulolekhanga.

¹⁴ “Ni kilikali, valiitsa khuva khuli vunyasi vuumu, mulilu kuliitsa khuvalaalitsa; valiitsa khuvula khwihonyinya vene khurula mu mulilu mululu kwakhanga; kuliitsa khuva khuli mulilu kwa mundu yoranga vutswa anyole luya; kuliitsa khuva mulilu kworelwangwa ihale wene!

¹⁵ Nako koosi ka valiitsa khukhukhola yivi -- yavo va warumishilanga khandi nuchenda navo nushili muvukha. Shia mulala khuvo ahuya huyanga iyi neyo mu injila yeye mwene; khali mundu avulakhuho uliitsa khukhuhonyinya.”