ISAYA 4 - IBIBILIA INDAKATIFU MU LUTIRICHI LWITAKHO NENDE LWISUKHA

¹ Vandu vakhali saba valiitsa khukumila musatsa mulala khulitukhu lienelo, nivavoola, “Khuliitsa khulia vene shiukhulia shieru, makhwifwale tsinguvu tsieru; navutswa nuyaanza lekha khuvoole nivi musatsa weru wakhuhila, nikanyalikha khuvuli khunyola tsisoni tsiu khuvukulwa lukhali luvulakhuho lwa khwatsiakhu.”

² Mumatukhu kenako, lusia lwa Mwami Nyasaye luliitsa khuva ni likoondo lilahi nende vukhumi; khandi Vaisraeli varikala valiitsa khwikhoyela viraakwa vimeelanga mu milimi chiavo.

³ Woyo wosi uliitsa khurikala mu Sayoni, nakhwo khuvoola mu Yerusalemi aliitsa khulaangwa mutakatifu; shia mundu wosi uliitsa khuva nashili mwoyo mu Yerusalemi.

⁴ Mwami Nyasaye aliitsa khurulitsaho shifwavi shia vakhali vamenyanga mu Sayoni. Aliitsa khweya masahi kasuundulwa mu Yerusalemi khuvirila khu tsingulu tsia Roho wewe ukhalachilanga vandu nende Roho wewe wakhanga mulilu.

⁵ Mwami Nyasaye aliitsa khuruma malesi mbasu nende lumemo lu mulilu kwakhanga mu vutukhu khu Shikulu shia Sayoni; khandi khu yavo voosi valiitsa khuva nivivunjelitsiliyo. Vukhumi vwa Nyasaye vuliitsa khuvimba nu khulinda litaala likali liosi.

⁶ Vukhumi vwevwe vuliitsa khuva khuli shiniikha; khandi khuli shindu shiu khwishinga khu mbasu, khandi khuli shivisilu shieru khandi havundu ha khunyala khwivisa khurula khu imbuutsa inditoho nende imbula.