ISAYA 40 - IBIBILIA INDAKATIFU MU LUTIRICHI LWITAKHO NENDE LWISUKHA

Khuli Vandu va Nyasaye Valeminywa Mwoyo

¹ Nyasaye wenyu avoolanga, “Muleminye mwoyo vandu vaanje, muvaleminye mwoyo!

² Mutinyilitse vandu vamenyanga mu Yerusalemi, muvavoolele ndi linyakhana liavo limali khuvwa; khandi vasemehwi vutamanu vwavo; mali khuvasalilitsa shichila vwoni vwavo vwosi.”

³ Mundu alaanjililanga navoola, “Recheshitsi injila yu Mwami Nyasaye mu shiangalangwi! Lunjishitsi mu shiangalangwi muhaanda mukalamu kwa Nyasaye weru alondelakhu.

⁴ Shia luhoongo luliitsa khwililitswa, khandi shia shikulu nende rukulu viliitsa khuchehitswa; havundu hashiama haliitsa khulekhanyinywa khandi havundu ha makova kali haliitsa khuva lwomera.

⁵ Nalwo lwa vukhumi vu Mwami Nyasaye vuliitsa khumanyinywa; ma vandu voosi mu shivala vavulolele khulala, shichila Mwami Nyasaye umali khuvoola kenako.”

⁶ Mundu alaanjililanga navoola, “Yilwatse likhuva!” Nalwo lwa nareeva, “Likhuva shina lia nzilwatsa?” Yambolela, “Yilwatse ndi vandu voosi vali khuli vunyasi, khandi likoondo liavo lilahi lili khuli mawua mu mulimi.

⁷ Vunyasi vunialanga, khandi mawua kavungulukhanga, lwa Mwami Nyasaye arumanga vushindu vwevwe khuvihuutsa; ni kilikali, vandu vali vutswa khuli vunyasi.

⁸ Vunyasi vunialanga, mawua kavungulukhanga, navutswa likhuva liu Mwami Nyasaye lilavaho mihika ni mihika.”

⁹ Numuyaanza mutikulushi khu shikulu shiaraambiha, Munyi vandu va Sayoni, munyi va mwilwatsanga likhuva lilahi! Mumulaanjilile nu mwoyo mukali, munyi vandu va Yerusalemi, va mwilwatsanga likhuva lilahi; yilwatsi kamuli nako, muvuli khuria; vooleli mataala ka Yuda, “Loli, Nyasaye wenyu yitsanga!”

¹⁰ Loli! Mwami Nyasaye yitsanga nu vunyali vwevwe, khandi yamihanga ni tsingulu tsietsie; loli, ali ni shihanwa shieshie khandi yimililanga yavo vamali khuhonyinya.

¹¹ Atsitsanga khwayitsa shiayo shieshie khuli mwayi; Aliitsa khulera halala vimeme via makondi mu makhono keke, nu khukachinga himbi khu maveeka keke; nu khwimilila vulahi vwene yako kali ni vimeme vitoro.

Nyasaye wa Israeli Avula Wanyala Khulekhanyinywakhu

¹² Ni viina unyala khupima inyanza ni tsikhovi tsiu mukhono kwekwe inoho khupima malesi na makhono keke? Mundu alikhuho unyala khwitsulitsa malova ku khulilova mu shikombe inoho khupima khu ilaatili vulitoho vwi vikulu nende rukulu?

¹³ Ni viina wavoolelakhu Roho wu Mwami Nyasaye kanyala khukhola, inoho wamukhonyakhu inganakani yu khulonda?

¹⁴ Ni viina wa Nyasaye yareeva amukhonye inganakani yu khucheliha, ni viina wamwechitsa khukhola katoto, khandi ni viina wamwechitsa khuli anyola vucheli, khandi wamumanyinya khuli anyola limanya?

¹⁵ Ni kilikali, vandu vi tsimbia tsiosi vali khuli imbuuru ya matsi karoonyanyanga nikarula mu indoho; khandi kavukulwangwa khuli lukuushi nikapimwa khu ilaatili; loli, avukulanga visuulu khuli lukuushi lunyiukhu muno.

¹⁶ Muliru kwa Lebanoni kuvula tsikhuyi tsiu khurumishilwa, inoho tsinyama tsiu khukholela musango kwi shihanwa shiu khusambwa.

¹⁷ Mwami Nyasaye avukulanga vandu vi tsimbia tsiosi khuli ni shindu shikhaya khuye; avalolanga khuli vavula vukhonyi khandi ni shindu shikhaya.

¹⁸ Ni viina wa munyala khulekhanyinya khu Nyasaye, inoho ni likoondo shina lia munyala khusasanyinya khuye?

¹⁹ Nu musambwa! Nukuli kwa mundu yalomba, ma mwiraanyi wi itsahabu akuvekha itsahabu khandi akulombela minyololo khurula khu ifetsa.

²⁰ Mundu mumanani unyala khuvula khukhola musango khuli kwenoko arovolanga shihanwa shi tsikhuyi tsinyala khuvula khukuunda. Akhavanga mundu wechela khulomba vindu khumulombela shifwanani shinyala khuvula khusuundwa.

²¹ Mushili khumanyakhu? Khali mushili khuhulilakhu? Mushili khuvoolelwakhu khurula khale? Mushili khuvoolelwakhu khuraanjila khulitukhu lia shivala shialoongwa?

²² Shialoongwa na woyo wikhalanga khu shisoko shieshie shiu vwami, khandi vandu vamenyanga mushio vali khuli matakalala. Wavambalalitsa likulu khuli nu luvaala, nu khwaala hasi khuli ni liheemo liu khumenyamu.

²³ Arulitsanga khu vwami vimilili vi tsingulu makhola vamihi vamihanga khulilova khunu khuva shindu vutswa.

²⁴ Vali vutswa khuli viraakwa vitoro, vivetsanga ni viakharaanga khumeela vuchila khuva ni miili chiene. Lwa Mwami Nyasaye arumanga vushindu, viumanga ma vushindu vuvihuutsa khuli nu vunyasi vuumu.

²⁵ Nyasaye mutakatifu avoolanga: Ni viina wa munyala khulekhanyinya khwinzi, mbe khuli ye?

²⁶ Khali heenzikhu mu malesi mamulole! Ni viina waloonga vindu via mulolanga? Woyo uvimililanga khuli yimililanga mukaanda kwa vasikali; wamanya ni vianga khandi alaanganga shia shilala lira! Ali ni tsingulu tsinyishi muno -- khali shilala khuvio shinyala khuvula khukora!

²⁷ Yivi Yakobo, shichila shina wilililanga nuvoola ndi Mwami Nyasaye wakorwa vutiinyu vwovwo, inoho khali avula shia khuheendelakhu mwoyo lwa unyashitswangwa uvula khukholelwa vwatoto?

²⁸ Munyala khuva mushili khumanyakhu? Khali mushili khuhulilakhu? Mwami Nyasaye ni Nyasaye wi mihika ni mihika; neye waloonga shivala shiosi. Ashili khuteteshelakhu inoho khuvwa tsingulu; mundu avulakhuho unyala khumanya shia yenyanga khukhola.

²⁹ Aheetsanga vandu vashiindanga tsingulu, nu khumeeta mundu uvula vunyali vwosi tsingulu.

³⁰ Khali vavukha valiitsa khuvwa tsingulu nu khuteteshela, khandi vasatsa vavukha valiitsa khwisikarila nu khukwa;

³¹ navutswa yavo vali ni lisuuvilitswa liavo mu Mwami Nyasaye valiitsa khumeetwa tsingulu; valiitsa khupulukha ni tsimbaha khuli shilitsa; valiitsa khwilukhaka vuchila khuvwa tsingulu; valiitsa khuchenda vuchila khushiinda.