ISAYA 45 - IBIBILIA INDAKATIFU MU LUTIRICHI LWITAKHO NENDE LWISUKHA

¹ Mwami Nyasaye avoolelanga murovole wewe Kureeshi Nivi mwami wanje wa narovola; nzitsanga khukhukhonya khukuura vandu vi tsimbia tsindi; khandi mali khutivitsa tsingulu tsia vami. Niitsa khukhwikulila miliango nikanyalikha vilivwa vilivula khwikalwa.

² Inzi mwene niitsa khukhwimilila imbeli wowo nu khulekhanyinya vikulu; niitsa khutong'olanyinya miliango chialombwa khu mukasa nu khureemakanyinya mu vitonye milondi chi vivia.

³ Niitsa khukhuha livishilu liaviswa mu shisuundi, khandi vuhinda vwavikhwa mu vwivisi, nikanyalikha umanye ndi ninzi Mwami Nyasaye, uli Nyasaye wa Israeli, nali woyo wakhulaanga lira liolio.

⁴ Ninzi wakhulaanga lira liolio, shichila murumishi wanje Yakobo, khandi shichila Israeli wa narovola; ninzi wa khuha lira lindi lia khavili liu luyali, khali niiva wangorwa.

⁵ “Ninzi Mwami Nyasaye, khandi avulakhuho wundi; avulakhuho Nyasaye wundi nikakhali inzi. Khuheetsanga tsingulu, khali niiva wangorwa,

⁶ nikanyalikha vandu vamanye, khali khurula wa liuva lirulilanga khandi khurula imbo, vamanye ndi avulakhuho wundi nikakhali inzi. Ninzi Mwami Nyasaye, avulakhuho wundi.

⁷ Nombanga vulavu nende shisuundi; njilanga vandu vanyola tsikhaavi nende matiinyu. Ninzi Mwami Nyasaye wu kholanga vindu yivi viosi.

⁸ Yivi likulu, khuvitsa imbula yi likhola liu vulunji khurula ikulu; khandi ulombe lilova khumeela viraakwa; numanyinya tsingulu tsiu khuhonyinya! Ninzi Mwami Nyasaye, wakhola kenako.

Vunyali vwi Tsingulu vwa Nyasaye

⁹ Wooyi! Ali khu vutiinyu mundu ulembananga nu Muloonji wewe, mundu uli khuli shindu shialoongwa khurula khu matohi! Litohi linyala khuvoolelakhu muloonji uliloonganga, ‘Ni shina shiuloonganga?’ Inoho ‘Muhinzilu kwokwo nu kwi shikhaya!’

¹⁰ Wooyi!! Ali khu vutiinyu mundu uvoolelanga tata wewe, ‘Shichila shina nunzivula?’ Inoho khuvoolela mama wewe, ‘Ni shina shia wivula shinu?’ ”

¹¹ Mwami Nyasaye, uli Nyasaye Mutakatifu wa Israeli avoolanga, “Muvula vunyali vu khundeva makhuva khu vaana vaanje, inoho khumbolela muhinzilu kwakhola!

¹² Ninzi walomba lilova, khandi waloonga mundu khumenya khulio. Ninzi warumishila tsingulu tsianje khuvambalalitsa likulu; ma liuva, mweli, nende tsinyining'ini nitsiva hasi ha malako kaanje.

¹³ Ninzi wachila Kureeshi niyamiha mu vulunji, khandi nalunjishitsa shia shindu shiosi shia kholanga; aliitsa khumbakha litaala likali lianje nu khuvoholola vandu vaanje vahilwa mu vuhaambe, khuvula khwenya khurungwa inoho khwenya shihanwa.” Inzi Mwami Nyasaye wi Mikaanda Chiliihe mali khuvoola.

¹⁴ Mwami Nyasaye avoolanga, “Miandu chia Misri nende vindu vi shivala shia Etsopia vakuulanga nivakuulitsa, halala ni via Vaseba, nivali varaambi muno, viliitsa khuva vienyu munyi shivala shia Israeli, valiitsa khuva varukwa venyu; valiitsa khwitsa khu munyi nivavoheelwi minyololo nivamusikamila; valiitsa khuhuchilila, nivavoola, ‘Nyasaye ali na munyi vonyene, khandi avulakhuho nyasaye wundi nikakhali ye wonyene.’ ”

¹⁵ Ni kilikali, nivi Nyasaye wivisanga mwene, uli Nyasaye wa Israeli, Muhonyinyi.

¹⁶ Vandu voosi valombanga misambwa valiitsa khuheelwa tsisoni nu khuheenditswa mwoyo; valiitsa khukoyanyinywa khulala.

¹⁷ Navutswa Mwami Nyasaye wahonyinya shivala shia Israeli, wa vahonyinya mihika ni mihika; vandu vamenyamu valiitsa khuvula khuheelwa tsisoni inoho khuheenditswa mwoyo khumatukhu koosi kaliitsa khuvaho.

¹⁸ Mwami Nyasaye walomba likulu, neye Nyasaye wonyene; woyo walomba khandi nalisinjilitsa vulahi, neye waliraanjitsa; shiyalilomba khuva liele tawe, navutswa yalilomba khu vindu vimenyemu -- Neye uvoolanga, “Ninzi Mwami Nyasaye wonyene, wundi avulakhuho.

¹⁹ Mbulakhu shindu shia navoola muvwivisi inoho mu shivala shi shisuundi. Shili khuvoolelakhu vandu vi inzu ya Yakobo, ‘Muvuli khukhavila mu shileeche.’ Inzi Mwami Nyasaye mbolanga katoto, khandi makhuva kaanje ni ku vulunji.”

²⁰ Munyi vandu vi tsimbia tsindi varikala, mwivunjelitsi halala munyi vamuvula vucheli, shichila muchinganga misambwa chialombwa khu musala, mamutsililila khusaala khu nyasaye uvula tsingulu tsiu khuhonyinya vandu.

²¹ Vooli nu kushili kaliitsa khwikholekha, mukavoole havulavu -- mukhonyane inganakani! Ni viina wavoola mumatukhu kakhale kakholekhanga nunundi? Ni viina wavoola havulavu kakholekha mumatukhu kakhale? Shiali ninzi Mwami Nyasaye tawe? Avulakhuho nyasaye wundi nikakhali inzi, Ninzi Nyasaye wu kholanga ku vulunji khandi muhonyinyi; avulakhuho wundi nikakhali inzi.

²² Kalushi khwinzi mamuhonyinywi, munyi vandu voosi mu shivala! Ninzi Nyasaye uliho wonyene khandi avulakhuho wundi.

²³ Inzi mwene namala khwisuuha ndi kambolanga ni katoto; likhuva lianje liliitsa khukholakhu shindu; shia mundu wosi wa naloonga aliitsa khusikamila nu khuva musuuvilwa khwinzi.

²⁴ Viliitsa khuvoola yaka khulondokhana khwinzi, “Mwami Nyasaye neye shirula shi likhola liu vulunji nende tsingulu. Yavo voosi vamuvukulila tsisoni, valiitsa khwitsa khuye nu khuheelwa tsisoni.

²⁵ Inzi Mwami Nyasaye niitsa khuhonyinya vitsukhulu voosi va Yakobo, khandi valiitsa khunzitsominya nu khumba vukhumi.”